૧૩. કુલદૂસક સઙ્ઘાદિસેસ સિક્ખાપુચ્છા

પુચ્છા – યં તેન આવુસો ભગવતા…પે… સમ્માસમ્બુદ્ધેન કુલદૂસકસ્સ ભિક્ખુનો યાવતતિયં સમનુભાસનાય અપ્પટિનિસ્સજ્જન્તસ્સ સઙ્ઘાદિસેસો કત્થ પઞ્ઞત્તો.

વિસ્સજ્જના – સાવત્થિયં ભન્તે પઞ્ઞત્તો.

પુચ્છા – કં આરબ્ભ આવુસો કિસ્મિં વત્થુસ્મિં પઞ્ઞત્તો.

વિસ્સજ્જના – અસ્સજિ પુનબ્બસુકે ભન્તે ભિક્ખૂ આરબ્ભ પઞ્ઞત્તો, અસ્સજિપુનબ્બસુકા ભન્તે ભિક્ખૂ સઙ્ઘેન પબ્બાજનીયકમ્મકતા છન્દગામિતા દોસગામિતા મોહગામિતા ભયગામિતા પાપેસું, તસ્મિં ભન્તે વત્થુસ્મિં પઞ્ઞત્તો.

અનિયત સિક્ખાપુચ્છા

પુચ્છા – યં તેન આવુસો ભગવતા…પે… સમ્માસમ્બુદ્ધેન પઠમો ચ અનિયતો દુતિયો ચ અનિયતો કત્થ પઞ્ઞત્તો.

વિસ્સજ્જના – સાવત્થિયં ભન્તે પઞ્ઞત્તો.

પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તો.

વિસ્સજ્જના – આયસ્મન્તં ભન્તે ઉદાયિં આરબ્ભ પઞ્ઞત્તો, આયસ્મા ભન્તે ઉદાયી માતુગામેન સદ્ધિં એકોએકાય રહો પટિચ્છન્ને આસને અલંકમ્મનિયે નિસજ્જં કપ્પેસિ, તસ્મિઞ્ચ વત્થુસ્મિં, આયસ્માયેવ ભન્તે ઉદાયી માતુગામેન સદ્ધિં રહો નિસજ્જં અકાસિ, તસ્મિઞ્ચ ભન્તે વત્થુસ્મિં પઞ્ઞત્તો.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

પુચ્છા – અત્થિ નુખો આવુસો એત્થ કોચિપિ વિરદ્ધદોસો.

વિસ્સજ્જના – નત્થિ ભન્તે.

સંગાયનત્થાય સઙ્ઘસ્સઞાપનં

સુણાતુ મે ભન્તે સઙ્ઘો, અહં ભન્તે આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં પઠમ દુટ્ઠદોસ સિક્ખાપદતો પટ્ઠાય પુચ્છિતબ્બાનિ અનેકાનિ ઠાનાનિ પુચ્છિં, સો ચ આયસ્મા પુટ્ઠો પુટ્ઠો વિસ્સજ્જેતિ, ઇતિહિદં ભન્તે સબ્બં સિક્ખાપદં નિમ્મલં સુપરિસુદ્ધં તસ્સેવ ભગવતો વચનં અરહતો સમ્માસમ્બુદ્ધસ્સ, તસ્મા યથાપુરે મહાકસ્સપાદયો મહાથેરવરા પોરાણસંગીતિકારા બ્રહ્મચરિયસ્સ ચિરટ્ઠિતિયા બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં સંગાયિંસુચેવ અનુસંગાયિંસુચ, એવમેવ મયમ્પિ દાનિ સબ્બેવ છટ્ઠસંગીતિ મહાધમ્મસભાપરિયાપન્ના ઇમાનિ સિક્ખાપદાનિ એકતો ગણસજ્ઝાયં કત્વા સંગાયેય્યામ.