મૂલપણ્ણાસપાળિ

સંગાયનસ્સ પુચ્છા વિસ્સજ્જના

પુચ્છા – પઠમમહાસંગીતિકાલે આવુસો ધમ્મસંગાહકા મહાકસ્સપાદયો મહાથેરવરા દીઘનિકાયં સંગાયિત્વા તદનન્તરં કિં નામ પાવચનં સંગાયિંસુ.

વિસ્સજ્જના – પઠમમહાસંગીતિકાલે ભન્તે ધમ્મસંગાહકા મહાકસ્સપાદયો મહાથેરવરા દીઘનિકાયં સંગાયિત્વા તદનન્તરં મજ્ઝિમં નામ નિકાયં સંગાયિંસુ.

પુચ્છા – મજ્ઝિમનિકાયો નામ આવુસો મૂલપણ્ણાસકો મજ્ઝિમ પણ્ણાસકો ઉપરિપણ્ણાસકોતિ પણ્ણાસકવસેન તિવિધો, તત્થ કતરં પણ્ણાસકં પઠમં સંગાયિંસુ.

વિસ્સજ્જના – તીસુ ભન્તે પણ્ણાસકેસુ મૂલપણ્ણાસકં નામ પાવચનં ધમ્મસંગાહકા મહાથેરવરા પઠમં સંગાયિંસુ.

પુચ્છા – મૂલપણ્ણાસકેપિ આવુસો પઞ્ચવગ્ગા પણ્ણાસ ચ સુત્તાનિ, તેસુ કતરં વગ્ગં કતરઞ્ચ સુત્તં પઠમં સંગાયિંસુ.

વિસ્સજ્જના – મૂલપણ્ણાસકે ભન્તે પઞ્ચસુ વગ્ગેસુ પઠમં મૂલપરિયાયવગ્ગં પણ્ણાસકેસુ ચ સુત્તેસુ પઠમં મૂલપરિયાયસુત્તં સંગાયિંસુ.

સાધુ આવુસો મયમ્પિ દાનિ તતોયેવ પટ્ઠાય સંગીતિપુબ્બઙ્ગમાનિ પુચ્છાવિસ્સજ્જનકિચ્ચાનિ કાતું સમારભામ.

મૂલપરિયાયસુત્ત

પુચ્છા – તેન આવુસો ભગવતા જાનતા પસ્સતા અરહતા સમ્માસમ્બુદ્ધેન મૂલપરિયાયસુત્તં કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – ઉક્કટ્ઠાયં ભન્તે પઞ્ચસતે બ્રાહ્મણકુલા પબ્બજિતે આરબ્ભ ભાસિતં, પઞ્ચસતા ભન્તે બ્રાહ્મણકુલા પબ્બજિતા ભિક્ખૂ પરિયત્તિં નિસ્સાય માનં ઉપ્પાદેસું, તસ્મિં ભન્તે વત્થુસ્મિં ભાસિતં.

પુચ્છા – તં પનાવુસો સુત્તં ભગવતા કતિહિ વારેહિ કતિહિ ચ અન્તોગધપદેહિ વિભજિત્વા ભાસિતં.

વિસ્સજ્જના – તં પન ભન્તે મૂલપરિયાયસુત્તં ભગવતા અટ્ઠહિ ચ વારેહિ ચતુવીસતિયા ચ અન્તોગધપદેહિ વિભજિત્વા દેસિતં.

સબ્બાસવસુત્ત

પુચ્છા – દુતિયં પનાવુસો સબ્બાસવસુત્તં ભગવતા કત્થ કં આરબ્ભ ભાસિતં.

વિસ્સજ્જના – સબ્બાસવસુત્તં પન ભન્તે ભગવતા સાવત્થિયં સમ્બહુલે ભિક્ખૂ આરબ્ભ ભાસિતં.

પુચ્છા – તત્થાવુસો ભગવતા આસવા કતિહિ પકારેહિ વિભજિત્વા દસ્સિતા.

વિસ્સજ્જના – સત્તહિ ભન્તે પકારેહિ વિભજિત્વા આસવા ભગવતા પકાસિતા.

ધમ્મદાયાદસુત્ત

પુચ્છા – ધમ્મદાયાદસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં, ભગવતો ચ ભન્તે ભિક્ખુસઙ્ઘસ્સ ચ તદા મહાલાભસક્કારો ઉદપાદિ, તસ્મિં ભન્તે વત્થુસ્મિં ભાસિતં.

પુચ્છા – તત્થાવુસો દ્વે અનુસન્ધયો, તેસુ પઠમે અનુસન્ધિમ્હિ કથં ભગવતા ભિક્ખૂનં ઓવાદો દિન્નો.

વિસ્સજ્જના – પઠમે ભન્તે અનુસન્ધિમ્હિ ધમ્મદાયાદા મે ભિક્ખવે ભવથ મા આમિસદાયાદા, અત્થિ મે તુમ્હેસુ અનુકમ્પા, કિન્તિ મે સાવકા ધમ્મદાયાદા ભવેય્યું નો આમિસદાયાદાતિ એવમાદિના ભગવતા ભિક્ખૂનં ઓવાદો દિન્નો.

