૧. સુક્કવિસ્સટ્ઠિસઙ્ઘાદિસેસ સિક્ખાપુચ્છા

પુચ્છા – યં તેન આવુસો ભગવતા જાનતા પસ્સતા અરહતા સમ્માસમ્બુદ્ધેન ઉપક્કમિત્વા અસુચિં મોચેન્તસ્સ સઙ્ઘાદિસેસો કત્થ પઞ્ઞત્તો.

વિસ્સજ્જના – સાવત્થિયં ભન્તે પઞ્ઞત્તો.

પુચ્છા – કં આવુસો આરબ્ભ પઞ્ઞત્તો.

વિસ્સજ્જના – આયસ્મન્તં ભન્તે સેય્યસકં આરબ્ભ પઞ્ઞત્તો.

પુચ્છા – કિસ્મિં આવુસો વત્થુસ્મિં પઞ્ઞત્તો.

વિસ્સજ્જના – આયસ્મા ભન્તે સેય્યસકો હત્થેન ઉપક્કમિત્વા અસુચિં મોચેસિ, તસ્મિં ભન્તે વત્થુસ્મિં પઞ્ઞત્તો.

પુચ્છા – અત્થિ આવુસો તત્થ પઞ્ઞત્તિ અનુપઞ્ઞત્તિ અનુપ્પન્નપઞ્ઞત્તિ.

વિસ્સજ્જના – એકા ભન્તે પઞ્ઞત્તિ, એકા અનુપઞ્ઞત્તિ, અનુપ્પન્નપઞ્ઞત્તિ તસ્મિં નત્થિ.

પુચ્છા – કતમા આવુસો તત્થ મૂલપઞ્ઞત્તિ.

વિસ્સજ્જના – સઞ્ચેતનિકા સુક્કવિસ્સટ્ઠિ સઙ્ઘાદિસેસોતિ અયં ભન્તે તત્થ મૂલપઞ્ઞત્તિ.

પુચ્છા – કતમા પનાવુસો તત્થ અનુપઞ્ઞત્તિ.

વિસ્સજ્જના – અઞ્ઞત્ર સુપિનન્તાતિ અયં ભન્તે તત્થ અનુપઞ્ઞત્તિ.

પુચ્છા – કતમા પનાવુસો તત્થ પરિપુણ્ણપઞ્ઞત્તિ.

વિસ્સજ્જના – સઞ્ચેતનિકા સુક્કવિસ્સટ્ઠિ અઞ્ઞત્રસુપિનન્તા સઙ્ઘાદિસોતિ અયં ભન્તે તત્થ પરિપુણ્ણપઞ્ઞત્તિ.

પુચ્છા – સાધારણ પઞ્ઞત્તિનુખો આવુસો અસાધારણ પઞ્ઞત્તિનુખો.

વિસ્સજ્જના – અસાધારણપઞ્ઞત્તિ ભન્તે.

પુચ્છા – તત્થ આવુસો ઉપક્કમિત્વા અસુચિં મોચેન્તો કતિ આપત્તિયો આપજ્જતિ.

વિસ્સજ્જના – ઉપક્કમિત્વા ભન્તે અસુચિં મોચેન્તો તિસ્સો આપત્તિયો આપજ્જતિ, ચેતેતિ ઉપક્કમતિ મુચ્ચતિ આપત્તિ

સઙ્ઘાદિસેસસ્સ, ચેતેતિ ઉપક્કમતિ ન મુચ્ચતિ આપત્તિ થુલ્લચ્ચયસ્સ, પયોગે દુક્કટં.

પુચ્છા – કેસં આવુસો અનાપત્તિ.

વિસ્સજ્જના – છન્નં ભન્તે અનાપત્તિ સુપિનન્તેન મોચેન્તસ્સ ન મોચનાધિપ્પાયસ્સ ઉમ્મત્તકસ્સ ખિત્તચિત્તસ્સ વેદનાટ્ટસ્સ આદિકમ્મિકસ્સ ઇમેસં ખો ભન્તે છન્નં અનાપત્તિ.

પુચ્છા – પઞ્ચન્નં આવુસો પાતિમોક્ખુદ્દેસાનં કતમેન ઉદ્દેસેન ઉદ્દેસં આગચ્છતિ.

વિસ્સજ્જના – પઞ્ચન્નં ભન્તે પાતિમોક્ખુદ્દેસાનં તતિયેન ઉદ્દેસેન ઉદ્દેસં આગચ્છતિ.

પુચ્છા – ચતુન્નં આવુસો વિપત્તીનં કતમા વિપત્તિ.

વિસ્સજ્જના – ચતુન્નં ભન્તે વિપત્તીનં સીલવિપત્તિ.

પુચ્છા – કા આવુસો વિપત્તિ.

વિસ્સજ્જના – અસંવરો ભન્તે વિપત્તિ.

પુચ્છા – કા આવુસો સમ્પત્તિ.

વિસ્સજ્જના – સંવરો ભન્તે સમ્પત્તિ.

પુચ્છા – કા આવુસો પટિપત્તિ.

વિસ્સજ્જના – ન એવ રૂપં કરિસ્સામીતિ યાવજીવં આપાણકોટિકં સમાદાય સિક્ખતિ સિક્ખાપદેસુ અયં ભન્તે પટિપત્તિ.

