(૧૦) ૧. પરૂપહારકથા

૩૦૭. અત્થિ અરહતો અસુચિ સુક્કવિસ્સટ્ઠીતિ? આમન્તા. અત્થિ અરહતો રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણન્તિ? ન હેવં વત્તબ્બે…પે….

નત્થિ અરહતો રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણન્તિ? આમન્તા. હઞ્ચિ નત્થિ અરહતો રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણં, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

અત્થિ પુથુજ્જનસ્સ અસુચિ સુક્કવિસ્સટ્ઠિ, અત્થિ તસ્સ રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણન્તિ? આમન્તા. અત્થિ અરહતો અસુચિ સુક્કવિસ્સટ્ઠિ, અત્થિ તસ્સ રાગો કામરાગો કામરાગપરિયુટ્ઠાનં…પે… કામચ્છન્દનીવરણન્તિ? ન હેવં વત્તબ્બે…પે….

અત્થિ અરહતો અસુચિ સુક્કવિસ્સટ્ઠિ, નત્થિ તસ્સ રાગો કામરાગો કામરાગપરિયુટ્ઠાનં…પે… કામચ્છન્દનીવરણન્તિ? આમન્તા. અત્થિ પુથુજ્જનસ્સ અસુચિ સુક્કવિસ્સટ્ઠિ, નત્થિ તસ્સ રાગો કામરાગો કામરાગપરિયુટ્ઠાનં…પે… કામચ્છન્દનીવરણન્તિ? ન હેવં વત્તબ્બે…પે….

અત્થિ અરહતો અસુચિ સુક્કવિસ્સટ્ઠીતિ? આમન્તા. કેનટ્ઠેનાતિ? હન્દ હિ મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તીતિ.

મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તીતિ? આમન્તા. અત્થિ મારકાયિકાનં દેવતાનં અસુચિ સુક્કવિસ્સટ્ઠીતિ? ન હેવં વત્તબ્બે…પે….

નત્થિ મારકાયિકાનં દેવતાનં અસુચિ સુક્કવિસ્સટ્ઠીતિ? આમન્તા. હઞ્ચિ નત્થિ મારકાયિકાનં દેવતાનં અસુચિ સુક્કવિસ્સટ્ઠિ, નો ચ વત રે વત્તબ્બે – ‘‘મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તી’’તિ.

મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તીતિ? આમન્તા. મારકાયિકા દેવતા અત્તનો અસુચિં સુક્કવિસ્સટ્ઠિં ઉપસંહરન્તિ, અઞ્ઞેસં અસુચિં સુક્કવિસ્સટ્ઠિં ઉપસંહરન્તિ, તસ્સ અસુચિં સુક્કવિસ્સટ્ઠિં ઉપસંહરન્તીતિ? ન હેવં વત્તબ્બે…પે….

મારકાયિકા દેવતા નેવ અત્તનો ન અઞ્ઞેસં ન તસ્સ અસુચિં સુક્કવિસ્સટ્ઠિં ઉપસંહરન્તીતિ? આમન્તા. હઞ્ચિ મારકાયિકા દેવતા નેવ અત્તનો ન અઞ્ઞેસં ન તસ્સ અસુચિં સુક્કવિસ્સટ્ઠિં ઉપસંહરન્તિ, નો ચ વત રે વત્તબ્બે – ‘‘મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તી’’તિ.

મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તીતિ? આમન્તા. લોમકૂપેહિ ઉપસંહરન્તીતિ? ન હેવં વત્તબ્બે…પે….

૩૦૮. મારકાયિકા દેવતા અરહતો અસુચિં સુક્કવિસ્સટ્ઠિં ઉપસંહરન્તીતિ? આમન્તા. કિં કારણાતિ? હન્દ હિ વિમતિં ગાહયિસ્સામાતિ. અત્થિ અરહતો વિમતીતિ? ન હેવં વત્તબ્બે…પે….

અત્થિ અરહતો વિમતીતિ? આમન્તા. અત્થિ અરહતો સત્થરિ વિમતિ, ધમ્મે વિમતિ, સઙ્ઘે વિમતિ, સિક્ખાય વિમતિ, પુબ્બન્તે વિમતિ, અપરન્તે વિમતિ, પુબ્બન્તાપરન્તે વિમતિ, ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? ન હેવં વત્તબ્બે…પે….

નત્થિ અરહતો સત્થરિ વિમતિ, ધમ્મે વિમતિ, સઙ્ઘે વિમતિ, સિક્ખાય વિમતિ, પુબ્બન્તે વિમતિ, અપરન્તે વિમતિ, પુબ્બન્તાપરન્તે વિમતિ, ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? આમન્તા. હઞ્ચિ નત્થિ અરહતો સત્થરિ વિમતિ…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતિ, નો ચ વત રે વત્તબ્બે – ‘‘અત્થિ અરહતો વિમતી’’તિ.

