૧૮. મરુત્તબ્રાહ્મણસ્સ વત્થુમ્હિ અયમાનુપુબ્બીકથા

જમ્બુદીપે ચન્દભાગા નામ ગઙ્ગાતીરે હોમગામં નામ અત્થિ. તસ્મિં એકો મરુત્તો નામ બ્રાહ્મણો પટિવસતિ. તદા સો વોહારત્થાય તક્કસીલં ગન્ત્વા ગેહં આગચ્છન્તો અન્તરામગ્ગે એકાય સાલાય કુટ્ઠરોગા તુરં સુનખં દિસ્વા તસ્મિં કારુઞ્ઞેન નીલવલ્લિતક્કમ્બિલેન મદ્દિત્વા પાયેસિ. સુનખો વૂપસન્તરોગો પાકતિકો હુત્વા બ્રાહ્મણેન અત્તનો કતૂપકારં સલ્લક્ખેન્તો તેનેવ સદ્ધિં અગમાસિ. અપરભાગે બ્રાહ્મણસ્સ ભરિયા ગબ્ભં પટિલભિ, પરિપુણ્ણગબ્ભાય તાય વિજાયનકાલે દારકો તિરિયમ્પતિત્વા અન્તોગબ્ભેયેવ મતો. તદા તં સત્થેન ખણ્ડાખણ્ડિકં છિન્દિત્વા નીહરિંસુ, અથ બ્રાહ્મણો તં દિસ્વા નિબ્બિન્દહદયો ઘરાવાસં પહાય ઇસિપબ્બજ્જં પબ્બજિત્વા અરઞ્ઞે વિહરતિ. અથસ્સ ભરિયા અઞ્ઞેન સદ્ધિં સંવસન્તી અયં મં પહાય પબ્બજિતોતિ બ્રાહ્મણે પદુટ્ઠચિત્તા ભો બ્રાહ્મણં મારેહીતિ સામિકેન સદ્ધિં મન્તેસિ. તેસં મન્તનં સુનખો સુત્વા બ્રાહ્મણેનેવ સદ્ધિં ચરતિ. અથેકદિવસં તસ્સા સામિકો તા પ સં મારેસ્સામીતિ ધનુ કલાપં ગહેત્વા નિક્ખમિ, તદા તાપસો ફલાફલત્થાય અરઞ્ઞં ગતો. સુ ન ખો અસ્સમેયેવ ઓ હી યિ. પુરિસો તાપસસ્સાગમનમગ્ગં ઓલોકેન્તો ગચ્છન્તરે નિલીનો અચ્છિ. સુનખો તસ્સ પમાદં ઓલોકેત્વા ધનુનો ગુણં ખાદિત્વા છિન્દિ. સો પુન ગુણં પાકતિકં કત્વા આરોપેસિ. એવં સો આરોપિતં આરોપિતં ખાદતેવ, અથ સો પાપપુરિસો તાપસસ્સાગમનં ઞત્વા તં મારેસ્સામીતિ ધનુના સદ્ધિં અગમાસિ. અથસ્સ સુનખો પાદે ડસિત્વા પાતેત્વા તસ્સ મુખં ખાદિત્વા દુબ્બલં કત્વા ભુઙ્કારમકાસિ, એવઞ્હિ સપ્પુરિસા અત્તનો ઉપકારકાનં પચ્ચુપકારં કરોન્તિ. વુત્તઞ્હિ.

૧. ઉપકારં કરોન્તો સો, સુનખો કતવેદિકો;

સત્તૂપઘાતકં કત્વા, ઇસિનો દાસિ જીવિતં.

૨. તિરચ્છાનાપિ જાનન્તિ, ગુણમત્તનિ કતં સદા;

ઇતિ ઉત્વાન મેધાવી, કતઞ્ઞૂ હોન્તુ પાણિનોતિ.

તતો તાપસો સુનખસ્સ સદ્દેના ગન્ત્વા તસ્સ તં વિપ્પકારં દિસ્વા કારુઞ્ઞેન પટિજિગ્ગિત્વા વૂપસન્તવણં બલપ્પત્તં પોસેત્વા તત્થેવ વસન્તો ઝાનાભિઞ્ઞં નિબ્બત્તેત્વા આયુપરિયોસાને બ્રાહ્મલોકપરાયણો અહોસીતિ.

૩. સુત્વાન સાધુ સુનખેન કતૂપકારં,

મેત્તિંદિસસ્સ પકતં ઇસિના ચ સુત્વા;

સમ્મા કરોથ કરુણઞ્ચ પરૂપકારં,

તં સબ્બદા ભવતિ વો ભવભોગહેતૂતિ.

મરુત્તબ્રાહ્મણસ્સ વત્થું અટ્ઠમં.