૧૦. રૂપદેવિયા વત્થુમ્હિ અયમાનુપુબ્બીકથા

અતીતે કિર વિપસ્સિસ્સ ભગવતો કાલે તસ્મિં નગરે એકા ગામદારિકા વિહારે આહિણ્ડન્તી એકં ગિલાનભિક્ખું દિસ્વા કમ્પમાનહદયા ઉપસઙ્કમિત્વા વન્દિત્વા ભન્તે કોતે આબાધો સરીરં પીળેતીતિ પુચ્છિ. તેનાપિ ભગિનિ ખરાબાધો મે પીળેતીતિ વુત્તે સા તેનહિ ભન્તે અહં તં રોગં વૂપસમેસ્સામીતિ નિમન્તેત્વા ગેહં ગન્ત્વા તં પવત્તિં માતાપિતુન્નં કથેત્વા તેહિ અનુઞ્ઞાતા પુન દિવસે નાનગ્ગરસેન ભેસજ્જાહારં સમ્પાદેસિ, તતો સો ભિક્ખુ પુનદિવસે ચીવરં પારુપિત્વા ભિક્ખાય ચરન્તો તસ્સા ગેહં ગન્ત્વા અટ્ઠાસિ. સા થેરં આગતં દિસ્વા સોમનસ્સજાતા પત્તં ગહેત્વા આસનં પઞ્ઞાપેત્વા અદાસિ. તત્થ નિસિન્નં તં આહારેન સાધુકં પરિવિસિત્વા સક્કાર મકાસિ. અથસ્સા સદ્ધાબલેન ભુત્તમત્તેયેવ સો આબાધો વૂપસમિ. તતો સો વૂપસન્તરોગો દુતિયદિવસે તસ્સા ગેહં ના ગમાસિ. અથ સા વિહારં ગન્ત્વા તં વન્દિત્વા કસ્માનાગતત્થાતિ પુચ્છિત્વા તેન મે ભગિનિ બ્યાધિ વૂપસમિ, તસ્મા નાગતોસ્મીતિ વુત્તે સા સાધુ ભન્તેતિ સોમનસ્સજાતા ગેહમેવ અગમાસિ. સા તેન પુઞ્ઞકમ્મેન કાલં કત્વા દેવલોકે નિબ્બત્તિ. તસ્સા તત્થ દ્વાદસયોજનિકં કનકવિમાનં નિબ્બત્તિ. સા તત્થ દેવિસ્સરિયં અનુભવન્તી છબુદ્ધન્તરં ખેપેત્વા અમ્હાકં ભગવતો કાલે જમ્બુદીપે દેવપુત્તનગરે ઉદિચ્ચબ્રહ્મણકુલે જેટ્ઠબ્રાહ્મણસ્સ ભરિયાય કુચ્છિમ્હિ પટિસન્ધિં ગણ્હિ, સા પરિપાક મન્વાય માતુકુચ્છિતો નિક્ખમિ. તસ્સા માતુકુચ્છિતો નિક્ખન્તકાલતો પટ્ઠાય દિવસે દિવસે અટ્ઠટ્ઠનાલિમત્તં તણ્ડુલં નિબ્બત્તતિ. તસ્સા રૂપસમ્પત્તિં દિસ્વા પસન્ના માતાપિતરો રૂપદેવીતિ નામ મકંસુ. પચ્છા તં પતિરૂપેન દારકેન નિયોજેસું. અથસ્સા તણ્ડુલ- નાલિમત્તં ગહેત્વા પચિતું આરદ્ધે ઇચ્છિતિચ્છિતમંસાદિબ્યઞ્જનઞ્જ સપ્પિનવનીતદધિખીરાદિગોરસઞ્ચ જીરમરિચાદિકટુકભણ્ડઞ્ચ કદલિપનસમધુગુળાદિઉપકરણઞ્ચ ભાજનાનિ પૂરેત્વા નિબ્બત્તતિ, તાય હત્થેન ગહિતં કિઞ્ચિ ખાદનીયં ભોજનીયંવા પૂતિભાવં ન ગચ્છતિ, ભત્તુક્ખલિં ગહેત્વા સકલનગરવાસિનો ભોજેન્તિયાપિ એકકટચ્છુમત્તં ભત્તં ગહિતટ્ઠાનં ન પઞ્ઞાયતિ. એવં અપરિક્ખયપુઞ્ઞા અહોસિ, સકલદેવપુત્તનગરે ચન્દસુરિયાવ પાકટા અહોસિ, અથ સા પઞ્ચસતભિક્ખૂ નિમન્તેત્વા નિચ્ચં સકનિવેસનેયેવ ભોજેતિ, તદા તેસં અન્તરે પટિસમ્ભિદાપત્તો મહાસઙ્ઘરક્ખિતત્થેરોનામ ઇમિસ્સા પુઞ્ઞાનુભાવં દિબ્બચક્ખુના દિસ્વા ન જાનાતિ એસા અત્થના પુબ્બે કતકમ્મં. યન્નૂનાહં અસ્સા પકાસેય્યન્તિ એકદિવસં તસ્સા નિવેસને ભુઞ્જિત્વા અનુમોદનં કરોન્તો જાનાસિ ભગિનિ તયા પુબ્બે કતકમ્મન્તિ પુચ્છિ, ન જાનામિ ભન્તે. સોતુમિચ્છામીતિ, અથસ્સા સો પુબ્બકમ્મં પકાસેન્તો.

