૩૩. કપણાય વત્થુમ્હિ અયમાનુપુબ્બીકથા

ભગવતિ પરિનિબ્બુતે જમ્બુદીપે તત્થ તત્થ ભિક્ખુભિક્ખુણિયો ચ ઉપાસકઉપાસિકાયો ચ જયમહાબોધિં વન્દિસ્સામીતિ યેભુય્યેન ગન્ત્વા વન્દન્તિ. અથા પરભાગે બહૂ ભિક્ખૂ સઙ્ગમ્મ મહાબોધિં વન્દનત્થાય ગચ્છન્તા અઞ્ઞતરસ્મિં ગામકે ભિક્ખાય ચરિત્વા આસનસાલં ગન્ત્વા કતભત્તકિચ્ચા થોકં વિસ્સમિંસુ, તદા તત્થ એકા કપણા દુગ્ગતિત્થી તથા નિસિન્નભિક્ખૂ દિસ્વા ઉપસઙ્કમિત્વા પઞ્ચપતિટ્ઠિતેન વન્દિત્વા એકમન્તે ઠિતા અય્યા કુહિં ગચ્છન્તીતિ પુચ્છિ. ભિક્ખૂ તં સુત્વા જયમહાબોધિસ્સ આનુભાવઞ્ચ તં વન્દનત્થાય અત્તાનં ગમનઞ્ચ કથેન્તા એવમાહંસુ.

૧. યત્થાસીનો જિનો જેસિ, સસેનં મકરદ્ધજં;

હન્ત્વા કિલેસસેનઞ્ચ, બુદ્ધો આસિ નિરુત્તરો.

૨. યં પૂજેસિ મહાવીરો, ઠિતો પદ મકોપયં;

સત્તરત્તિન્દિવં નેત્ત, નીલનીરજરંસિના.

૩. સુરાસુરનરાદીનં, નેત્તાલિ પાળિપાતના;

મેચકાકારપત્તેહિ, સિખણ્ડીવિય ભાતિ યો.

૪. સુરપાદપોવ સત્તાનં, યં તિટ્ઠતિ મહીતલે;

ઇહ લોકે પરત્તે ચ, દદન્તો ઇચ્છિતિચ્છિતં.

૫. યસ્સ પુરાણપણ્ણમ્પિ, પતિતં યો નરો ઇધ;

પૂજેતિ તસ્સ સો દેતિ, ભવભોગં મહીરુહો.

૬. ગન્ધમાલેહિ સલિલેહિ, યમુપાસતિ સદા નરો;

અજ્ઝત્તઞ્ચ બહિદ્ધા ચ, દુરિતં સો નિહઞ્ઞતિ.

૭. યો દેતિ ઇહલોકત્થં,

યો દેતિ પારલોકિકં,

સમ્પદં જયબોધિંતં,

ભોતિ ગચ્છામ વન્દિતું.

તં સુત્વા ઉદગ્ગા સોમનસ્સજાતા ભિક્ખૂનં એવમાહ. અહં ભન્તે પરકુલે ભતિયા કમ્મં કરોન્તી દુક્ખેન કસિરેન જીવિકં કપ્પેમિ. સ્વાતનાય મે તણ્ડુલનાલિપિ [ભણ્ડુલનામ્પ ઇતિસબ્બત્થ] નત્થિ, પગેવ અઞ્ઞં ધનં, ઇમં વિના અઞ્ઞં સાટકમ્પિ નત્થિ, કસ્મા પુબ્બે અકતપુઞ્ઞત્તા, તસ્મા ઇમં ભન્તે સાટકં મમાનુગ્ગહાય બોધિમ્હિ ધજં બન્ધથાતિ યાચિત્વા સાટકં ધોવિત્વા તેસં અદાસિ. ભિક્ખૂપિ તસ્સાનુગ્ગહાય તં ગહેત્વા અગમંસુ. સા સાટકં દત્વા પીતિપામોજ્જમાનસા ગેહં ગન્ત્વા તદહેવ રત્તિયા મજ્ઝિમયામે સત્થકવાતેન ઉપહતા કાલં કત્વા તેસં ભિક્ખૂનં ગમનમગ્ગે એકસ્મિં રમણીયે વનસણ્ડે ભુમ્મદેવતા હુત્વા નિબ્બત્તી, અથસ્સા પુઞ્ઞાનુભાવેન તિયોજનિકે ઠાને દિબ્બકપ્પરુક્ખા પાતુરહંસુ, તત્ત તત્ત નાનાવિરાગધજપતાકા ઓલમ્બન્તિ. દેવપુત્તા ચ દેવધીતરો ચ સબ્બાભરણવિભૂસિતા તથેવ ધજપતાકાદયો ગહેત્વા કીળન્તિ. નચ્ચગીતાદિનેકાનિ અચ્છરિયાનિ પયોજેન્તિ. અથ દુતિયદિવસે તેપિ ભિક્ખૂ બોધિમણ્ડલં ગચ્છન્તા સાયણ્હે તં ઠાનં પત્વા અજ્જ ઇમસ્મિં વનસણ્ડે વસિત્વા ગમિસ્સામાતિ તત્થ વાસં ઉપગમિંસુ, તતો તે રત્તિભાગે નાનાવણ્ણધજે ચ દેવતાહિ પયોજિયમાના ગીતવાદિતાદયો ચ તિયોજનટ્ઠાને કપ્પરુક્ખાનિ ચ ઇદં સબ્બં દેવિસ્સરિયં તસ્સાનુભાવેન નિબ્બત્તભાવં દિસ્વા વિમ્હિતમાનસા દેવધીતરં આમન્તેત્વા ત્વં કેન કમ્મેન ઇધ નિબ્બત્તાતિ પુચ્છિંસુ. સા ભિક્ખૂ વન્દિત્વા અઞ્જલિં પગ્ગય્હ ઠિતા ભન્તે મં ન સઞ્જાનિત્થાતિ આહ. ભિક્ખૂહિ ન મયં સઞ્જાનામ ભગિનીતિ વુત્તે સા અત્તનો સભાવં કથેન્તી એવમાહ.

