૧. રૂપાદિવગ્ગ

પુચ્છા – એકકનિપાતેપિ આવુસો રૂપાદિવગ્ગો નીવરણપ્પહાનવગ્ગો અકમ્મનિયવગ્ગોતિઆદિના વગ્ગભેદવસેન બહુવિધા. તત્થ કતરં વગ્ગં પઠમં સંગાયિંસુ.

વિસ્સજ્જના – એકકનિપાતે ભન્તે રૂપાદિવગ્ગો નીવરણપ્પહાનવગ્ગોતિઆદિના વીસતિયા વગ્ગેસુ રૂપાદિવગ્ગં પઠમં સંગાયિંસુ.

પુચ્છા – સાધુ સાધુ આવુસો, મયમ્પિ દાનિ આવુસો તતોયેવ પટ્ઠાય સંગાહનત્થાય સંગીતિપુબ્બઙ્ગમાનિ ધમ્મપુચ્છનવિસ્સજ્જનકિચ્ચાનિ આવહિતું સમારભામ. તેનાવુસો ભગવતા જાનતા પસ્સતા અરહતા સમ્માસમ્બુદ્ધેન અઙ્ગુત્તરનિકાયે એકકનિપાતે રૂપાદિવગ્ગે પુરિમાનિ પઞ્ચ સુત્તાનિ કત્થ કં આરબ્ભ કથઞ્ચ ભાસિતાનિ.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ રૂપાદિગરુકાનં પઞ્ચન્નં પુરિસાનં અજ્ઝાસયવસેન ‘‘નાહં ભિક્ખવે અઞ્ઞં એકરૂપમ્પિ સમનુપસ્સામિ, યં એવં પુરિસસ્સ ચિત્તં પરિયાદાય તિટ્ઠતિ, યથયિદં ભિક્ખવે ઇત્થિરૂપં, ઇત્થિરૂપં ભિક્ખવે પુરિસસ્સ ચિત્તં પરિયાદાય તિટ્ઠતી’’તિ એવમાદિના ભગવતા ભાસિતાનિ.

નાહં ભિક્ખવે અઞ્ઞં એકરૂપમ્પિ સમનુપસ્સામિ, યં એવં પુરિસસ્સ ચિત્તં પરિયાદાય તિટ્ઠતિ, યથયિદં ભિક્ખવે ઇત્થિરૂપં, ઇત્થિરૂપં ભિક્ખવે પુરિસસ્સ ચિત્તં પરિયાદાય તિટ્ઠતિ.

પુચ્છા – તત્થેવ આવુસો પચ્છિમાનિ પઞ્ચ સુત્તાનિ ભગવતા કત્થ કં આરબ્ભ કથઞ્ચ ભાસિતાનિ.

વિસ્સજ્જના – તસ્મિંયેવ ભન્તે સાવત્થિયં સમ્બહુલે ભિક્ખૂ આરબ્ભ રૂપાદિગરુકાનં પઞ્ચન્નં ઇત્થીનં અજ્ઝાસયવસેન ‘‘નાહં ભિક્ખવે અઞ્ઞં એકરૂપમ્પિ સમનુપસ્સામિ, યં એવં ઇત્થિયા ચિત્તં પરિયાદાય તિટ્ઠતિ, યથયિદં ભિક્ખવે પુરિસરૂપં, પુરિસરૂપં ભિક્ખવે ઇત્થિયા ચિત્તં પરિયાદાય તિટ્ઠતી’’તિ એવમાદિના ભગવતા ભાસિતાનિ.

નાહં ભિક્ખવે અઞ્ઞં એકરૂપમ્પિ સમનુપસ્સામિ, યં એવં ઇત્થિયા ચિત્તં પરિયાદાય તિટ્ઠતિ, યથયિદં ભિક્ખવે પુરિસરૂપં, પુરિસરૂપં ભિક્ખવે ઇત્થિયા ચિત્તં પરિયાદાય તિટ્ઠતિ.

નીતત્થવસેન, નેય્યત્થવસેન

પુચ્છા – ઇમસ્મિં આવુસો રૂપાદિવગ્ગે ભગવતા નીતત્થવસેન કિં કથિતં, નેય્યત્થવસેન પન કિં ઞાપિતં.

વિસ્સજ્જના – ઇમસ્મિં ભન્તે રૂપાદિવગ્ગે ભગવતા નીતત્થવસેન વટ્ટં કથિતં. નેય્યત્થવસેન પન વિવટ્ટમ્પિ ઞાપિતં.