૬. છપ્પચ્ચયવિભાગ-છટ્ઠપરિચ્છેદ

૧૨૯. પત્થારે સબ્બગે પાદે, પુબ્બગા’ધો લ્પ’રે સમા;

પુબ્બે ગરુ તે ચ મિમે, કત્તબ્બા યાવ સબ્બલા.

૧૩૦. નટ્ઠસ્સ યો ભવેય્ય’ઙ્કો, તસ્મિં લો’દ્ધિકતે સમે;

વિસમે ત્વે’કસહિતે, ભવેય્ય’દ્ધિકતે ગરુ.

૧૩૧. એકા’દિનુક્કમેન’ઙ્કે, પુબ્બાધો દ્વિગુણે લિખે;

મિસ્સકેહિ લહુટ્ઠેહિ, સે’કેહુ’દ્દિટ્ઠકં ભવે.

૧૩૨. વુત્ત’ક્ખર સમા સઙ્ખ્યા, લિક્ખ્ય સેકો’પરૂ’પરિ;

એકેકહીન મેકાદિ, નુ’ટ્ઠાને સબ્બગાદિકં.

૧૩૩. ગરુક્રિયા’ઙ્ક સન્દોહે, ભવે સઙ્ખ્યા વિમિસ્સિતે;

ઉદ્દિટ્ઠ’ઙ્ક સમાહારો, સે’કો વે’મં સમા’નયે.

૧૩૪. સઙ્ખ્યેવ દ્વિગુણે’કૂના, વિત્થારા’યામસમ્ભવા;

વુત્તસ્સ’દ્ધ’ન્તરાનઞ્ચ, ગરુલાનઞ્ચ અઙ્ગુલં.

ઇતિ વુત્તોદયે છન્દસિ છપ્પચ્ચયવિભાગો નામ

છટ્ઠો પરિચ્છેદો.

૧૩૫. સેલ’ન્તરા’યતન વાસિક સીલ’ત્થેર,

પાદો ગરુ ગ્ગુણગરુ જ્જયતં મમે’સો;

યસ્સ પ્પભાવ’મવલમ્બ મયે’દિસોપિ,

સમ્પાદિતો’ભિમત સિદ્ધિકરો પરત્થો.

૧૩૬. પરત્થ સમ્પાદનતો, પુઞ્ઞેના’ધિગતેન’હં;

પરત્થ સમ્પાદનકો, ભવેય્યં જાતિ જાતિયં.

૧૩૭. અવલોકિત મત્તેન, યથા છપ્પચ્ચયા મયા;

સાધિતા સાધયન્તે’વ, મિચ્છિતત્થમ્પિ પાણિનોતિ.

ઇતિ સઙ્ઘરક્ખિતમહાસામિત્થેરેન વિરચિતં

વુત્તોદયપ્પકરણં પરિનિટ્ઠિતં.