ધમ્મદાયાદા મે ભિક્ખવે ભવથ મા આમિસદાયાદા, અત્થિ મે તુમ્હેસુ અનુકમ્પા કિન્તિ મે સાવકા ધમ્મદાયાદા ભવેય્યું, નો આમિસદાયાદા.

પુચ્છા – દુતિયે પનાવુસો અનુસન્ધિમ્હિ આયસ્મતા સારિપુત્તત્થેરેન ધમ્મસેનાપતિના કીદિસી ધમ્મદેસના વિભજિત્વા પકાસિતા.

વિસ્સજ્જના – દુતિયે પન ભન્તે અનુસન્ધિમ્હિ આયસ્મતા સારિપુત્તત્થેરેન ધમ્મસેનાપતિના સત્થુ પવિવિત્તસ્સ વિહરતો સાવકાનં વિવેકં અનનુસિક્ખતં તીહિ ઠાનેહિ ગારયુતં, અનુસિક્ખન્તાનઞ્ચ તીહિ ઠાનેહિ પાસંસતં, સોળસ ચ પાપકે ધમ્મે તેસઞ્ચ પહાનાય મજ્ઝિમા પટિપદા વિભજિત્વા પકાસિતા.

ભયભેરવસુત્ત

પુચ્છા – ભયભેરવસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે જાણુસ્સોણિં બ્રાહ્મણં આરબ્ભ ભાસિતં, જાણુસ્સોણિ ભન્તે બ્રાહ્મણો ભગવન્તં ઉપસઙ્કમિત્વા એતદવોચ ‘‘યે મે ભો ગોતમ કુલપુત્તા ભવન્તં ગોતમં ઉદ્દિસ્સ સદ્ધા અગારસ્મા અનગારિયં પબ્બજિતા, ભવં તેસં ગોતમો પુબ્બઙ્ગમો, ભવં

તેસં ગોતમો બહુકારો, ભવં તેસં ગોતમો સમાદપેતા, ભોતો ચ પન ગોતમસ્સ સા જનતા દિટ્ઠાનુગતિં આપજ્જતી’’તિ, તસ્મિં ભન્તે વત્થુસ્મિં ભાસિતં.

અનઙ્ગણસુત્ત

પુચ્છા – અનઙ્ગણસુત્તં પનાવુસો કત્થ કં આરબ્ભ કેન ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં.

આકઙ્ખેય્યસુત્ત

પુચ્છા – આકઙ્ખેય્યસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

વત્થસુત્ત

પુચ્છા – વત્થસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

સલ્લેખસુત્ત

પુચ્છા – સલ્લેખસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે આયસ્મન્તં મહાચુન્દં આરબ્ભ ભાસિતં, આયસ્મા મહાચુન્દો ભન્તે ભગવન્તં ઉપસઙ્કમિત્વા એતદવોચ ‘‘યા ઇમા ભન્તે અનેકવિહિતા દિટ્ઠિયો લોકે ઉપ્પજ્જન્તિ, અત્તવાદપટિસંયુત્તા વા લોકવાદપટિસંયુત્તા વા, આદિમેવ નુ ખો ભન્તે ભિક્ખુનો મનસિકરોતો એવમેતાસં દિટ્ઠીનં પહાનં હોતિ, એવમેતાસં દિટ્ઠીનં પટિનિસ્સગ્ગો હોતી’’તિ, તસ્મિં ભન્તે વત્થુસ્મિં ભાસિતં.

પુચ્છા – તત્થ ચ આવુસો કતિ પરિયાયા કતિ ચ અન્તોગધપદાનિ ભગવતા વિભજિત્વા પકાસિતાનિ.

વિસ્સજ્જના – તત્થ ભન્તે પઞ્ચ પરિયાયા ચતુચત્તાલીસ ચ અન્તોગધપદાનિ ભગવતા વિત્થારેન ભાસિતાનિ.

સમ્માટ્ઠિસુત્ત

પુચ્છા – સમ્માદિટ્ઠિસુત્તં પનાવુસો કત્થ કં આરબ્ભ કેન ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

મહાસતિપટ્ઠાનસુત્ત

પુચ્છા – મહાસતિપટ્ઠાનસુત્તં પનાવુસો યોગાવચરાનં બહુપકારત્તા દીઘનિકાયે ચ ઇધ ચાતિ દ્વીસુ નિકાયેસુ પોરાણકેહિ સંગીતિકારેહિ દ્વિક્ખત્તું સંગાયિત્વા વિત્થારેન પતિટ્ઠાપિતં, તં અમ્હેહિ દીઘનિકાયે યથાનુપ્પત્તવસેન પુચ્છિતઞ્ચ વિસ્સજ્જિતઞ્ચ. તથાપિ યોગાવચરાનં બહુપકારત્તાયેવ તં ઇદાનિપિ યથાનુપ્પત્તવસેન પુન પુચ્છિસ્સામિ, તં પનેતં આવુસો મહાસતિપટ્ઠાનસુત્તં ભગવતા કત્થ કં આરબ્ભ ભાસિતં.

