તેલકટાહગાથા |ઓ૦.૦૦૦૧|

નમો તસ્સ ભગવતો અરહતો સમ્માસમ્બુદ્ધસ્સ

૧. લંકિસ્સરો જયતુ વારણરાજગામી

ભોગિન્દભોગ રુચિરાયત પીણ બાહુ,

સાધુપચારનિરતો ગુણસન્નિવાસો

ધમ્મે ઠિતો વીગતકોધમદાવલેપો;

૨. યો સબ્બલોકમહિતો કરુણાધિવાસો

મોક્ખાકરો રવિકુલમ્બર પુણ્ણ ચન્દો,

ઞેય્યોદધિં સુવિપુલં સકલં વિબુદ્ધો

લોકુત્તમં નમથ તં સિરસા મુનિન્દં;

૩. સોપાનમાલમમલં તિદસાલયસ્સ

સંસાર સાગરસમુત્તરણાય સેતું,

સબ્બાગતીભય વિવજ્જિત ખેમ મગ્ગં

ધમ્મં નમસ્સથ સદા મુનિના પણીતં;

૪. |ઓ૦.૦૦૦૨|

દેય્યં તદપ્પમપિ યત્થ પસન્ન ચિત્તા

દત્વા નરા ફલમુળારતરં લભન્તે,

તં સબ્બદા દસબલેનપિ સુપ્પસત્થં

સઙ્ઘં નમસ્સથ સદામિતપુઞ્ઞખેત્તં;

૫. તેજો બલેન મહતા રતનત્તયસ્સ

લોકત્તયં સમધિગચ્છતિ યેન મોક્ખં,

રક્ખા ન ચત્થિ ચ સમા રતનત્તયસ્સ

તસ્મા સદા ભજથ તં રતનત્તયં ભો;

૬. લંકિસ્સરો પરહિતેકરતો નિરાસો

રત્તિમ્પિ જાગરરતો કરુણાધિવાસો,

લોકં વિબોધયતિ લોકહિતાય કામં

ધમ્મં સમાચરથ જાગરિયાનુયુત્તા;

૭. |ઓ૦.૦૦૦૩|

સત્તોપકાર નિરતા કુસલે સહાયા

ભો દુલ્લભા ભુવિ નરા વિહતપ્પમાદા,

લંકાધિપં ગુણધનં કુસલે સહાયં

આગમ્મ સંચરથ ધમ્મમલં પમાદં;

૮. ધમ્મો તિલોક સરણો પરમો રસાનં

ધમ્મો મહગ્ઘરતનો રતનેસુ લોકે,

ધમ્મો ભવે તિભવદુક્ખ વિનાસહેતુ

ધમ્મં સમાચરથ જાગરિયાનુયુત્તા;

૯. નિદ્દં વિનોદયથ ભાવયથપ્પમેય્યં

દુક્ખં અનિચ્ચમ્પિ ચેહ અનત્તતઞ્ચ,

દેહે રતિં જહથ જ જજ્જરભાજનાભો

ધમ્મં સમાચરથ જાગરિયાનુયુત્તા;

૧૦. |ઓ૦.૦૦૦૪|

ઓકાસ મજ્જ મમ નત્થિ સુવે કરિસ્સં

ધમ્મં ઇતીહલસતા કુસલપ્પયોગે,

ના’લં તિયદ્ધસુ તથા ભુવનત્તયે ચ

કામં ન ચત્થિ મનુજો મરણા પમુત્તો;

૧૧. ખિત્તો યથા નભસિ કેનચિદેવ લેડ્ડુ

ભૂમિં સમાપત્તિ ભારતયા ખણેન,

જાતત્તમેવ ખલુ કારણમેકમત્ર

લોકં સદા નનુ ધુવં મરણાય ગન્તું;

