૨. કોસિયવગ્ગ ૪. છબ્બસ્સ સિક્ખાપુચ્છા

પુચ્છા – યં તેન આવુસો ભગવતા…પે… સમ્માસમ્બુદ્ધેન અનુવસ્સં કારાપેન્તસ્સ નિસ્સગ્ગિયં પાચિત્તિયં કત્થ પઞ્ઞત્તં.

વિસ્સજ્જના – સાવત્થિયં ભન્તે પઞ્ઞત્તં.

પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સમ્બહુલે ભન્તે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ અનુવસ્સં સન્થતં કારાપેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

પુચ્છા – અત્થિ નુખો આવુસો એત્થ કોચિ વિરદ્ધદોસો.

વિસ્સજ્જના – નત્થિ ભન્તે.

સંગાયનત્થાય સઙ્ઘસ્સ ઞાપનં

સુણાતુ મે ભન્તે સઙ્ઘો, અહં આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં ઇમેસં નિસ્સગ્ગિયપાચિત્તિયસિક્ખાપદાનં યાવ છબ્બસ્સસિક્ખાપદં નિદાનાદીનિ પુચ્છિતબ્બાનિ અનેકાનિ ઠાનાનિ પુચ્છિં, પુટ્ઠોપુટ્ઠો ચ સો આયસ્મા વિચિત્તસારાભિવંસો વિસ્સજ્જેસિ, ઇતિહિદં ભન્તે ઇમાનિ સિક્ખાપદાનિ નિમ્મલાનિ સુપરિસુદ્ધાની તસ્સેવ ભગવતો વચનાનિ અરહતો સમ્માસમ્બુદ્ધસ્સ, તસ્મા યથાપુરે મહાકસ્સપાદયો મહાથેરવરા પોરાણસંગીતિકારા બ્રહ્મચરિયસ્સ ચિરટ્ઠિતિયા બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં ધમ્મવિનયં સંગાયિંસુ ચેવ અનુસંગાયિંસુ ચ, એવમેવ મયમ્પિ દાનિ સબ્બેવ છટ્ઠસંગીતિ મહાધમ્મસભા પરિયાપન્ના છબ્બસ્સ નિસ્સગ્ગિય સિક્ખાપદતો પટ્ઠાય ઇમાનિ નિસ્સગ્ગિયસિક્ખાપદાનિ એકતો ગણસજ્ઝાયં કત્વા સંહાયેય્યામ.