અત્થિ પુથુજ્જનસ્સ વિમતિ, અત્થિ તસ્સ સત્થરિ વિમતિ…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? આમન્તા. અત્થિ અરહતો વિમતિ, અત્થિ તસ્સ સત્થરિ વિમતિ…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? ન હેવં વત્તબ્બે…પે….

અત્થિ અરહતો વિમતિ, નત્થિ તસ્સ સત્થરિ વિમતિ…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? આમન્તા. અત્થિ પુથુજ્જનસ્સ વિમતિ, નત્થિ તસ્સ સત્થરિ વિમતિ…પે… ઇદપ્પચ્ચયતાપટિચ્ચસમુપ્પન્નેસુ ધમ્મેસુ વિમતીતિ? ન હેવં વત્તબ્બે…પે….

અત્થિ અરહતો અસુચિ સુક્કવિસ્સટ્ઠીતિ? આમન્તા. અરહતો અસુચિ સુક્કવિસ્સટ્ઠિ કિસ્સ નિસ્સન્દોતિ? અસિતપીતખાયિતસાયિતસ્સ નિસ્સન્દોતિ. અરહતો અસુચિ સુક્કવિસ્સટ્ઠિ અસિતપીતખાયિતસાયિતસ્સ નિસ્સન્દોતિ? આમન્તા. યે કેચિ અસન્તિ પિવન્તિ ખાદન્તિ સાયન્તિ, સબ્બેસંયેવ અત્થિ અસુચિ સુક્કવિસ્સટ્ઠીતિ? ન હેવં વત્તબ્બે…પે….

યે કેચિ અસન્તિ પિવન્તિ ખાદન્તિ સાયન્તિ, સબ્બેસંયેવ અત્થિ અસુચિ સુક્કવિસ્સટ્ઠીતિ? આમન્તા. દારકા અસન્તિ પિવન્તિ ખાદન્તિ સાયન્તિ, અત્થિ દારકાનં અસુચિ સુક્કવિસ્સટ્ઠીતિ? ન હેવં વત્તબ્બે.

પણ્ડકા અસન્તિ પિવન્તિ ખાદન્તિ સાયન્તિ, અત્થિ પણ્ડકાનં અસુચિ સુક્કવિસ્સટ્ઠીતિ? ન હેવં વત્તબ્બે…પે….

દેવા અસન્તિ પિવન્તિ ખાદન્તિ સાયન્તિ, અત્થિ દેવતાનં અસુચિ સુક્કવિસ્સટ્ઠીતિ? ન હેવં વત્તબ્બે…પે….

૩૦૯. અરહતો અસુચિ સુક્કવિસ્સટ્ઠિ અસિતપીતખાયિતસાયિતસ્સ નિસ્સન્દોતિ? આમન્તા. અત્થિ તસ્સ આસયોતિ? ન હેવં વત્તબ્બે…પે….

અરહતો ઉચ્ચારપસ્સાવો અસિતપીતખાયિતસાયિતસ્સ નિસ્સન્દો, અત્થિ તસ્સ આસયોતિ? આમન્તા. અરહતો અસુચિ સુક્કવિસ્સટ્ઠિ અસિતપીતખાયિતસાયિતસ્સ નિસ્સન્દો, અત્થિ તસ્સ આસયોતિ? ન હેવં વત્તબ્બે…પે….

અરહતો અસુચિ સુક્કવિસ્સટ્ઠિ અસિતપીતખાયિતસાયિતસ્સ નિસ્સન્દો, નત્થિ તસ્સ આસયોતિ? આમન્તા. અરહતો ઉચ્ચારપસ્સાવો અસિતપીતખાયિતસાયિતસ્સ નિસ્સન્દો, નત્થિ તસ્સ આસયોતિ? ન હેવં વત્તબ્બે…પે….

૩૧૦. અત્થિ અરહતો અસુચિ સુક્કવિસ્સટ્ઠીતિ? આમન્તા. અરહા મેથુનં ધમ્મં પટિસેવેય્ય, મેથુનં ઉપ્પાદેય્ય [મેથુનં ધમ્મં ઉપ્પાદેય્ય (સી. સ્યા.)], પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્યાતિ? ન હેવં વત્તબ્બે.

અત્થિ પુથુજ્જનસ્સ અસુચિ સુક્કવિસ્સટ્ઠિ, પુથુજ્જનો મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્યાતિ? આમન્તા. અત્થિ અરહતો અસુચિ સુક્કવિસ્સટ્ઠિ, અરહા મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્યાતિ? ન હેવં વત્તબ્બે…પે….

