વઙ્ગીસસંયુત્ત

આનન્દસુત્ત

પુચ્છા – વઙ્ગીસસંયુત્તે પનાવુસો ચતુત્થં સંઙ્ગીતં આનન્દસુત્તં કત્થકં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં વઙ્ગીસત્થેરં આરબ્ભ આયસ્મતા આનન્દત્થેરેન ધમ્મભણ્ડાગારિકેન ભાસિતં. આયસ્મતા ભન્તે વઙ્ગીસો આયસ્મન્તં આનન્દં ગાથાય અજ્ઝભાસિ–

‘‘કામરાગેન ડય્હામિ, ચિત્તં મે પરિડય્હતિ;

સાધુ નિબ્બાપનં બ્રૂહિ, અનુકમ્પાય ગોતમા’’તિ.

તસ્મિં ભન્તે વત્થુસ્મિં–

‘‘સઞ્ઞાય વિપરિયેસા, ચિત્તં તે પરિડય્હતિ;

નિમિત્તં પરિવજ્જેહિ, સુભં રાગૂપસંહિતં;

સઙ્ખારે પરતો પસ્સ, દુક્ખતો મા ચ અત્તતો;

નિબ્બાપેહિ મહારાગં, મા ડય્હિત્થો પુનપ્પુનં;

અસુભાય ચિત્તં ભાવેહિ, એકગ્ગં સુસમાહિતં;

સતિ કાયગતા ત્યત્થુ, નિબ્બિદાબહુલો ભવ;

અનિમિત્તઞ્ચ ભાવેહિ, માનાનુસયમુજ્જહ;

તતો માનાભિસમયા, ઉપસન્તો ચરિસ્સસી’’તિ.

એવં ખો ભન્તે આયસ્મતા આનન્દત્થેરેન ધમ્મભણ્ડાગારિકેન ભાસિતં.

કામરાગેન ડય્હામિ, ચિત્તં મે પરિડય્હતિ;

સાધુ નિબ્બાપનં બ્રૂહિ, અનુકમ્પાય ગોતમ–

સઞ્ઞાય વિપરિયેસા, ચિત્તં તે પરિડય્હતિ;

નિમિત્તં પરિવજ્જેહિ, સુભં રાગૂપસંહિતં.

સઙ્ખારે પરતોપસ્સ, દુક્ખતો મા ચ અત્તતો;

નિબ્બાપેહિ મહારાગં, મા ડય્હિત્થો પુનપ્પુનં.

અસુભાય ચિત્તં ભાવેહિ, એકગ્ગં સુસમાહિતં;

સતિ કાયગતા ત્યત્થુ, નિબ્બિદાબહુલો ભવ.

અનિમિત્તઞ્ચ ભાવેહિ, માનાનુસયમુજ્જહ;

તતો માનાભિસમયા, ઉપસન્તો ચરિસ્સસિ.

વઙ્ગીસસુત્ત

પુચ્છા – તત્થ આવુસો દ્વાદસમં વઙ્ગીસસુત્તં કત્થ કેન કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મતા વઙ્ગીસત્થેરેન અચિર અરહત્તપ્પત્તેન વિમુત્તિસુખપટિસંવેદિના–

‘‘કાવેય્યમત્તા વિચરિમ્હ પુબ્બે, ગામાગામં પુરાપુરં,

અથદ્દસામ સમ્બુદ્ધં, સદ્ધા નો ઉપપજ્જથ;

સો મે ધમ્મ મદેસેસિ, ખન્ધાયતન ધાતુયો;

તસ્સાહં ધમ્મં સુત્વાન, પબ્બજિં અનગારિયં;

બહુન્નં વત અત્થાય, બોધિં અજ્ઝગમા મુનિ;

ભિક્ખૂનં ભિક્ખૂનીનઞ્ચ, યે નિયામગતદ્દસા;

સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં;

પુબ્બે નિવાસં જાનામિ, દિબ્બચક્ખું વિસોધિતં;

તેવિજ્જો ઇદ્ધિપત્તોમ્હિ, ચેતોપરિયાય કોવિદો.

એવં ખો ભન્તે ઉદાનવસેન ભાસિતં.

કાવેય્ય મત્તા વિચરિમ્હ પુબ્બે; ગામાગામંપુરાપુરં,

અથદ્દસામ સમ્બુદ્ધં, સદ્ધા નો ઉપપજ્જથ.

સો મે ધમ્મમદેસેસિ, ખન્ધાયતન ધાતુયો;

તસ્સાહં ધમ્મં સુત્વાન, પબ્બજિં અનગારિયં.

બહુન્નં વત અત્થાય, બોધિં અજ્ઝગમા મુનિ;

ભિક્ખૂનં ભિક્ખુની નઞ્ચ, યે નિયામગતદ્દસા.

સ્વાગતં વત મે આસિ, મમ બુદ્ધસ્સ સન્તિકે;

તસ્સો વિજ્જા અનુપ્પત્તા, કતં બુદ્ધસ્સ સાસનં.

પુબ્બેનિવાસં જાનામિ; દિબ્બચક્ખુ વિસોધિતં;

તેવિજ્જો ઇદ્ધિપત્તોમ્હિ, ચેતોપરિયાયકોવિદો.