વિસ્સજ્જના – કુરૂસુ ભન્તે કમ્માસધમ્મે નામ કુરૂનં નિગમે સમ્બહુલે ભિક્ખૂ આરબ્ભ ભાસિતં.

પુચ્છા – કથઞ્ચાવુસો તત્થ આનાપાનસ્સતિ કાયાનુપસ્સના ભગવતા વિભજિત્વા પકાસિતા.

વિસ્સજ્જના – ઇધ ભિક્ખવે ભિક્ખુ અરઞ્ઞગતો વા રુક્ખમૂલગતો વા સુઞ્ઞાગારગતો વા નિસીદતિ પલ્લઙ્કં આભુજિત્વા ઉજું કાયં પણિધાય પરિમુખં સતિં ઉપટ્ઠપેત્વા સો સતોવ અસ્સસતિ, સતોવ પસ્સસતિ, દીઘં વા અસ્સસન્તો ‘દીઘં અસ્સસામી’તિ પજાનાતિ, દીઘં વા પસ્સસન્તો ‘દીઘં પસ્સસામી’તિ પજાનાતિ, એવમાદિના ભન્તે તત્થ આનાપાનસ્સતિ કાયાનુપસ્સના ભગવતા વિભજિત્વા પકાસિતા.

પુચ્છા – કથઞ્ચાવુસો તત્થ ઇરિયાપથકાયાનુપસ્સના ભગવતા વિભજિત્વા પકાસિતા.

વિસ્સજ્જના – પુન ચપરં ભિક્ખવે ભિક્ખુ ગચ્છન્તો વા ગચ્છામીતિ પજાનાતિ, ઠિતો વા ઠિતોમ્હીતિ પજાનાતિ, નિસિન્નો વા નિસિન્નોમ્હીતિ પજાનાતિ, સયાનો વા સયાનોમ્હીતિ પજાનાતિ, એવમાદિના ભન્તે ભગવતા ઇરિયાપથકાયાનુપસ્સના ભાવના વિભજિત્વા પકાસિતા.

પુચ્છા – કથઞ્ચાવુસો તત્થ સમ્પજઞ્ઞકાયાનુપસ્સના ભગવતા વિભજિત્વા પકાસિતા.

વિસ્સજ્જના – પુન ચપરં ભિક્ખવે ભિક્ખુ અભિક્કન્તે પટિક્કન્તે સમ્પજાનકારી હોતિ, આલોકિતે વિલોકિતે સમ્પજાનકારી હોતિ, સમિઞ્જિતે પસારિતે સમ્પજાનકારી હોતિ, સઙ્ઘાટિપત્તચીવરધારણે સમ્પજાનકારી હોતિ, અસિતે પીતે ખાયિતે સાયિતે સમ્પજાનકારી હોતિ, ઉચ્ચારપસ્સાવકમ્મે સમ્પજાનકારી હોતિ, ગતે ઠિતે નિસિન્ને સુત્તે જાગરિતે ભાસિતે તુણ્હીભાવે સમ્પજાનકારી હોતિ, એવમાદિના ભન્તે ભગવતા તત્થ સમ્પજઞ્ઞકાયાનુપસ્સના વિભજિત્વા પકાસિતા.

પુચ્છા – કથઞ્ચાવુસો તત્થ પટિકૂલમનસિકારકાયાનુપસ્સના ભગવતા વિભજિત્વા પકાસિતા.

વિસ્સજ્જના – પુન ચપરં ભિક્ખવે ભિક્ખુ ઇમમેવ કાયં ઉદ્ધં પાદતલા અધો કેસમત્થકા તચપરિયન્તં પૂરં નાનપ્પકારસ્સ અસુચિનો પચ્ચવેક્ખતિ અત્થિ ઇમસ્મિં કાયે કેસાલોમા નખા દન્તા તચો એવમાદિના ભન્તે તત્થ ભગવતા પટિકૂલમનસિકારકાયાનુપસ્સના વિભજિત્વા પકાસિતા.

પુચ્છા – કથઞ્ચાવુસો તત્થ ધાતુમનસિકારકાયાનુપસ્સના ભગવતા વિભજિત્વા પકાસિતા.

વિસ્સજ્જના – પુન ચપરં ભિક્ખવે ભિક્ખુ ઇમમેવ કાયં યથાઠિતં યથાપણિહિતં ધાતુસો પચ્ચવેક્ખતિ અત્થિ ઇમસ્મિં કાયે પથવીધાતુ આપોધાતુ તેજોધાતુ વાયોધાતુ એવમાદિના ભન્તે ભગવતા ધાતુમનસિકારકાયાનુપસ્સના વિભજિત્વા પકાસિતા.

પુચ્છા – કથઞ્ચાવુસો તત્થ નવ સિવથિકકાયાનુપસ્સના ભગવતા વિભજિત્વા પકાસિતા.

