(૨૦) ૧૧. નિરોધકથા

૩૫૩. દ્વે નિરોધાતિ? આમન્તા. દ્વે દુક્ખનિરોધાતિ? ન હેવં વત્તબ્બે…પે… દ્વે દુક્ખનિરોધાતિ? આમન્તા. દ્વે નિરોધસચ્ચાનીતિ? ન હેવં વત્તબ્બે…પે… દ્વે નિરોધસચ્ચાનીતિ? આમન્તા. દ્વે દુક્ખસચ્ચાનીતિ? ન હેવં વત્તબ્બે…પે… દ્વે નિરોધસચ્ચાનીતિ? આમન્તા. દ્વે સમુદયસચ્ચાનીતિ? ન હેવં વત્તબ્બે…પે… દ્વે નિરોધસચ્ચાનીતિ? આમન્તા. દ્વે મગ્ગસચ્ચાનીતિ? ન હેવં વત્તબ્બે…પે….

દ્વે નિરોધસચ્ચાનીતિ? આમન્તા. દ્વે તાણાનિ…પે… દ્વે લેણાનિ… દ્વે સરણાનિ… દ્વે પરાયણાનિ… દ્વે અચ્ચુતાનિ… દ્વે અમતાનિ… દ્વે નિબ્બાનાનીતિ? ન હેવં વત્તબ્બે…પે….

દ્વે નિબ્બાનાનીતિ? આમન્તા. અત્થિ દ્વિન્નં નિબ્બાનાનં ઉચ્ચનીચતા હીનપણીતતા ઉક્કંસાવકંસો સીમા વા ભેદો વા રાજિ વા અન્તરિકા વાતિ? ન હેવં વત્તબ્બે…પે….

દ્વે નિરોધાતિ? આમન્તા. નનુ અપ્પટિસઙ્ખાનિરુદ્ધે સઙ્ખારે પટિસઙ્ખા નિરોધેન્તીતિ? આમન્તા. હઞ્ચિ અપ્પટિસઙ્ખાનિરુદ્ધે સઙ્ખારે પટિસઙ્ખા નિરોધેન્તિ, નો ચ વત રે વત્તબ્બે – ‘‘દ્વે નિરોધા’’તિ.

ન વત્તબ્બં – ‘‘દ્વે નિરોધા’’તિ? આમન્તા. નનુ અપ્પટિસઙ્ખાનિરુદ્ધાપિ સઙ્ખારા અચ્ચન્તભગ્ગા, પટિસઙ્ખાનિરુદ્ધાપિ સઙ્ખારા અચ્ચન્તભગ્ગાતિ? આમન્તા. હઞ્ચિ અપ્પટિસઙ્ખાનિરુદ્ધાપિ સઙ્ખારા અચ્ચન્તભગ્ગા, પટિસઙ્ખાનિરુદ્ધાપિ સઙ્ખારા અચ્ચન્તભગ્ગા, તેન વત રે વત્તબ્બે – ‘‘દ્વે નિરોધા’’તિ.

દ્વે નિરોધાતિ? આમન્તા. પટિસઙ્ખાનિરુદ્ધાપિ [પટિસઙ્ખાનિરુદ્ધા (?)] સઙ્ખારા અરિયમગ્ગં આગમ્મ નિરુદ્ધાતિ? આમન્તા. અપ્પટિસઙ્ખાનિરુદ્ધા સઙ્ખારા અરિયમગ્ગં આગમ્મ નિરુદ્ધાતિ? ન હેવં વત્તબ્બે…પે….

દ્વે નિરોધાતિ? આમન્તા. પટિસઙ્ખાનિરુદ્ધા સઙ્ખારા ન પુન ઉપ્પજ્જન્તીતિ? આમન્તા. અપ્પટિસઙ્ખાનિરુદ્ધા સઙ્ખારા ન પુન ઉપ્પજ્જન્તીતિ? ન હેવં વત્તબ્બે…પે… તેન હિ ન વત્તબ્બં – ‘‘દ્વે નિરોધા’’તિ.

નિરોધકથા નિટ્ઠિતા.

દુતિયવગ્ગો.

તસ્સુદ્દાનં –

પરૂપહારો અઞ્ઞાણં, કઙ્ખા પરવિતારણા;

વચીભેદો દુક્ખાહારો, ચિત્તટ્ઠિતિ ચ કુક્કુળા;

અનુપુબ્બાભિસમયો, વોહારો ચ નિરોધકોતિ.