અત્થિ અરહતો અસુચિ સુક્કવિસ્સટ્ઠિ, ન ચ અરહા મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્યાતિ? આમન્તા. અત્થિ પુથુજ્જનસ્સ અસુચિ સુક્કવિસ્સટ્ઠિ, ન ચ પુથુજ્જનો મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્યાતિ? ન હેવં વત્તબ્બે.

અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહતો રાગો પહીનો ઉચ્છિન્નમૂલો તાલાવત્થુકતો અનભાવઙ્કતો આયતિં અનુપ્પાદધમ્મોતિ? આમન્તા. હઞ્ચિ અરહતો રાગો પહીનો ઉચ્છિન્નમૂલો તાલાવત્થુકતો અનભાવઙ્કતો આયતિં અનુપ્પાદધમ્મો, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહતો દોસો પહીનો…પે… મોહો પહીનો… માનો પહીનો… દિટ્ઠિ પહીના… વિચિકિચ્છા પહીના… થિનં પહીનં… ઉદ્ધચ્ચં પહીનં… અહિરિકં પહીનં…પે… અનોત્તપ્પં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મન્તિ? આમન્તા. હઞ્ચિ અરહતો અનોત્તપ્પં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મં, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

૩૧૧. અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહતો રાગપ્પહાનાય મગ્ગો ભાવિતોતિ? આમન્તા. હઞ્ચિ અરહતો રાગપ્પહાનાય મગ્ગો ભાવિતો, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહતો રાગપ્પહાનાય સતિપટ્ઠાના ભાવિતા…પે… સમ્મપ્પધાના ભાવિતા… ઇદ્ધિપાદા ભાવિતા… ઇન્દ્રિયા ભાવિતા… બલા ભાવિતા…પે… બોજ્ઝઙ્ગા ભાવિતાતિ? આમન્તા. હઞ્ચિ અરહતો રાગપ્પહાનાય બોજ્ઝઙ્ગા ભાવિતા, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહતો દોસપ્પહાનાય…પે… મોહપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતાતિ? આમન્તા. હઞ્ચિ અરહતો અનોત્તપ્પપહાનાય બોજ્ઝઙ્ગા ભાવિતા, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ અરહા વીતરાગો વીતદોસો વીતમોહો કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞાવિમુત્તો ઉક્ખિત્તપલિઘો સઙ્કિણ્ણપરિખો અબ્બૂળ્હેસિકો નિરગ્ગળો અરિયો પન્નદ્ધજો પન્નભારો વિસઞ્ઞુત્તો સુવિજિતવિજયો, દુક્ખં તસ્સ પરિઞ્ઞાતં, સમુદયો પહીનો, નિરોધો સચ્છિકતો, મગ્ગો ભાવિતો, અભિઞ્ઞેય્યં અભિઞ્ઞાતં, પરિઞ્ઞેય્યં પરિઞ્ઞાતં, પહાતબ્બં પહીનં, ભાવેતબ્બં ભાવિતં, સચ્છિકાતબ્બં સચ્છિકતન્તિ? આમન્તા. હઞ્ચિ અરહા વીતરાગો વીતદોસો વીતમોહો કતકરણીયો…પે… સચ્છિકાતબ્બં સચ્છિકતં, નો ચ વત રે વત્તબ્બે – ‘‘અત્થિ અરહતો અસુચિ સુક્કવિસ્સટ્ઠી’’તિ.

૩૧૨. અત્થિ અરહતો અસુચિ સુક્કવિસ્સટ્ઠીતિ? સધમ્મકુસલસ્સ અરહતો અત્થિ અસુચિ સુક્કવિસ્સટ્ઠિ, પરધમ્મકુસલસ્સ અરહતો નત્થિ અસુચિ સુક્કવિસ્સટ્ઠીતિ. સધમ્મકુસલસ્સ અરહતો અત્થિ અસુચિ સુક્કવિસ્સટ્ઠીતિ? આમન્તા. પરધમ્મકુસલસ્સ અરહતો અત્થિ અસુચિ સુક્કવિસ્સટ્ઠીતિ? ન હેવં વત્તબ્બે…પે….

પરધમ્મકુસલસ્સ અરહતો નત્થિ અસુચિ સુક્કવિસ્સટ્ઠીતિ? આમન્તા. સધમ્મકુસલસ્સ અરહતો નત્થિ અસુચિ સુક્કવિસ્સટ્ઠીતિ? ન હેવં વત્તબ્બે…પે….