૧૨. કામં નરસ્સ પતતો ગિરિમુદ્ધનાતો

મજ્ઝે ન કિઞ્ચિ ભયનિસ્સરણાય હેતુ,

કામં વજન્તિ મરણં તિભવેસુ સત્તા

ભોગે રતિં પજહથાપિ ચ જીવિતે ચ;

૧૩. |ઓ૦.૦૦૦૫|

કામં પતન્તિ મહિયા ખલુ વસ્સધારા

વિજ્જુલ્લતા વિતતમેઘ મુખા પમુત્તા,

એવં નરા મરણભીમ પપાતમજ્ઝે

કામં પતન્તિ નહિ કોચિ ભવેસુ નિચ્ચો;

૧૪. વેલાતટે પટુતરોરુ તરંગમાલા

નાસં વજન્તિ સતતં સલિલાલયસ્સ,

નાસં તથા સમુપયન્તિ નરામરાનં

પાણાનિ દારુણતરે મરણોદધિમ્હિ;

૧૫. રુદ્ધોપિ સો રથવરસ્સગજાધિપેહિ

યોધેહિ ચાપિ સબલેહિ ચ સાયુધેહિ,

લોકં વિવંચિય સદા મરણૂસભો સો

કામં નિહન્તિ ભુવનત્તય સાલિ દણ્ડં;

૧૬. |ઓ૦.૦૦૦૬|

ભો મારુતેન મહતા વિહતો પદીપો

ખિપ્પં વિનાસ મુખમેતિ મહપ્પભોપિ,

લોકે તથા મરણચણ્ડ સમીરણેન

ખિપ્પં વિનસ્સતિ નરાયુમહા પદીપો;

૧૭. રામજ્જુનપ્પભૂતિ ભૂપતિ પુંગવા ચ

સૂરા પુરે રણમુખે વિજિતારિ સઙ્ઘા,

તેપીહ ચણ્ડ મરણોઘ નિમુગ્ગદેહા

નાસં ગતા જગતિ કે મરણા પમુત્તા?

૧૮. લક્ખી ચ સાગરપટા સધરાધરા ચ

સમ્પત્તિયો ચ વિવિધા અપિ રૂપસોભા,

સબ્બા ચ તા અપિ ચ મિત્તસુતા ચ દારા

કે ચાપિ કં અનુગતા મરણં વજન્તં?

૧૯. |ઓ૦.૦૦૦૭|

બ્રહ્માસુરાસુરગણા ચ મહાનુભાવા

ગન્ધબ્બકિન્નરમહોરગરક્ખસા ચ,

તે ચા પરે ચ મરણગ્ગિસિખાય સબ્બે

અન્તે પતન્તિ સલભા ઇવ ખીણપુઞ્ઞા;

૨૦. યે સારિપુત્તપમુખા મુનિસાવકા ચ

સુદ્ધા સદાસવનુદા પરમિદ્ધિપત્તા,

તે ચાપિ મચ્ચુવળભા મુખ સન્નિમુગ્ગા

દીપાનિવાનલહતા ખયતં ઉપેતા;

૨૧. બુદ્ધાપિ બુદ્ધકમલામલચારુનેત્તા

બત્તિંસલક્ખણ વિરાજિત રૂપસોભા,

સબ્બાસચક્ખયકરાપિ ચ લોકનાથા

સમ્મદ્દિતા મરણમત્તમહાગજેન;

૨૨. |ઓ૦.૦૦૦૮|

રોગાતુરેસુ કરુણા ન જરાતુરેસુ

ખિડ્ડાપરેસુ સુકુમારકુમારકેસુ,

લોકં સદા હનતિ મચ્ચુ મહાગજિન્દો

દવાનલો વનમિવાવરતં અસેસં;

૨૩. આપુણ્ણતા ન સલિલે ન જલાસયસ્સ

કટ્ઠસ્સ ચાપિ બહુતા ન હુતાસનસ્સ,

ભુત્વાન સો તિભૂવનમ્પિ તથા અસેસં

ભો નિદ્દયો ન ખલુ પીતિમુપેતિ મચ્ચુ;