વિસ્સજ્જના – પુન ચપરં ભિક્ખવે ભિક્ખુ સેય્યથાપિ પસ્સેય્ય સરીરં સિવથિકાય છડ્ડિતં એકાહમતં વા દ્વીહમતં વા તીહમતં વા ઉદ્ધુમાતકં વિનીલકં વિપુબ્બકજાતં સો ઇમમેવ કાયં ઉપસંહરતિ ‘‘અયમ્પિ ખો કાયો એવંધમ્મો એવંભાવી એવંઅનતીતો’’તિ એવમાદિના ભન્તે તત્થ ભગવતા નવ સિવથિકકાયાનુપસ્સના ભાવના વિભજિત્વા પકાસિતા.

પુચ્છા – કથઞ્ચાવુસો તત્થ વેદનાનુપસ્સના ભગવતા વિભજિત્વા દેસિતા.

વિસ્સજ્જના – ઇધ ભિક્ખવે ભિક્ખુ સુખં વા વેદનં વેદયમાનો ‘‘સુખં વેદનં વેદયામી’’તિ પજાનાતિ, દુક્ખં વા વેદનં વેદયમાનો ‘‘દુક્ખ વેદનં વેદયામી’’તિ પજાનાતિ, અદુક્ખમસુખં વા વેદનં વેદયમાનો ‘‘અદુક્ખમસુખં વેદનં વેદયામી’’તિ પજાનાતિ, એવમાદિના ભન્તે તત્થ ભગવતા વેદનાનુપસ્સના વિભજિત્વા પકાસિતા.

પુચ્છા – કથઞ્ચાવુસો તત્થ ચિત્તાનુપસ્સના ભગવતા વિભજિત્વા દેસિતા.

વિસ્સજ્જના – ઇધ ભિક્ખવે ભિક્ખુ સરાગં વા ચિત્તં ‘‘સરાગં ચિત્ત’’ન્તિ પજાનાતિ, વીતરાગં વા ચિત્તં ‘‘વીતરાગં ચિત્ત’’ન્તિ પજાનાતિ, સદોસં વા વીતદોસં વા સમોહં વા વીતમોહં વા સંખિત્તં વા ચિત્તં ‘‘સંખિત્તં ચિત્ત’’ન્તિ પજાનાતિ, વિક્ખિત્તં વા ચિત્તં ‘‘વિક્ખિત્તં ચિત્ત’’ન્તિ પજાનાતિ, એવમાદિના તત્થ ભગવતા ચિત્તાનુપસ્સના વિભજિત્વા પકાસિતા.

પુચ્છા – કથઞ્ચાવુસો તત્થ ધમ્માનુપસ્સના ભગવતા વિભજિત્વા દેસિતા, તં સઙ્ખેપમત્તેનેવ વિસ્સજ્જેહિ.

વિસ્સજ્જના – ઇધ ભિક્ખવે ભિક્ખુ ધમ્મેસુ ધમ્માનુપસ્સી વિહરતિ, પઞ્ચસુ નીવરણેસુ એવમાદિના ભન્તે તત્થ ભગવતા પઞ્ચહિ પબ્બેહિ ધમ્માનુપસ્સના વિભજિત્વા પકાસિતા.

ચૂળસીહનાદસુત્ત

પુચ્છા – ચૂળનસીહનાદસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે પરિહીનલાભસક્કારે નાનાતિત્થિયે આરબ્ભ ભાસિતં, નાનાતિત્થિયા ભન્તે પરિહીનલાભસક્કારા તેસુ તેસુ ઠાનેસુ પરિદેવિંસુ, ચતસ્સો ચ ભન્તે પરિસા ભગવતો એકમત્થં આરોચેસું, તસ્મિં ભન્તે વત્થુસ્મિં ભાસિતં.

મહાસીહનાદસુત્ત

પુચ્છા – તેનાવુસો ભગવતા જાનતા પસ્સતા અરહતા સમ્માસમ્બુદ્ધેન મહાસીહનાદસુત્તં કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – વેસાલિયં ભન્તે સુનક્ખત્તં લિચ્છવિપુત્તં આરબ્ભ ભાસિતં, સનુક્ખત્તો ભન્તે લિચ્છવિપુત્તો અચિરપક્કન્તો હોતિ ઇમસ્મા ધમ્મવિનયા, સો વેસાલિયં પરિસતિ એવં વાચં ભાસતિ ‘‘નત્થિ સમણસ્સ ગોતમસ્સ ઉત્તરિમનુસ્સધમ્મા અલમરિયઞાણદસ્સનવિસેસો, તક્કપરિયાહતં સમણો ગોતમો ધમ્મં દેસેતિ વીમંસાનુચરિતં સયં પટિભાનં. યસ્સ ચ ખ્વાસ્સ અત્થાય ધમ્મો દેસિતો, સો નિય્યાતિ તક્કરસ્સ સમ્મા દુક્ખક્ખયાયા’’તિ, એતમત્થં ભન્તે આયસ્મા સારિપુત્તો ભગવતો આરોચેસિ, તસ્મિં ભન્તે વત્થુસ્મિં ભાસિતં.

