૭. વેસ્સામિત્તાય વત્થુમ્હિ અયમાનુપુબ્બીકથા

જમ્બુદીપે કિર કોસમ્બિનગરે કોસમ્બિરઞ્ઞો વેસ્સામિત્તાનામ અગ્ગમહેસી અહોસિ. તદા ભગવા કોસમ્બિયં પટિવસતિ મહતા ભિક્ખુસઙ્ઘેન સદ્ધિં ચારિકં ચરમાનો. તસ્મિં સમયે સા રઞ્ઞા સદ્ધિં વિહારં ગન્ત્વા અનોપમાય બુદ્ધલીળાય મધુરેન સરેન દેસેન્તસ્સ ભગવતો ધમ્મં સુત્વા પસન્ના સરણેસુ પતિટ્ઠાય બુદ્ધમામિકા હુત્વા વિહરતિ. અથા પરભાગે તસ્સ રઞ્ઞો રજ્જત્થાય પચ્ચન્તરાજા યુદ્ધસજ્જો રજ્જં વા દેતુ, યુદ્ધંવાતિ પણ્ણં પહિણિ. તં સુત્વા રાજા મહતિયા સેનાય પરિવુતો યુદ્ધભૂમિં ગચ્છન્તો મહેસિયા સદ્ધિં ગન્ત્વા ખન્ધાવારં નિવાસેત્વા તસ્સા એવમાહ. ભદ્દે સઙ્ગામસીસે જયપરાજયો નામ ન સક્કા વિઞ્ઞાતું. સચે મે પરાજયો અભવિસ્સ, પુરેતરમેવ રત્તપતાકં ઉસ્સાપેસ્સામિ, તેન અભિઞ્ઞાણેન ત્વં કોસમ્બિમેવ ગચ્છાહીતિ અનુસાસિત્વા સઙ્ગામ મણ્ડલં ગન્ત્વા મહારણં કરોન્તો અત્તનો પરાજયભાવં ઞત્વા માતુગામં સરિત્વા રત્તદ્ધજં ઉસ્સાપેત્વા યુજ્ઝન્તો રણે પતિ. અથ સા રત્તપતાકં દિસ્વા પરાજિતો નૂન મે સામિકોતિ ભયેન પલાયિતુમારભિ. અથ તં ચોરરઞ્ઞો મનુસ્સા દિસ્વા નૂનાયં રઞ્ઞો અગ્ગમહેસીતિ ઞત્વા અત્તનો રાજાનં દસ્સેસું, રાજા તં દિસ્વા પટિબદ્ધચિત્તો મમેતં અભિસેકં કરોથાતિ અમચ્ચે આણાપેસિ. અમચ્ચા તં અભિસેકત્થાય યાચિંસુ, સા ન મે ભણે અભિસેકેનત્થોતિ ન ઇચ્છિ. અમચ્ચા તમત્થં રઞ્ઞો આરોચેસું. રાજા નં પક્કોસાપેત્વા કસ્મા ન ઇચ્છસીતિ પુચ્છિ. સા એવમાહ.

૧. સુણોહિ સાધુકં દેવ, ભાસમાનાય મે વચો;

ભત્તા મય્હં મતો અજ્જ, સબ્બસમ્પત્તિદાયકો.

૨. કત્વાન સોભિસેકં મં, અત્તનો હદયં વિય;

પાલેતિ તં સરન્તસ્સા, સોકગ્ગિ દહતે મનં.

૩. મહારાજ સચઞ્ઞસ્સ, અસ્સ મગ્ગમહેસિકા;

તમ્હા દુક્ખા ન મુચ્ચામિ, તેનાહં તં ન પત્થયે.

૪. સોકગ્ગિના પદિત્તાહં, સોકે સોકં કથં ખિપે;

જલન્તગ્ગિમ્હી કો નામ, પલાલં પક્ખિપે બુધો.

૫. પિયવિપ્પયોગદુક્ખં, તં ચિન્તયન્તી પુનપ્પુનં;

તમ્હા દુક્ખા ન મુચ્ચામિ, તસ્માહં તં ન પત્થયેતિ.

તં સુત્વા રાજા કોધેનાભિભૂતો સચે નાભિસિઞ્ચિસ્સસિ, અગ્ગિમ્હિ તં પક્ખિપિસ્સામીતિ વત્વા મહન્તં દારુચિતકં કારાપેત્વા અગ્ગિં દત્વા એકપજ્જોતે જાતે એત્ત પવિસાતિ આહ. અથ સા યાચન્તી રાજાનં આહ.

૬. પાપો નિપ્પાપિનં રાજ, પાતનં ખલુ પાવકે;

હોતિ પાપફલં તસ્સ, પચ્ચત્તેચ પરત્થચ.