૧. એકનવુતે ઇતો કપ્પે,

વિપસ્સીનામ નાયકો;

અહોસિ લોકે લોકેક,

નાયકો છિન્નબન્ધનો.

૨. તદા તસ્મિં પુરે રમ્મે, આસિ ત્વં ગામદારિકા;

આહિણ્ડન્તી વિહારસ્મિં, અદ્દક્ખિ જિનસાવકં.

૩. રોગાતુરં કિસં પણ્ડું, અસ્સસન્તં મુહું મુહું;

દિસ્વાન કમ્પિતા ચિત્તા, નિમન્તેત્વાન તં મુનિં.

૪. ભેસજ્જઞ્ચેવ ભત્તઞ્ચ, અદા ત્વં તેન સો યતિ;

અબ્યાબાધો અનીઘોચ, અહોસિ અનુપદ્દવો.

૫. તતો ત્વં તેન કમ્મેન, સુકતેન તતો ચુતા;

જાતાસિ દેવલોકસ્મિં, સબ્બકામસમિદ્ધિની.

૬. તત્થ તે પુઞ્ઞતેજેન, પાસાદો રતનામયો;

મણિથૂપિસતાકિણ્ણો, કૂટાગારેહિ લઙ્કતો.

૭. નેકગબ્ભસતાકિણ્ણો, સયનાસનમણ્ડિતો;

અચ્છરાસતસંકિણ્ણો, નચ્ચગીતાદિસંકુલો.

૮. રમ્ભામ્બજમ્બુસન્નીર, પૂગપુન્નાગપાટલી;

નાગાદિતરુસણ્ડેહિ, મણ્ડિતુય્યાનપન્તિહિ.

૯. પદુમુપ્પલકળાર, કુન્દકાનનમણ્ડિતે;

મધુમત્તાલિપાલીહિ, સારસીસરસંકુલે.

૧૦. દેવપુત્તેહિ નેકેહિ, તથા દેવચ્છરાહિચ;

નિચ્ચુસ્સવે મહાભોગે, વિમાને મનનન્દને.

૧૧. ત્વમેવં દેવલોકમ્હિ, વિન્દમાના મહાયસં;

અદ્ધાનં વીતિનામેત્વા, નિબ્બુતે ગોતમે જિને.

૧૨. જમ્બુદીપે ઇદાનિ ત્વં, નિબ્બત્તા ઉદિતે કુલે;

પુઞ્ઞપઞ્ઞાગુણાવાસા, રૂપેનગ્ગા પિયંવદા.

૧૩. એતં તે દેવલોકસ્મિં, દેવિસ્સરિયમબ્ભુતં,

ઇમં તે ઇધ લોકસ્મિં, સબ્બં માનુસિકં સુખં.

૧૪. વિપસ્સિમુનિનો કાલે, ત્વં તસ્સેકસ્સ ભિક્ખુનો;

અદા દાનં ગિલાનસ્સ, તસ્સ તં ફલમીદિસં.

૧૫. કાતબ્બઞ્હિ સદા પુઞ્ઞં, ઇચ્છન્તેન સુખપ્પદં;

તસ્મા ત્વં સબ્બદા ભદ્દે, ઉસ્સુક્કા કુસલે ભવાતિ.

એવં સો તસ્સ પુરિમત્તભાવે કતકમ્મં પકાસેત્વા ઇદાનિ પુઞ્ઞકમ્મે અપ્પમાદા ભવાતિ અનુસાસિ. સા થેરસ્સ ધમ્મદેસનં સુત્વા પરમસોમનસ્સા તતો પટ્ઠાય દાનાદીસુ નિરતા પુઞ્ઞાનિ કરોન્તી તેનેવ સોમનસ્સેન સોતાપન્ના અરિયસાવિકા અહોસીતિ.

૧૬. ઇતિ તરુણકુમારી પુઞ્ઞકમ્મેસુ સારં,

અવિદિતગુણમત્તા દત્વ ભિક્ખુસ્સ દાનં;

દિવિમનુજસુખં સાલત્થ તુમ્હે ભવન્તા,

વિદિતકુસલપાકા કિં ન લબ્ભેથ સન્તિં.

રૂપદેવિયા વત્થું દસમં.

ધમ્મસોણ્ડકવગ્ગો પથમો.