પુચ્છા – કતિ પનાવુસો તત્થ ભગવતા તથાગતસ્સ તથાગતબલાનિ વિભજિત્વા પકાસિતાનિ, યેહિ બલેહિ સમન્નાગતો તથાગતો આસભં ઠાનં પટિજાનાતિ, પરિસાસુ સીહનાદં નદતિ, બ્રહ્મચક્કં પવત્તેતિ.

વિસ્સજ્જના – દસ ભન્તે તથાગતસ્સ તથાગતબલાનિ ભગવતા વિભજિત્વા પકાસિતાનિ, યેહિ બલેહિ સમન્નાગતો તથાગતો આસભં ઠાનં પટિજાનાતિ, પરિસાસુ સીહનાદં નદતિ, બ્રહ્મચક્કં પવત્તેતિ.

પુચ્છા – કથઞ્ચાવુસો તત્થ ભગવતા ચતુવેરજ્જઞાણાનિ વિભજિત્વા પકાસિતાનિ, યેહિ વેસારજ્જેહિ સમન્નાગતો તથાગતો આસભં ઠાનં પટિજાનાતિ, પરિસાસુ સીહનાદં નદતિ, બ્રહ્મચક્કં પવત્તેતિ.

વિસ્સજ્જના – ખીણાસવસ્સ તે પટિજાનતો ઇમે આસવા અપરિક્ખીણાતિ તત્ર વત મં સમણો વા બ્રાહ્મણો વા દેવો વા મારો વા બ્રહ્મા વા કોચિ વા લોકસ્મિં સહધમ્મેન પટિચોદેસ્સતીતિ નિમિત્તમેતં સારિપુત્ત ન સમનુપસ્સામિ, એતમહં સારિપુત્ત નિમિત્તં અસમનુપસ્સન્તો ખેમપ્પત્તો અભયપ્પત્તો વેસારજ્જપ્પત્તો વિહરામિ. એવમાદિના ભન્તે તત્થ ચતુવેસારજ્જઞાણાનિ ભગવતા વિત્થારેન વિભજિત્વા પકાસિતાનિ.

પુચ્છા – કથઞ્ચાવુસો તત્થ ભગવતા પઞ્ચગતિપરિચ્છેદઞાણં વિભજિત્વા પકાસિતં.

વિસ્સજ્જના – પઞ્ચ ખો ઇમા સારિપુત્ત ગતિયો, કતમા પઞ્ચ, નિરયો તિરચ્છાનયોનિ પેત્તિવિસયો મનુસ્સા દેવા, એવમાદિના ભન્તે ભગવતા તત્થ પઞ્ચગતિપરિચ્છેદકઞાણં વિભજિત્વા પકાસિતં.

પુચ્છા – કથઞ્ચાવુસો તત્થ તથાગતો અત્તનો પઞ્ઞાવેય્યત્તિયા અપરિહાનિં પકાસેસિ.

વિસ્સજ્જના – સન્તિ ખો પન સારિપુત્ત એકે સમણબ્રાહ્મણા એવંવાદિનો એવંદિટ્ઠિનો યાવદેવાયં ભવં પુરિસો દહરો હોતિ, એવમાદિના ભન્તે તત્થ તથાગતો અત્તનો પઞ્ઞાવેય્યત્તિયા અપરિહાનિં પકાસેસિ.

મહાદુક્ખક્ખન્ધસુત્ત

પુચ્છા – મહાદુક્ખક્ખન્ધસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે અઞ્ઞતિત્થિયે આરબ્ભ ભાસિતં, સમ્બહુલા ભન્તે અઞ્ઞતિત્થિયા ભિક્ખૂ એતદવોચું ‘‘સમણો આવુસો ગોતમો કામાનં પરિઞ્ઞં પઞ્ઞપેતિ, મયમ્પિ કામાનં પરિઞ્ઞં પઞ્ઞપેમ, સમણો આવુસો ગોતમો રૂપાનં વેદનાનં પરિઞ્ઞં પઞ્ઞપેતિ, મયમ્પિ રૂપાનં વેદનાનં પરિઞ્ઞં પઞ્ઞપેમ, ઇધ નો આવુસો કો વિસેસો, કો અધિપ્પયાસો, કિં નાનાકરણં સમણસ્સ વા ગોતમસ્સ અમ્હાકં વા યદિદં ધમ્મદેસનાય વા ધમ્મદેસનં અનુસાસનિયા વા અનુસાસનિ’’ન્તિ, એતમત્થં ભિક્ખૂ ભગવતો આરોચેસું, તસ્મિં ભન્તે વત્થુસ્મિં ભાસિતં.

