૨. મિગલુદ્દકસ્સ વત્થુમ્હિ અયમાનુપુબ્બિકથા

ઇતો કિર એક તિંસતિમે કપ્પે સિખીનામ સમ્માસમ્બુદ્ધો સમતિંસ પારમિયો પૂરેત્વા પરમાતિસમ્બોધિં પત્વા સદેવકં લોકં સંસારકન્તારા ઉત્તારેન્તો ધમ્મરતનવસ્સં વસ્સાપેન્તો ધમ્મભેરિંપહરન્તો ધમ્મકેતું ઉસ્સાપેન્તો એકસ્મિં સમયે વિવેક મનુબ્રૂહન્તો અરઞ્ઞાયતનં પાવિસિ, પવિસિત્વા ચપન સુપુપ્ફિતનાગપુન્નાગાદિનાનાતરુસણ્ડમણ્ડિતે સુફુલ્લસુમનમાલતિપ્પભુતિનાનાલતાકુલે અનેકવિધદિપદચતુપ્પદસઙ્ઘનિસેવિતે રમણીયે સીતલસિલાતલે ચતુગ્ગુણં સઙ્ઘાટિંપઞ્ઞપેત્વા નિસીદિ છબ્બણ્ણરંસીહિ દિસં પૂરયન્તો, તદા તત્થ દેવબ્રહ્મનાગસુપણ્ણાદયો સન્નિપતિત્વા દિબ્બમયેહિ ગન્ધમાલાદીહિ ભગવન્તં પૂજયમાના થોમયમાના નમસ્સમાના અટ્ઠંસુ, તસ્મિં પનસમાગમે ભગવા મધુરસ્સરં નિચ્છારેન્તો બ્રહ્મઘોસેન ચતુસચ્ચપટિસંયુત્તં ધમ્મં દેસેતિ અમતવસ્સં વસ્સાપેન્તોવિય. તદા એકો મિગલુદ્દકો વનં પવિટ્ઠો મિગસૂકરે હન્ત્વા મંસં ખાદન્તો તં ઠાનં પત્વા અદ્દસ ભગવન્તં ધમ્મં દેસેન્તં. દિસ્વા એકમન્તં ઠિતો ધમ્મં સુત્વા ચિત્તં પસાદેત્વા તતો ચુતો દેવલોકે નિબ્બત્તિત્વા છસુ કામસગ્ગેસુ મનુસ્સેસુચ અપરાપરં ઇસ્સરિયં અનુભવન્તો ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તિત્વા વિઞ્ઞુતં પત્તો ભગવતો સાસને પબ્બજિત્વા એકદિવસં ધમ્મં દેસેન્તસ્સ ભગવતો ચતુસચ્ચપતિ સંયુત્તં ધમ્મકથં સુત્વા ચતુપટિસમ્ભિદાહિ અરહત્તં પત્વા એકદિવસં ભિક્ખુસઙ્ઘમજ્ઝગતો અત્તનો કતકમ્મપ્પકાસનેન પીતિવાચમુદાહરિ.

૧. એ ક તિં સે ઇતો કપ્પે,

લોકે ઉપ્પજ્જિ નાયકો;

પત્તિંસ લક્ખણાતિણ્ણો,

સમ્બુદ્ધો સ સિખીવ્હયો.

૨. જલન્તો દીપરુક્ખોવ, સૂરિયોવ નભ મુગ્ગતો;

મેરુરાજાવ સમ્બુદ્ધો, જનેસગ્ગો પતાપવા.

૩. પૂરેત્વા ધમ્મનાવાયં, સ નાથો સકલં પજં;

પતિટ્ઠપેન્તો સંસાર, કન્તારા સન્તિભૂમિયં.

૪. ધમ્મકેતું સમુસ્સેન્તો, હનન્તો ધમ્મદુન્દુભિં;

સત્તે દુક્ખા પમોચેન્તો, વસી તત્થ જિનો વસી.

૫. એકસ્મિં સમયે નાથો,

લોકપજ્જોતકો જિનો;

વિવેકકામો સમ્બુદ્ધો,

સુરમ્મં કાનનં ગતો.

૬. પુન્નાગનાગપૂગાદિ, નાનાપાદપસંકુલં;

લતા લિઙ્ગિતસાખાહિ, સા મોદકુસુમાયુતં.