૮. હીય્યો આસનસાલાય, નિસીદિત્થ સમાગતા;

તુમ્હકં સન્તિકં ગમ્મ, યા વરાકીભિવાદયિ.

૯. યા બોધિં પૂજનત્થાય, વત્થકં પટિપાદયિ;

સાહં હીય્યો ચુતા આસિં, રત્તિયં બ્યાધિપીળિતા.

૧૦. નાનાસમ્પત્તિસંયુત્તા, નાનાભૂસનભૂસિતા;

વિમાને રતના કિણ્ણે, જાતાહં એત્થ કાનને.

૧૧. હીય્યો પસ્સિત્થ મે ગત્તં, રજોજલ્લેહિ સંકુલં;

અજ્જ પસ્સથ મે ગત્તં, વણ્ણવન્તં પભસ્સરં.

૧૨. હીય્યો પસ્સિત્થ મે ભન્તે, નિવત્થં મલિનમ્બરં;

અજ્જ પસ્સથ મે ભન્તે, દિબ્બમમ્બરમુત્તમં.

૧૩. વિકિણ્ણફલિતગ્ગેહિ, કેસેહિ વિરલા કુલં;

ઊકાગૂથપટિક્કૂલં, હીય્યો આસિસિરં મમ.

૧૪. અજ્જ તં પરિવત્તિત્વા, મમ પુઞ્ઞાનુભાવતો;

સુનીલમુદુધમ્મિલ્લં, કુસુમા ભરણભૂસિતં.

૧૫. પુરા મે સકસીસેન, વહિતં દારૂ દકાદિકં;

પુઞ્ઞેનાહં અજ્જ માલા, ભારં સીસે સમુબ્બહે.

૧૬. ધજત્થાય મયા હીય્યો, પદિન્નં થૂલસાટકં;

અજ્જ નિબ્બત્તિ મે ભોન્તો, મહન્તં દિબ્બસમ્પદં.

૧૭. જાનમાનેન કત્તબ્બં, દાનાદીસુ મહપ્ફલં;

દેવલોકે મનુસ્સેસુ, સુખદં દાન મુત્તમન્તિ.

તં સુત્વા સબ્બે ભિક્ખૂ અચ્છરિયબ્ભુતચિત્તા અહેસું. સા દેવતા તસ્સા રત્તિયા અચ્ચયેન ભિક્ખૂ નિમન્તેત્વા દિબ્બેહિ ખજ્જભોજ્જેહિ સહત્થા સન્તપ્પેત્વા તેહિ સદ્ધિં આગચ્છન્તી અન્તરામગ્ગે દાનં દદમાના મહાબોધિં ગન્ત્વા સબ્બેહિ ધજપતાકા દીહિ ચ નાનાવિધવણ્ણગન્ધસમ્પન્નપુપ્ફેહિ ચ દીપધૂપેહિ ચ બોધિં પૂજેત્વા ભિક્ખૂનં ચીવરત્થાય દિબ્બવત્થાનિ દત્વા આગમ્મ તસ્મિંયેવ વનસણ્ડે વસન્તી નાનાવિધાનિ પુઞ્ઞાનિ કત્વા તાવતિંસભવને નિબ્બત્તિ. ભિક્ખૂપિ તં અચ્છરિયં તત્થ તત્થ પકાસેન્તા બહૂજને પુઞ્ઞકમ્મે નિયોજેસુંતિ.

૧૮. એવં વિધાપિ કપણા જિનસાસનમ્હિ,

કત્વા પસાદ મથ થૂલકુચેલકેન;

પૂજેત્વ દિબ્બવિભવં અલભીતિ ઞત્વા,

પૂજાપરા ભવથ વત્થુસુ તીસુ સમ્માતિ.

કપણાય વત્થું તતિયં.