ચૂળદુક્ખક્ખન્ધસુત્ત

પુચ્છા – ચૂળદુક્ખક્ખન્ધસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં મહાનામં સક્કં આરબ્ભ ભાસિતં, મહાનામો ભન્તે સક્કો ભગવન્તં ઉપસઙ્કમિત્વા એતદવોચ ‘‘દીઘરત્તાહં ભન્તે ભગવતા એવં ધમ્મં દેસિતં આજાનામિ ‘લોભો ચિત્તસ્સ ઉપક્કિલેસો, દોસો ચિત્તસ્સ ઉપક્કિલેસો, મોહો ચિત્તસ્સ ઉપક્કિલેસો’તિ, એવઞ્ચાહં ભન્તે ભગવતા ધમ્મં દેસિતં આજાનામિ ‘લોભો ચિત્તસ્સ ઉપક્કિલેસો, દોસો ચિત્તસ્સ ઉપક્કિલેસો, મોહો ચિત્તસ્સ ઉપક્કિલેસો’તિ. અથ ચ પન મે એકદા લોભધમ્માપિ ચિત્તં પરિયાદાય તિટ્ઠન્તિ, દોસધમ્માપિ ચિત્તં પરિયાદાય તિટ્ઠન્તિ, મોહધમ્માપિ ચિત્તં પરિયાદાય તિટ્ઠન્તિ, તસ્સ મય્હં ભન્તે એવં હોતિ ‘કો સુ નામ મે ધમ્મો અજ્ઝત્તં અપ્પહિનો, યેન મે એકદા લોભધમ્માપિ ચિત્તં પરિયાદાય તિટ્ઠન્તિ, દોસધમ્માપિ ચિત્તં પરિયાદાય તિટ્ઠન્તિ, મોહધમ્માપિ ચિત્તં પરિયાદાય તિટ્ઠન્તી’તિ’’, તસ્મિં ભન્તે વત્થુસ્મિં ભાસિતં.

અનુમાનસુત્ત

પુચ્છા – અનુમાનસુત્તં પનાવુસો કત્થ કં આરબ્ભ કેન ભાસિતં.

વિસ્સજ્જના – ભગ્ગેસુ ભન્તે સુસુમારગિરે ભેસકળાવને આયસ્મતા મહામોગ્ગલ્લાનત્થેરેન સમ્બહુલે ભિક્ખૂ આરબ્ભ ભાસિતં.

ચેતોખિલસુત્ત

પુચ્છા – ચેતોખિલસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

વનપત્થસુત્ત

પુચ્છા – વનપત્થસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

મધુપિણ્ડિકસુત્ત

પુચ્છા – મધુપિણ્ડિકસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સક્કેસુ ભન્તે દણ્ડપાણિં સક્કં આરબ્ભ ભાસિતં, દણ્ડપાણિ ભન્તે સક્કો ભગવન્તં ઉપસઙ્કમિત્વા એતદવોચ ‘‘કિં વાદી સમણો કિમક્ખાયી’’તિ, તસ્મિં ભન્તે વત્થુસ્મિં ભાસિતં.

દ્વેધાવિતક્કસુત્ત

પુચ્છા – દ્વેધાવિતક્કસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

વિતક્કસણ્ઠાનસુત્ત

પુચ્છા – વિતક્કસણ્ઠાનસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

કકચૂપમસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન કકચૂપમસુત્તં કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે આયસ્મન્તં મોળિયફગ્ગુનં આરબ્ભ ભાસિતં, આયસ્મા ભન્તે મોળિયફગ્ગુનો ભિક્ખુનીહિ સદ્ધિં અતિવેલં સંસટ્ઠો વિહરતિ, તસ્મિં ભન્તે વત્થુસ્મિં ભાસિતં.

પુચ્છા – અથ ખો આવુસો આયસ્મતો મોળિયફગ્ગુનસ્સ તં ભગવતો ઓવાદં સુત્વા કથં ચિત્તં ઉપ્પન્નં, કથઞ્જ ભગવા ઉત્તરિ ભિક્ખૂન ઓવાદમદાસિ.

વિસ્સજ્જના – અથ ખો ભન્તે મોળિયફગ્ગુનસ્સ ભગવતો ઇમં ઓવાદં સુત્વા ભિક્ખુનિસંસગ્ગતો ઓરમિસ્સામિ વિરમિસ્સામીતિપિ ચિત્તં ન ઉપ્પન્નં, અસંવરમેવ ભન્તે ચિત્તં ઉપ્પન્નં, ભગવા ચ ભન્તે આરાધયિંસુ વત મે ભિક્ખવે ભિક્ખૂ એકં સમયં ચિત્તં, એવમાદિના ઉત્તરિ ભિક્ખૂનં ઓવાદમદાસિ.

ઉભતો દણ્ડકેન ચેપિ ભિક્ખવે કકચેન ચોરા ઓચરકા અઙ્ગમઙ્ગાનિ ઓકન્તેય્યું.

અલગદ્દૂપમસુત્ત

પુચ્છા – અલગદ્દૂપમસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે અરિટ્ઠં ભિક્ખું ગદ્ધબાધિપુબ્બં આરબ્ભ ભાસિતં, અરિટ્ઠસ્સ ભન્તે ભિક્ખુનો ગદ્ધબાધિપુબ્બસ્સ એવરૂપં પાપકં દિટ્ઠિગતં ઉપ્પન્નં ‘‘તથાહં ભગવતા ધમ્મં દેસિતં આજાદામિ, યથા યેમે અન્તરાયિકા ધમ્મા વુત્તા ભગવતા, તે પટિસેવતો નાલં અન્તરાયાયા’’તિ, તસ્મિં ભન્તે વત્થુસ્મિં ભાસિતં.