પુચ્છા – કતિ આવુસો અત્થવસે પટિચ્ચ ભગવતા ઉપક્કમિત્વા અસુચિં મોચેન્તસ્સ સઙ્ઘાદિસેસો પઞ્ઞત્તો.

વિસ્સજ્જના – દસ ભન્તે અત્થવસે પટિચ્ચ ભગવતા ઉપક્કમિત્વા અસુચિં મોચેન્તસ્સ સઙ્ઘાદિસેસો પઞ્ઞત્તો સઙ્ઘસુટ્ઠુતાય…પે… વિનયાનુગ્ગહાય.

પુચ્છા – કત્થ આવુસો ઠિતં.

વિસ્સજ્જના – સિક્ખાકામેસુ ભન્તે ઠિતં.

પુચ્છા – કે આવુસો ધારેન્તિ.

વિસ્સજ્જના – યેસં ભન્તે વત્તતિ તે ધારેન્તિ.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

પુચ્છા – અત્થિ નુખો આવુસો તત્થ સનિદાને સપદભાજનીયે સવિનીતવત્થુકે ઉપનેતબ્બં વા અપનેતબ્બં વા અક્ખરપદપચ્ચાભટ્ઠં વા વિરદ્ધપદબ્યઞ્જનં વા.

સંગાયનત્થાય સઙ્ઘસ્સ ઞાપનં

સુણાતુ મે ભન્તે સઙ્ઘો આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં પઠમસ્સ સઙ્ઘાદિસેસ સિક્ખાપદસ્સ નિદાનમ્પિ પુચ્છિં, પુગ્ગલમ્પિ પુચ્છિં, વત્થુમ્પિ પુચ્છિં, પઞ્ઞત્તિમ્પિ પુચ્છિં, અનુપઞ્ઞત્તિમ્પિ પુચ્છિ, આપત્તિમ્પિ પુચ્છિં, અનાપત્તિમ્પિ પુચ્છિં, અઞ્ઞાનિપિ એવરૂપાનિ અનેકાનિ પુચ્છિતબ્બટ્ઠાનાનિ પુચ્છિં, પુટ્ઠો પુટ્ઠો ચ સો આયસ્મા વિચિત્તસારાભિવંસો વિસ્સજ્જેસિ, ઇતિહિદં ભન્તે પઠમ સઙ્ઘાદિસેસ સિક્ખાપદં સપરિવારં નિમ્મલં સુપરિસુદ્ધં તસ્સેવ ભગવતો વચનં અરહતો સમ્માસમ્બુદ્ધસ્સ. તસ્મા યથાપુરે મહાકસ્સપાદયો મહાથેરવરા પોરાણસંગીતિકારા બ્રહ્મચરિયસ્સ ચિરટ્ઠિતિયા બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં ધમ્મવિનયં સંગાયિંસુચેવ અનુસંગાયિંસુચ, એવમેવ મયમ્પિ સબ્બેવ છટ્ઠસંગીતિમહાધમ્મસભા પરિયાપન્ના ઇદં પઠમં સઙ્ઘાદિસેસ સિક્ખાપદં નિદાનતો પટ્ઠાય એકચ્ચાનં વચસા સજ્ઝાયવસેન એકચ્ચાનં મનસા મનસિકરણવસેનચ એકતો ગણસજ્ઝાયં કત્વા સંગાયેય્યામ.

પુચ્છા – યં તેન આવુસો ભગવતા…પે… સમ્માસમ્બુદ્ધેન માતુકામેન સદ્ધિં કાયસંસગ્ગં સમાપજ્જન્તસ્સ ચ, માતુગામં દુટ્ઠુલ્લાહિ વાચાહિ ઓભાસન્તસ્સ ચ, માતુગામસ્સ સન્તિકે અત્તકામ પારિચરિયાય વણ્ણં ભાસન્તસ્સ ચ, સઞ્ચરિત્તં સમાપજ્જન્તસ્સ ચ સઙ્ઘાદિસેસો કત્થ પઞ્ઞત્તો.

વિસ્સજ્જના – સાવત્થિયં ભન્તે પઞ્ઞત્તો.

પુચ્છા – કં આવુસો આરબ્ભ પઞ્ઞત્તો.

વિસ્સજ્જના – આયસ્મન્તં ભન્તે ઉદાયિત્થેરં આરબ્ભ પઞ્ઞત્તો.

પુચ્છા – કિસ્મિં આવુસો વત્થુસ્મિં પઞ્ઞત્તો.

વિસ્સજ્જના – આયસ્મા ભન્તે ઉદાયિત્થેરો માતુગામેન સદ્ધિં કાયસંસગ્ગં સમાપજ્જિ, આયસ્માયેવ ભન્તે ઉદાયિત્થેરો માતુગામં દુટ્ઠુલ્લાહિ વાચાહિ ઓભાસિ, આયસ્માયેવ ભન્તે ઉદાયિત્થેરો માતુગામસ્સ સન્તિકે અત્તકામ પારિચરિયાય વણ્ણં અભાસિ, આયસ્માયેવ ભન્તે ઉદાયિત્થેરો સઞ્ચરિત્તં સમાપજ્જિં, તસ્મિં ભન્તે વત્થુસ્મિં પઞ્ઞત્તો.