૧૦. પઞ્ઞત્તાનુયોગો

૬૧. રૂપધાતુયા રૂપી પુગ્ગલોતિ? આમન્તા. કામધાતુયા કામી પુગ્ગલોતિ? ન હેવં વત્તબ્બે…પે….

૬૨. રૂપધાતુયા રૂપિનો સત્તાતિ? આમન્તા. કામધાતુયા કામિનો સત્તાતિ? ન હેવં વત્તબ્બે…પે….

૬૩. અરૂપધાતુયા અરૂપી પુગ્ગલોતિ? આમન્તા. કામધાતુયા કામી પુગ્ગલોતિ? ન હેવં વત્તબ્બે…પે….

૬૪. અરૂપધાતુયા અરૂપિનો સત્તાતિ? આમન્તા. કામધાતુયા કામિનો સત્તાતિ? ન હેવં વત્તબ્બે…પે….

૬૫. રૂપધાતુયા રૂપી પુગ્ગલો અરૂપધાતુયા અરૂપી પુગ્ગલો, અત્થિ ચ કોચિ રૂપધાતુયા ચુતો અરૂપધાતું ઉપપજ્જતીતિ? આમન્તા. રૂપી પુગ્ગલો ઉપચ્છિન્નો, અરૂપી પુગ્ગલો જાતોતિ? ન હેવં વત્તબ્બે…પે….

૬૬. રૂપધાતુયા રૂપિનો સત્તા અરૂપધાતુયા અરૂપિનો સત્તા, અત્થિ ચ કોચિ રૂપધાતુયા ચુતો અરૂપધાતું ઉપપજ્જતીતિ? આમન્તા. રૂપી સત્તો ઉપચ્છિન્નો, અરૂપી સત્તો જાતોતિ? ન હેવં વત્તબ્બે…પે….

૬૭. કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતેતિ? આમન્તા. પુગ્ગલોતિ વા જીવોતિ વા, જીવોતિ વા પુગ્ગલોતિ વા, પુગ્ગલં અપ્પિયં કરિત્વા એસેસે એકટ્ઠે સમે સમભાગે તજ્જાતેતિ? આમન્તા. અઞ્ઞો કાયો, અઞ્ઞો પુગ્ગલોતિ? આમન્તા. અઞ્ઞં જીવં, અઞ્ઞં સરીરન્તિ? ન હેવં વત્તબ્બે.

આજાનાહિ નિગ્ગહં. હઞ્ચિ કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, પુગ્ગલોતિ વા જીવોતિ વા, જીવોતિ વા પુગ્ગલોતિ વા, પુગ્ગલં અપ્પિયં કરિત્વા એસેસે એકટ્ઠે સમે સમભાગે તજ્જાતે, અઞ્ઞો કાયો અઞ્ઞો પુગ્ગલો; તેન વત રે વત્તબ્બે – ‘‘અઞ્ઞં જીવં અઞ્ઞં સરીર’’ન્તિ. યં તત્થ વદેસિ – ‘‘વત્તબ્બે ખો – ‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, પુગ્ગલોતિ વા જીવોતિ વા, જીવોતિ વા પુગ્ગલોતિ વા, પુગ્ગલં અપ્પિયં કરિત્વા એસેસે એકટ્ઠે સમે સમભાગે તજ્જાતે, અઞ્ઞો કાયો અઞ્ઞો પુગ્ગલો,’ નો ચ વત્તબ્બે – ‘અઞ્ઞં જીવં અઞ્ઞં સરીર’’’ન્તિ મિચ્છા.

નો ચે પન વત્તબ્બે – ‘‘અઞ્ઞં જીવં અઞ્ઞં સરીર’’ન્તિ, નો ચ વત રે વત્તબ્બે – ‘‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, પુગ્ગલોતિ વા જીવોતિ વા, જીવોતિ વા પુગ્ગલોતિ વા, પુગ્ગલં અપ્પિયં કરિત્વા એસેસે એકટ્ઠે સમે સમભાગે તજ્જાતે, અઞ્ઞો કાયો અઞ્ઞો પુગ્ગલો’’તિ. યં તત્થ વદેસિ – ‘‘વત્તબ્બે ખો – ‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, પુગ્ગલોતિ વા જીવોતિ વા, જીવોતિ વા પુગ્ગલોતિ વા, પુગ્ગલં અપ્પિયં કરિત્વા એસેસે એકટ્ઠે સમે સમભાગે તજ્જાતે, અઞ્ઞો કાયો અઞ્ઞો પુગ્ગલો’, નો ચ વત્તબ્બે – ‘અઞ્ઞં જીવં અઞ્ઞં સરીર’’’ન્તિ મિચ્છા…પે….

૬૮. કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતેતિ? આમન્તા. વુત્તં ભગવતા – ‘‘અત્થિ પુગ્ગલો અત્તહિતાય પટિપન્નો’’તિ? આમન્તા. અઞ્ઞો કાયો અઞ્ઞો પુગ્ગલોતિ? ન હેવં વત્તબ્બે.

આજાનાહિ પટિકમ્મં. હઞ્ચિ કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, વુત્તં ભગવતા – ‘‘અત્થિ પુગ્ગલો અત્તહિતાય પટિપન્નો,’’ તેન વત રે વત્તબ્બે – ‘‘અઞ્ઞો કાયો અઞ્ઞો પુગ્ગલો’’તિ. યં તત્થ વદેસિ – ‘‘વત્તબ્બે ખો – ‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, વુત્તં ભગવતા – અત્થિ પુગ્ગલો અત્તહિતાય પટિપન્નો,’ નો ચ વત્તબ્બે – ‘અઞ્ઞો કાયો અઞ્ઞો પુગ્ગલો’’’તિ મિચ્છા.

નો ચે પન વત્તબ્બે – ‘‘અઞ્ઞો કાયો અઞ્ઞો પુગ્ગલો’’તિ, નો ચ વત રે વત્તબ્બે – ‘‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, વુત્તં ભગવતા – ‘અત્થિ પુગ્ગલો અત્તહિતાય પટિપન્નો’’’તિ. યં તત્થ વદેસિ – ‘‘વત્તબ્બે ખો – ‘કાયોતિ વા સરીરન્તિ વા, સરીરન્તિ વા કાયોતિ વા, કાયં અપ્પિયં કરિત્વા એસેસે એકટ્ઠે સમે સમભાગે તજ્જાતે, વુત્તં ભગવતા – અત્થિ પુગ્ગલો અત્તહિતાય પટિપન્નો,’ નો ચ વત્તબ્બે – ‘અઞ્ઞો કાયો અઞ્ઞો પુગ્ગલો’’’તિ મિચ્છા. (સંખિત્તં)

પઞ્ઞત્તાનુયોગો.