પુચ્છા – અથ ખો આવુસો આયસ્મતો અરિટ્ઠસ્સ ગદ્ધબાધિપુબ્બસ્સ કથં ચેતસો પરિવિતક્કો ઉદપાદિ, કથઞ્ચ ભગવા ઉત્તરિ ભિક્ખુનં ધમ્મદેસનં પવત્તેસિ.

વિસ્સજ્જના – અથ ખો ભન્તે અરિટ્ઠસ્સ ભિક્ખુનો ગદ્ધબાધિપુબ્બસ્સ ‘‘કિઞ્ચાપિ મં ભગવા મોઘપુરિસવાદેન વદેસિ, ન ખો પન મે મગ્ગફલાનં ઉપનિસ્સયો ન હોતિ, સ્વાહં આરભિત્વા ઘટ્ટેત્વા મગ્ગફલાનિ નિબ્બત્તેસ્સામી’’તિ, એવં ખો ભન્તે ચેતસો પરિવિતક્કો ઉદપાદિ, ભગવા ચ ભન્તે દુપ્પઞ્ઞસ્સ અલગદ્દૂપમં દસ્સેત્વા અલગદ્દૂપમં પરિયત્તિઞ્ચ દસ્સેત્વા પઞ્ઞવતો અલગદ્દૂપમાય ચ કુલ્લૂપમાય ચ પઞ્ઞવતો નિસ્સરણપરિયત્તિં દસ્સેત્વા છ ચ દિટ્ઠિટ્ઠાનાનિ, તેસઞ્ચ છન્નં દિટ્ઠિટ્ઠાનાનં વિનિવેઠનાકારં દસ્સેત્વા પરિયોસાને ચ ખન્ધકમ્મટ્ઠાનં અરહત્તનિકૂટેન દસ્સેત્વા ઉત્તરિ ભિક્ખૂનં ધમ્મકથં પવત્તેસિ.

વમ્મિકસુત્ત

પુચ્છા – ધમ્મિકસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે આયસ્મન્તં કુમારકસ્સપં આરબ્ભ ભાસિતં. આયસ્મા ભન્તે કુમારકસ્સપો ભગવન્તં ઉપસઙ્કમિત્વા વમ્મિકપઞ્હં પુચ્છિ, તસ્મિં ભન્તે વત્થુસ્મિં ભાસિતં.

રથવિનીતસુત્ત

પુચ્છા – રથવિનીતસુત્તં પનાવુસો કત્થ કેન ભાસિતં.

વિસ્સજ્જના – સાવત્થિયં ભન્તે આયસ્મતા ચ સારિપુત્તત્થેરેન ધમ્મસેનાપતિના આયસ્મતા ચ પુણ્ણેન મન્તાણિપુત્તેન અઞ્ઞમઞ્ઞં પુચ્છાવિસ્સજ્જનવસેન ભાસિતં.

નિવાપસુત્ત

પુચ્છા – નિવાપસુત્તં પનાવુસો ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં.

પુચ્છા – ઇમસ્મિં આવુસો સુત્તે કો નિવાપો કો નેવાપિકો કા નેવાપિકપરિસા કા મિગજાતા કથઞ્ચેતિસ્સા ઉપમાય અત્થો દટ્ઠબ્બો.

વિસ્સજ્જના – ઇમસ્મિં ભન્તે સુત્તે નિવાપોતિ ખો ભન્તે પઞ્ચન્નેતં કામગુણાનં અધિવચનં, નેવાપિકોતિ ખો ભન્તે મારસ્સેતં પાપિમતો અધિવચનં, નેવાપિકપરિસાતિ ખો ભન્તે મારપરિસાયેતં અધિવચનં, મિગજાતાતિ ખો ભન્તે સમણબ્રાહ્મણાનમેતં અધિવચનં, ઇમસ્મિં ભન્તે સુત્તે એતસ્સ અત્થો એવં દટ્ઠબ્બો.

પાસરાસિસુત્ત

પુચ્છા – કેનાવુસો ભગવતા…પે… સમ્માસમ્બુદ્ધેન પાસરાસિસુત્તં કત્થ કં આરબ્ભ કિસ્મિં વત્થુસ્મિં ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં, સમ્બહુલા ભન્તે ભિક્ખૂ રમ્મકસ્સ બ્રાહ્મણસ્સ અસ્સમે ભગવન્તં આરબ્ભ ધમ્મિયા કથાય સન્નિસીદિંસુ, તસ્મિં ભન્તે વત્થુસ્મિં ભાસિતં.

પુચ્છા – અથ ખો આવુસો તેસં સમ્બહુલાનં ભિક્ખૂનં ધમ્મિયા કથાય સન્નિસિન્નાનં કીદિસં ધમ્મકથં કથેસિ.