૨૪. ભો મોહ મોહિતતયા વિવસો અધઞ્ઞો

લોકો પતત્યપિપિ મચ્ચુમુખે સુભીમે,

ભોગે રતિં સમુપયાતિ નિહીનપઞ્ઞો

દોલા તરઙ્ગચપલે સુપિનોપમેય્યે;

૨૫. |ઓ૦.૦૦૦૯|

એકોપિ મચ્ચુરભિહન્તુમલં તિલોકં

કિં નિદ્દયા અપિ જરામરણાનુયાયી,

કો વા કરેય્ય વિભસુવેસુ ચ જીવિતાસં

જાતો નરો સુપિન સંગમ સન્નિભેસુ;

૨૬. નિચ્ચાતુરં જગદિદં સભયં સસોકં

દિસ્વા ચ કોધમદમોહજરાભિભૂતં,

ઉબ્બેગમત્તમપિ યસ્સ ન વિજ્જતી ચે

સો દારુણોન મરણં વત તં ધિરત્થુ!

ભો ભો ન પસ્સથ જરાસિધરઞ્હિ મચ્ચુ

માહઞ્ઞમાનમખિલં સતતં તિલોકં,

કિં નિદ્દયા નયથ વીતભયા તિયામં

ધમ્મં સદા’સવનુદં ચરથ’પ્પમત્તા;

૨૮. |ઓ૦.૦૦૧૦|

ભાવેથ ભો મરણમારવિવજ્જનાય

લોકે સદા મરણ સઞ્ઞમિમં યતત્તા,

એવઞ્હિ ભાવનરતસ્સ નરસ્સ તસ્સ

તણ્હા પહીયતિ સરીરગતા અસેસા;

૨૯. રૂપં જરા પિયતરં મલિનીકરોતિ

સબ્બં બલં હરતિ અત્તનિ ઘોરરોગો,

નાનૂપભોગ પરિરક્ખિત મત્તભાવં

ભો મચ્ચુ સંહરતિ કિં ફલમત્તભાવે?

૩૦. કમ્માનિલાપહતરોગતરંગભંગે

સંસાર સાગર મુખે વિતતે વિપન્ના,

મા માપમાદમકરિત્થ કરોથ મોક્ખં

દુક્ખોદયો નનુ પમાદમયં નરાનં;

૩૧. |ઓ૦.૦૦૧૧|

ભોગા ચ મિત્તસુતપોરિસ બન્ધવા ચ

નારી ચ જીવિતસમા અપિ ખેત્તવત્થુ,

સબ્બાનિ તાનિ પરલોકમિતો વજન્તં

નાનુબ્બજન્તિ કુસલાકુસલંવ લોકે;

૩૨. ભો વિજ્જુચંચલતરે ભવસાગરમ્હિ

ખિત્તા પુરા કતમહાપવનેન તેન,

કામં વિભિજ્જતિ ખણેન સરીરનાવા

હત્થે કરોથ પરમં ગુણહત્થસારં;

૩૩. નિચ્ચં વિભિજ્જતિહ આમક ભાજનંવ

સંરક્ખિતોપિ બહુધા ઇહ અત્તભાવો,

ધમ્મં સમાચરથ સગ્ગપતિપ્પતિટ્ઠં

ધમ્મો સુચિણ્ણમિહમેવ ફલં દદાતિ;

૩૪. |ઓ૦.૦૦૧૨|

રન્ત્વા સદા પિયતરે દિવિ દેવરજ્જે

નમ્હા ચવન્તિ વિબુધા અપિ ખીણપુઞ્ઞા,

સબ્બં સુખં દિવિ ભુવીહ વિયોગનિટ્ઠં

કો પઞ્ઞવા ભવસુખેસુ રતિં કરેય્ય?

૩૫. બુદ્ધો સસાવકગણો જગદેકનાથો