૭. કુસુમા મોદસમ્મત્ત, છપ્પદાલિ નિસેવિતં;

નાનામિગ ગણાકિણ્ણં, મયૂરગણ નચ્ચિતં.

૮. સીતલચ્છોદિકાસાધુ, સુપતિત્થજલાસયં;

આસાર સારધારાહિ, નિજ્ઝરાસત સંકુલં.

૯. ગન્ત્વાન સો મહારઞ્ઞં,

સીતલં સિકતાતલં;

સિલાતલે નિસિન્નોસિ,

વિસ્સજ્જેન્તો છરંસિયો.

૧૦. દેવા તત્થ સમાગન્ત્વા, પૂજેસું દ્વિપદુત્તમં;

દિબ્બેહિ ગન્ધમાલાહિ, નચ્ચેહિ તુરિયેહિચ.

૧૧. દેવદેવો તદા દેવ, સઙ્ઘમજ્ઝે નિસીદિય;

ચતુસચ્ચ મદેસેસિ, નિચ્છરં મધુરં ગિરં.

૧૨. તદાહં લુદ્દકો આસિં, મિગસૂકરમારકો;

મિગમંસેન જિવામિ, તેન પોસેમિ દારકે [પોસેન્તોપુત્તદારકે ઇતિકત્થચિ].

૧૩. તદાહં મિગવં યાતો,

સબાણો સસરાસનો;

અદ્દસં વિરજં બુદ્ધં,

દેવસઙ્ઘપુરક્ખતં.

૧૪. ચન્દંવ તારકાકિણ્ણં, મેરુંવણ્ણવમજ્ઝગં;

વિરોચમાન માસીનં, ચતુસચ્ચપ્પકાસકં.

૧૫. એકપસ્સે ઠિતો તત્થ, અસ્સોસિં ધમ્મમુત્તમં;

તત્થ ચિત્તં પસાદેત્વા, સોમનસ્સં પવેદયિં.

૧૬. એકતિંસે ઇતો કપ્પે,

યં પુઞ્ઞં પસુતં મયા;

તેનાહં પુઞ્ઞકમ્મેન,

જાતોસિં દેવયોનિયં.

૧૭. સમ્પત્તિમનુભુત્વાન, છકામગ્ગે પરાપરં;

દેવસઙ્ઘપરિબ્બૂળ્હો, વિમાને રતનામયે.

૧૮. મનુસ્સેસુચ યં અગ્ગં, તસ્સ ભાગી ભવામહં;

ભોગે મે ઊનતા નત્થિ, સદ્ધમ્મસવણે ફલં.

૧૯. ઇમસ્મિં ભદ્દકે કપ્પે,

સાવત્તિપુરમુત્તમે;

અડ્ઢે મહદ્ધને સાલે,

જાતોહં ઉદિતે કુલે.

૨૦. મહતા પરિવારેન, પત્તો વુદ્ધિંચ વિઞ્ઞુતં;

ચારિકં ચરમાનોહં, પત્તો જેતવનં વરં.

૨૧. અદ્દસં સહ સિસ્સેહિ, નિસિન્નં સુગતં તદા;

અસ્સોસિં મધુરં ધમ્મં, ચતુસચ્ચપ્પકાસકં.

૨૨. સુત્વાન મધુરં ધમ્મં, પબ્બજિત્વાન સાસને;

અ જરા મરં સીતિભૂતં, પત્તો નિબ્બાણમુત્તમં.

૨૩. સુતં એકમુહુત્તં મે, તદા ધમ્મં સુદેસિતં;

તેનમ્હિ ચતુરાપાયે, ન જાતો ન કુતોભયં.

૨૪. કરમુક્ખિપ્પ વક્ખામિ, કરોથે કગિરં મમ;

મમો પમં કરિત્વાન, ધમ્મં સુણાથ સાધુકન્તિ.

એવઞ્ચ પન વત્વા સત્તે ધમ્મસવણે નિયોજેસીતિ.

૨૫. ઇતિ તનુતરકાલં સાધુ ધમ્મં સુણિત્વા,

અધિગતવિભવાનં આનુભાવં સુણિત્વા;

ભવવિભવસુખં ભો પત્થયન્તા કુસીતં,

જહથ સુણથ ધમ્મં દુલ્લભં દુલ્લભસ્સાતિ.

મિગલુદ્દકસ્સ વત્થું દુતિયં.