સધમ્મકુસલસ્સ અરહતો રાગો પહીનો, અત્થિ તસ્સ અસુચિ સુક્કવિસ્સટ્ઠીતિ? આમન્તા. પરધમ્મકુસલસ્સ અરહતો રાગો પહીનો, અત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

સધમ્મકુસલસ્સ અરહતો દોસો પહીનો…પે… મોહો પહીનો…પે… અનોત્તપ્પં પહીનં, અત્થિ તસ્સ અસુચિ સુક્કવિસ્સટ્ઠીતિ? આમન્તા. પરધમ્મકુસલસ્સ અરહતો અનોત્તપ્પં પહીનં, અત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

સધમ્મકુસલસ્સ અરહતો રાગપ્પહાનાય મગ્ગો ભાવિતો…પે… બોજ્ઝઙ્ગા ભાવિતા…પે… દોસપ્પહાનાય…પે… મોહપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, અત્થિ તસ્સ અસુચિ સુક્કવિસ્સટ્ઠીતિ? આમન્તા. પરધમ્મકુસલસ્સ અરહતો અનોત્તપ્પપહાનાય બોજ્ઝઙ્ગા ભાવિતા, અત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

સધમ્મકુસલો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, અત્થિ તસ્સ અસુચિ સુક્કવિસ્સટ્ઠીતિ? આમન્તા. પરધમ્મકુસલો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, અત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

પરધમ્મકુસલસ્સ અરહતો રાગો પહીનો, નત્થિ તસ્સ અસુચિ સુક્કવિસ્સટ્ઠીતિ? આમન્તા. સધમ્મકુસલસ્સ અરહતો રાગો પહીનો, નત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

પરધમ્મકુસલસ્સ અરહતો દોસો પહીનો…પે… મોહો પહીનો…પે… અનોત્તપ્પં પહીનં, નત્થિ તસ્સ અસુચિ સુક્કવિસ્સટ્ઠીતિ? આમન્તા. સધમ્મકુસલસ્સ અરહતો અનોત્તપ્પં પહીનં, નત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

પરધમ્મકુસલસ્સ અરહતો રાગપ્પહાનાય મગ્ગો ભાવિતો…પે… બોજ્ઝઙ્ગા ભાવિતા…પે… દોસપ્પહાનાય…પે… મોહપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, નત્થિ તસ્સ અસુચિ સુક્કવિસ્સટ્ઠીતિ? આમન્તા. સધમ્મકુસલસ્સ અરહતો અનોત્તપ્પપહાનાય બોજ્ઝઙ્ગા ભાવિતા, નત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

પરધમ્મકુસલો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, નત્થિ તસ્સ અસુચિ સુક્કવિસ્સટ્ઠીતિ? આમન્તા. સધમ્મકુસલો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, નત્થિ તસ્સ અસુચિ સુક્કવિસ્સટ્ઠીતિ? ન હેવં વત્તબ્બે…પે….

૩૧૩. અત્થિ અરહતો અસુચિ સુક્કવિસ્સટ્ઠીતિ? આમન્તા. નનુ વુત્તં ભગવતા – ‘‘યે તે [યે કેચિ (સી.)], ભિક્ખવે, ભિક્ખૂ પુથુજ્જના સીલસમ્પન્ના સતા સમ્પજાના નિદ્દં ઓક્કમન્તિ, તેસં અસુચિ ન મુચ્ચતિ. યેપિ તે, ભિક્ખવે, બાહિરકા ઇસયો કામેસુ વીતરાગા, તેસમ્પિ અસુચિ ન મુચ્ચતિ. અટ્ઠાનમેતં, ભિક્ખવે, અનવકાસો યં અરહતો અસુચિ મુચ્ચેય્યા’’તિ [મહાવ. ૩૫૩ અત્થતો સમાનં; અ. નિ. ૫.૨૧૦ પસ્સિતબ્બં]. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અત્થિ અરહતો અસુચિ સુક્કવિસ્સટ્ઠી’’તિ.

ન વત્તબ્બં – ‘‘અત્થિ અરહતો પરૂપહારો’’તિ? આમન્તા. નનુ અરહતો ચીવરપિણ્ડપાતસેનાસનગિલાનપચ્ચયભેસજ્જપરિક્ખારં પરે ઉપસંહરેય્યુન્તિ? આમન્તા. હઞ્ચિ અરહતો ચીવરપિણ્ડપાતસેનાસનગિલાનપચ્ચયભેસજ્જપરિક્ખારં પરે ઉપસંહરેય્યું, તેન વત રે વત્તબ્બે – ‘‘અત્થિ અરહતો પરૂપહારો’’તિ.

અરહતો ચીવરપિણ્ડપાતસેનાસનગિલાનપચ્ચયભેસજ્જપરિક્ખારં પરે ઉપસંહરેય્યુન્તિ, અત્થિ અરહતો પરૂપહારોતિ? આમન્તા. અરહતો સોતાપત્તિફલં વા સકદાગામિફલં વા અનાગામિફલં વા અરહત્તં વા પરે ઉપસંહરેય્યુન્તિ? ન હેવં વત્તબ્બે…પે….

પરૂપહારકથા નિટ્ઠિતા.