૭. પુરાતનેહિ ભૂપાલ, સમણબ્રહ્મણેસુચ;

માતાપિતુસુ બાલેસુ, રોગેના તુરઇત્થિસુ;

નપ્પસત્થો વધો દેવ, તસ્માહં ન વધારહાતિ.

તં સુત્વાપિ રાજા અસદ્દહન્તો મનુસ્સે આણાપેસિ. એતાય હત્થપાદે ગહેત્વા અગ્ગિમ્હિ પક્ખિપથાતિ તે તથા કરિંસુ, અથ સા અગ્ગિમ્હિ પક્ખિપમાના નત્થેત્થ મે કોચિ પટિસરણોતિ સરણમેવ સરણં કરોમીતિ ચિન્તેત્વા ‘‘બુદ્ધં સરણં ગચ્છામિ, ધમ્મં સરણં ગચ્છામિ, સઙ્ઘં સરણં ગચ્છામીતિ’’ વદન્તી મનસાચ અનુસ્સરન્તી અગ્ગિમ્હિ પતિ, તથાવિધોપિ અગ્ગિ તસ્સા સરીરે લોમકૂપમત્તમ્પિ ઉણ્હાકારં કાતું નાસક્ખિ. પદુમગબ્ભં પવિટ્ઠા વિય સીતિભૂતસરીરા અહોસિ. રાજા તં અચ્છરિયં દિસ્વા સંવિગ્ગો લોમહટ્ઠજાતો વેગેન તં ઉપસઙ્કમિત્વા ઉભોહિ હત્થેહિ પગ્ગય્હ ઉરે નિપજ્જાપેત્વા રાજાસને નિસીદાપેત્વા અઞ્જલિં ગગ્ગય્હ ઠિતો કસ્મા તે તં અગ્ગિ સરીરં મા પરિદહીતિ પુચ્છિ. સા તં કારણં કથેન્તી એવ માહ.

૮. માતા પિતાચ ઞાતીચ, પરિવારાચ સોહદા;

મન્તો સધાદયોચાપિ, મહેસક્ખાચ દેવતા.

૯. એતેચ ઞ્ઞેચ ભૂપાલ, સત્તાનં ભય માગતે;

રક્ખિતું નેવ સક્કોન્તિ, હિત્વાન સરણત્તયં.

૧૦. અગાહં બુદ્ધં સરણં, બુદ્ધો મે સરણં ઇતિ;

તેન તેજેન મં રાજ, જલન્તો અગ્ગિ નો દહિ.

૧૧. અગાહં ધમ્મં સરણં, ધમ્મો મે સરણં ઇતિ;

તેન તેજેન મં રાજ, જલન્તો અગ્ગિ નો દહિ.

૧૨. અગાહં સઙ્ઘં સરણં, સઙ્ઘો મે સરણં ઇતિ;

તેન તેજેન મં રાજ, જલન્તો અગ્ગિ નો દહિ.

૧૩. એવં મહાનુભાવન્તં, પચ્ચક્ખં એહિપસ્સિકં;

નાનો પદ્દવ વિદ્ધંસિં, નાનાસમ્પત્તિદાયકં.

૧૪. સરણત્તયઞ્હિ યો સત્તો, ન સમાદાય ગણ્હતિ;

ઇધવા પરત્થવા લોકે, સો સુખં નાનુભોસ્સતિ.

૧૫. સરણત્તયઞ્હિ યો સત્તો, સુસમાદાય ગણ્હતિ;

ઇધવાપરત્થવા લોકે, સો સુખા ન વિહાયતિ.

૧૬. તસ્મા તુવમ્પિ ભૂપાલ, ગણ્હાહિ સરણત્તયં;

તં તે ભવતિ સબ્બત્થ, તાણં લેણં પરાયણન્તિ.

તં સુત્વા રાજા અતિવિય પસન્નમાનસો તં ખમાપેત્વા મહન્તં સક્કારસમ્માનં કત્વા અજ્જપ્પટ્ઠાય ત્વં મમ માતાતિ તં માતુટ્ઠાને ઠપેત્વા સરણ મગમાસિ. તસ્મિં સન્નિપતિત્વા ઠિતમહાજના તં પાટિહારિયં દિસ્વા સરણેસુચ સીલેસુચ પતિટ્ઠાય દાનાદીનિ પુઞ્ઞકમ્માનિ કત્વા યથાકમ્મં ગતાતિ.

૧૭. ઇતિ સરણવરં સા કેવલં ઉગ્ગહેત્વા,

જલિતદહનમજ્ઝે સીતિભાવં અલત્થ;

પરમસરણસીલં પાલયન્તા કથં વો,

ન લભથ ભવભોગં નિબ્બુતિઞ્ચાપિ અન્તેતિ.

વેસ્સામિત્તાપ વત્થું સત્તમં.