૪૦. કુણ્ડલિયા વત્થુમ્હિ અયમાનુપુબ્બીકથા

લઙ્કાદીપે રોહણજપદે મહાગામો નામ અહોસિ, તત્થ તિસ્સવિહારં નામ અનેકસતભિક્ખૂહિ સમાકિણ્ણં અનેકપરિવેણપતિમણ્ડિતં વિહારં અહોસિ. તત્થેકો તિસ્સો નામ સામણેરો પટિવસતિ. સો એકસ્મિંસમયે જનપદચારિકં ચરન્તો પાસાણવાપિગામે ભિક્ખં ચરિત્વા યાપનમત્તં ભત્તં સપ્પિના સદ્ધિં લભિત્વા નિક્ખમ્મ ગામદ્વારં પત્વા મહાગામાભિમુખો ગચ્છન્તો મનુસ્સે ઉદકફાસુકટ્ઠાનં પુચ્છિ. તેહિ ભન્તે તુમ્હાકં અભિમુખે અવિદૂરટ્ઠાને કકુબન્દકન્દરં નામ સન્દમાનસીતલોદકં ધવલવાલુકાતલં તત્થ તુમ્હે ગન્ત્વા નહાત્વા સીતલચ્છાયાય વાલુકાતલે નિસિન્નો ભત્તકિચ્ચં કત્વા ગચ્છથાતિ વુત્તે સામણેરો સાધૂતિ વત્વા તત્થ ગન્ત્વા ફાસુકટ્ઠાને નિસિન્નો ભત્તં ભુઞ્જિતુમારભિ. તદા એકેન વનકમ્મિકેન સદ્ધિંઅરઞ્ઞં ગતા એકા સુનખી તસ્મિં કન્દરે એકસ્મિં પબ્ભારટ્ઠાને દારકે વિજાયિત્વા છાતજ્ઝત્તા પવેધમાનગત્તા દારકાનં સમીપેનિપન્ના સામણેરસ્સ પત્તે આહારગન્ધં ઘાયિત્વા નિપન્નટ્ઠાનતો વુટ્ઠાય પવેધમાના તસ્સ સમીપં આગમ્મ નઙ્ગુટ્ઠં ચાલેન્તી અટ્ઠાસિ, સામણેરો તં દિસ્વા કમ્પિતમાનસો અત્તનો ભોજનત્થાય વટ્ટિતં પથમાલોપં તસ્સા પુરતો ઠપેસિ, તતો સા સોમનસ્સા તં ભુઞ્જિ. તં દિસ્વા તુટ્ઠો પુનપ્પુનં આલોપં કરોન્તો તસ્સા ભત્તં દત્વા પત્તં ધોવિત્વા થવિકાય પક્ખિપિત્વા અગમાસિ. તતો સા સુનખી સામણેરગતેન પસાદેન તતો ચુતા જમ્બુદીપે દેવપુત્તનગરે રાજાનં પટિચ્ચ તસ્સ મહેસિયા કુચ્છિમ્હિ પટિસન્ધિં ગણ્હિત્વા દસમાસચ્ચયેન માતુકુચ્છિતો નિક્ખમિ, અથસ્સા સિખામઙ્ગલદિવસે સમ્પત્તે માતાપિતરો પનસ્સા કુણ્ડલાવટ્ટકેસત્તા કુણ્ડલાતિ નામ મકંસુ. સા અનુક્કમેન સોળસવસ્સુદ્દેસિકા અહોસિ, તસ્મિં કિર સમયે તિસ્સો સામણેરો મહાબોધિં વન્દિસ્સામીતિ નાવં અભિરુય્હ જમ્બુદીપં ગન્ત્વા અનુપુબ્બેન દેવપુત્તનગરં પત્વા સુનિવત્થો સુપારુતો યુગમત્તદસો ભિક્ખાય ચરન્તો મહાવીથિં સમ્પાપુણિ. રાજધીતા સીહપઞ્જરં ઉગ્ઘાટેત્વા અન્તરવીથિં ઓલોકેન્તી ભિક્ખન્તં સામણેરં દિસ્વા પુબ્બસિનેહં પટિલભિ, તસ્મિંખણે તસ્સા જાતિસ્સરઞાણં અહોસિ. સા કિર પુબ્બે ભિક્ખુણી હુત્વા પણ્ણસૂચિયા સદ્ધિં પોત્થકઞ્ચ પદીપિયતેલઞ્ચ દત્વા જાતિસ્સરા ભવેય્યંતિ પત્થનં ઠપેસિ, તતો સાજાતિં અનુસ્સરન્તી સામણેરેન અત્તનો કતૂપકારં દિત્વા સોમનસ્સા નં પક્કોસાપેત્વા રાજગેહે આસનં પઞ્ઞાપેત્વા તત્થ નિસિન્નં નાનગ્ગરસ ભોજનેન પરિવિસિત્વા ઓનીતપત્તપાણિં સામણેરં ઉપસઙ્કમિત્વા વન્દિત્વા એકમન્તં નિસિન્ના તેન સદ્ધિં સલ્લપન્તી એવમાહ.

