૩. પત્તવગ્ગ, ૧. પત્ત સિક્ખાપુચ્છા

પુચ્છા – અતિરેકપત્તં આવુસો દસાહં અતિક્કામેન્તસ્સ નિસ્સગ્ગિયં પાચિત્તિયં કત્થ પઞ્ઞત્તં.

વિસ્સજ્જના – સાવત્થિયં ભન્તે પઞ્ઞત્તં.

પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – છબ્બગ્ગિયે ભન્તે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ અતિરેકપત્તં ધારેસું, તસ્મિં ભન્તે વત્થુસ્મિં પઞ્ઞત્તં.

૫૧૪. ૩. પત્તવગ્ગ, ૨. ઊનપઞ્ચબન્ધન સિક્ખાપુચ્છા

પુચ્છા – ઊનપઞ્ચબન્ધનેન પત્તેન અઞ્ઞં નવં પત્તં ચેતાપેન્તસ્સ નિસ્સગ્ગિયં પાચિત્તિયં કત્થ પઞ્ઞત્તં.

વિસ્સજ્જના – સક્કેસુ ભન્તે પઞ્ઞત્તં.

પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – છબ્બગ્ગિયે ભન્તે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ અપ્પમત્તકેનપિ ભિન્નેન અપ્પમત્તકેનપિ ખણ્ડેન વિલિખિતમત્તેનપિ બહૂ પત્તે વિય્યાપેસું, તસ્મિં ભન્તે વત્થુસ્મિં પઞ્ઞત્તં.

ન ભિક્ખવે પત્તો વિઞ્ઞાપેતબ્બો, યો વિઞ્ઞાપેય્ય આપત્તિ દુક્કટસ્સ.