૫. પઞ્ચમ પારાજિક સિક્ખાપુચ્છા

પુચ્છા – ભિક્ખુનીનં આવુસો પઞ્ચમ પારાજિકં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સુન્દરીનન્દં ભિક્ખુનિં આરબ્ભ પઞ્ઞત્તં, સુન્દરીનન્દા ભન્તે ભિક્ખુની અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયિ, તસ્મિં ભન્તે વત્થુસ્મિં પઞ્ઞત્તં.

ભિક્ખુનીવિભઙ્ગ, સઙ્ઘાદિસેસ સિક્ખાપુચ્છા

પુચ્છા – ઉસ્સયવાદિકાય આવુસો ભિક્ખુનિયા અડ્ડં કરોન્તિયા સઙ્ઘાદિસેસો કત્થ પઞ્ઞત્તો, કં આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – સાવત્થિયં ભન્તે તુલ્લનન્દં ભિક્ખુનિં આરબ્ભ પઞ્ઞત્તો, થુલ્લનન્દા ભન્તે ભિક્ખુની ઉસ્સયવાદિકા વિહરિ, તસ્મિં ભન્તે વત્થુસ્મિં પઞ્ઞત્તો.

પુચ્છા – ચોરિં આવુસો વુટ્ઠાપેન્તિયા સઙ્ઘાદિસેસો કત્થ પઞ્ઞત્તો, કં આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – સાવત્થિયં ભન્તે થુલ્લનન્દં ભિક્ખુનિં આરબ્ભ પઞ્ઞત્તો, થુલ્લનન્દા ભન્તે ભિક્ખુની ચોરિં વુટ્ઠાપેસિ, તસ્મિં ભન્તે વત્થુસ્મિં પઞ્ઞત્તો.

પુચ્છા – એકાય આવુસો ગામન્તરં ગચ્છન્તિયા સઙ્ઘાદિસેસો કત્થ પઞ્ઞત્તો, કં આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – સાવત્થિયં ભન્તે અઞ્ઞતરં ભિક્ખુનિં આરબ્ભ પઞ્ઞત્તો, અઞ્ઞતરા ભન્તે ભિક્ખુની એકા ગામન્તરં ગચ્છિ, તસ્મિં ભન્તે વત્થુસ્મિં પઞ્ઞત્તો.

પુચ્છા – અવસ્સુતાય આવુસો ભિક્ખુનિયા અવસ્સુતસ્સ પુરિસપુગ્ગલસ્સ હત્થતો ખાદનીયંવા ભોજનીયંવા સહત્થા પટિગ્ગહેત્વા ભુઞ્જન્તસ્સ સઙ્ઘાદિસેસો કત્થ પઞ્ઞત્તો, કં આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – સાવત્થિયં ભન્તે સુન્દરીનન્દં ભિક્ખુનિં આરબ્ભ પઞ્ઞત્તો, સુન્દરીનન્દા ભન્તે ભિક્ખુની અવસ્સુતા અવસ્સુતસ્સ પુરિસપુગ્ગલસ્સ હત્થતો આમિસં પટિગ્ગહેસિ તસ્મિં ભન્તે વત્થુસ્મિં પઞ્ઞત્તો.

પુચ્છા – કુપિતાય આવુસો અનત્તમનાય ભિક્ખુનિયા યાવતતિયં સમનુભાસન્તિયા ન પટિનિસજ્જન્તિયા સઙ્ઘાદિસેસો કત્થ પઞ્ઞત્તો, કં આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – સાવત્થિયં ભન્તે ચણ્ડકાળિં ભિક્ખુનિં આરબ્ભ પઞ્ઞત્તો, ચણ્ડકાળી ભન્તે ભિક્ખુની કુપિતા અનત્તમના એવં અભણિ, બુદ્ધં પચ્ચાચિક્ખામિ, ધમ્મં પચ્ચાચિક્ખામિ, સઙ્ઘં પચ્ચાચિક્ખામિ, સિક્ખં પચ્ચાચિક્ખામિ, કિન્નુમાવ સમણિયો યા સમણિયો સક્યધીતરો, સન્તઞ્ઞાપિ સમણિયો લજ્જિનિયો કુક્કુચ્ચિકા સિક્ખાકામા, તાસાહં સન્તિકે બ્રહ્મચરિયં ચરિસ્સામીતિ, તસ્મિં ભન્તે વત્થુસ્મિં પઞ્ઞત્તો.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

પુચ્છા – અત્થિ નુખો આવુસો એત્થ કોચિપિ વિરદ્ધદોસો.

વિસ્સજ્જના – નત્થિ ભન્તે.