૧. ન સઞ્જાનાસિ મં ધીર, પુબ્બેહં તવ દાસિકા;

તેનાહં સુખિતા આસિં, તસ્મા ત્વમસિ ઇસ્સરોતિ.

તં સુત્વા સામણેરો આહ.

૨. નત્થિ મે તાદિસી દાસી, ન સઞ્જાનામિ તં અહં;

કાસિ ત્વં કસ્સ વા ધીતા, તં મે અક્ખાહિ પુચ્છિતાતિ.

તતો સા તં સારાપેન્તી આહ.

૩. સારાપેમિ તુવં અજ્જ, યથા જાનાસિમં ઇસે;

બુજ્ઝસ્સુ બોધિતો દાનિ, મયા જાતિંસરન્તિયા.

૪. પાસાણવાપિગામમ્હિ, તમ્બપણ્ણિમ્હિ રોહણે;

ભિક્ખિત્વાન તુવં ભન્તે, યદા કકુબન્દકન્દરે.

૫. નિસીદિત્વાન ત્વં ભત્તં, ભુત્તકાલં સરિસ્સસિ;

તદાહં સુનખી આસિં, વિજાતા લદ્ધગોચરા.

૬. દારકે ખાદિતું મય્હ, માસન્ના ખુદપીળિતા;

પવેધમાનસબ્બઙ્ગા, અટ્ઠાસિં તવ સન્તિકે.

૭. દિસ્વા તં મં તદા ભન્તે, વેધમાનં બુભુક્ખિતં;

છિન્નભત્તો તુવં હુત્વા, મમં ભત્તેન તોસયી.

૮. તદાહં મુદુચિત્તેન, ચિત્તં તયિ પસાદયિં;

તેનાહં પુઞ્ઞકમ્મેન, દુતિયે અત્તસમ્ભવે.

૯. ઇધ રાજકુલે જાતા, સબ્બકામસમિદ્ધિની;

ચિત્તપ્પસાદમત્તેન, લોકનાથસ્સ સાસને.

૧૦. તદહુપબ્બજિતસ્સાપિ, ઈદિસા હોન્તિ સમ્પદા;

કીદિસં હોતિ સમ્બુદ્ધે, પસાદેન ફલં અહો.

૧૧. અઞ્ઞાનિ પન કિચ્ચાનિ, પહાયાત્તહિતે રતો;

અતન્દિતો દિવારત્તિં, સરાતુ રતનત્તયંતિ.

એવં સામણેરેન કતૂપકારં સારાપેત્વા ભન્તે તવ દાસિયા અનુગ્ગહં પટિચ્ચ ઇધેવ વસથાતિ નિમન્તિત્વા તેન સમ્પટિચ્છિતે મહન્તં વિહારં કારાપેત્વા સામણેરં આદિં કત્વા અનેકભિક્ખુસતે નિમન્તેત્વા વિહારે વસાપેત્વા સુલભં કત્વા ચતુપચ્ચયેહિ ઉપટ્ઠાસિ. સામણેરોપિ સુનખિયા દિન્નદાનં અનુસ્સરિત્વા તુટ્ઠો બુદ્ધાનુસ્સતિં મનસિકરોન્તો ન ચિરેનવ અરહત્તં પત્વા તસ્મિંયેવ વિહારે વસન્તો આયુપરિયોસાને તત્થેવ પરિનિબ્બાયીતિ.

૧૨. તિયદ્ધેસુ તિલોકસ્મિં, નત્થિ વત્થુત્તયં વિના;

સત્તાન મઞ્ઞ મિચ્છત્થ, દાયકં સુરપાદપં.

કુણ્ડલિયા વત્થું દસમં.

મહાસેનવગ્ગો ચતુત્થો.

એત્તાવતા જમ્બુદીપુપ્પત્તિકથા સમત્તા.