વિસ્સજ્જના – સાધુ ભિક્ખવે એતં ખો ભિક્ખવે તુમ્હાકં પતિરૂપં કુલપુત્તાનં સદ્ધા અગારસ્મા અનગારિયં પબ્બજિતાનં, યં તુમ્હે ધમ્મિયા કથાય સન્નિસીદેય્યાથ, સન્નિપતિતાનં વો ભિક્ખવે દ્વયં કરણીયં ધમ્મી વા કથા અરિયો વા તુણ્હીભાવો. દ્વેમા ભિક્ખવે પરિયેસના અરિયા ચ પરિયેસના અનરિયા ચ પરિયેસના. એવમાદિના ભન્તે ભગવા સન્નિપતિતાનં તેસં ભિક્ખૂનં અરિયપરિયેસનઞ્ચ અનરિયપરિયેસનઞ્ચ વિભજિત્વા દેસેસિ.

પુચ્છા – કથઞ્ચાવુસો ભગવા અત્તનાપિ અનરિયપરિયેસનં પહાય અરિયપરિયેસનાય પરિયેસિતભાવં પકાસેસિ.

વિસ્સજ્જના – અહમ્પિ સુદં ભિક્ખવે પુબ્બેવ સમ્બોધા અનભિસમ્બુદ્ધો બોધિસત્તોવ સમાનો અત્તના જાતિધમ્મો સમાનો જાતિધમ્મંયેવ પરિયેસામિ, અત્તના જરાધમ્મો બ્યાધિધમ્મો મરણધમ્મો સોકધમ્મો સંકિલેસધમ્મો સમાનો સંકિલેસધમ્મંયેવ પરિયેસામિ. એવમાદિના ભન્તે ભગવા અત્તનાપિ અનરિયપરિયેસનં પહાય અરિયપરિયેસનાય પરિયેસિતભાવં પકાસેસિ.

પુચ્છા – એવં પઠમાભિસમ્બુદ્ધસ્સ આવુસો ભગવતો અજપાલનિગ્રોધરુક્ખમૂલે નિસિન્નસ્સ ધમ્મદેસનાય કતસન્નિટ્ઠાનસ્સ કીદિસો

ચેતસો પરિવિતક્કો ઉદપાદિ, કથઞ્ચ ધમ્મદેસનાય ચારિકા અહોસિ, કથઞ્ચ પઠમા ધમ્મદેસના અહોસિ.

વિસ્સજ્જના – ‘‘કસ્સ નુ ખો અહં પઠમં ધમ્મં દેસેય્યં, કો ઇમં ધમ્મં ખિપ્પમેવ આજાનિસ્સતી’’તિ એવં ખો ભન્તે ભગવતો પઠમાભિસમ્બુદ્ધસ્સ અજપાલનિગ્રોધમૂલે ધમ્મદેસનાય કતસન્નિટ્ઠાનસ્સ પરિવિતક્કો ઉદપાદિ, અથ ભન્તે ભગવા ઉરુવેલાયં યથાભિરન્તં વિહરિત્વા યેન બારાણસી, તેન પદસાયેવ ચારિકં પક્કામિ ધમ્મદેસનાય, દ્વેમે ભિક્ખવે અન્તા પબ્બજિતેન ન સેવિતબ્બા, કતમે દ્વે, યો ચાયં કામેસુ કામસુખલ્લિકાનુયોગો હીનો ગામ્મો પોથુજ્જનિકો અનરિયો અનત્તસંહિતો, એવમાદિના ભન્તે ભગવતો પઠમા ધમ્મદેસના અહોસિ.

સબ્બાભિભૂ સબ્બવિદૂહમસ્મિ,

સબ્બધમ્મેસુ અનૂપલિત્તો;

સબ્બઞ્જહો તણ્હાક્ખયે વિમુત્તો,

સયં અભિઞ્ઞાય કમુદ્દિસેય્યં.

પુચ્છા – કથઞ્ચાવુસો ભગવા પાસરાસિઉપમાય તં દેસનં પરિનિટ્ઠાપેસિ.

વિસ્સજ્જના – પઞ્ચિમે ભિક્ખવે કામગુણા, કતમે પઞ્ચ, ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા. સોતવિઞ્ઞેય્યા સદ્દા. ઘાનવિઞ્ઞેય્યા ગન્ધા. જિવ્હાવિઞ્ઞેય્યા રસા. કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા. ઇમે ખો ભિક્ખવે પઞ્ચ કામગુણા. યે હિ કેચિ ભિક્ખવે સમણા વા બ્રાહ્મણા વા ઇમે કામગુણે ગથિતા મુચ્છિતા અજ્ઝોપન્ના અનાદીનવદસ્સાવિનો અનિસ્સરણપઞ્ઞા પરિભુઞ્જન્તિ, તે એવમસ્સુ વેદિતબ્બા ‘‘અનયમાપન્ના બ્યાસનમાપન્ના યથાકામકરણીયા પાપિમતો’’, એવમાદિના ભન્તે ભગવા પાસરાસિઉપમાય ધમ્મદેસનં પરિનિટ્ઠાપેસિ.

ચૂળહત્થિપદોપમસુત્ત