૧૫૦. ભિદાદિતો નો ક્ત+ક્તવન્તૂનં

ભિદાદીહિ પરેસં ક્ત+ક્તવન્તૂનં તસ્સ નો હોતિ. આકતિગણો+યં. ‘‘ક્તો ભાવકમ્મેસૂ’’તિ કમ્મે ઉપરિ સબ્બત્થ ક્તો. ભિજ્જિત્થોતિ ભિન્નો, તસ્સ ને પરરૂપં. અભિન્દીતિ ભિન્નવા, ‘‘કત્તરિ ભૂતે’’ ચ્ચાદિના ક્તવન્તુ. એવ+મુપરિપિ. છિજ્જિત્થાતિ છિન્નો. અછિન્દીતિ છિન્નવા. છદ=અપવારણે, છાદીયિત્થાતિ છન્નો. અછાદયીતિ છન્નવા, ચુરાદિત્તા ણિ, તસ્સ ‘‘ણિણાપીનં તેસૂ’’તિ એત્થ ‘‘ણિ’’ ઇતિ યોગવિભાગા લોપો. ખિદ=અસહને, ખિજ્જીતિ ખિન્નો ખિન્નવા, કત્તરિ. એવ+મુપરિપિ. ઉપ્પજ્જીતિ ઉપ્પન્નો ઉપ્પન્નવા. સિદ=પાકે, અસિજ્જીતિ સિન્નો સિન્નવા. સદ=વિસરણગત્ય વસાદનાદાનેસુ, સિદીતિ સન્નો સન્નવા. પીનીતિ પીનો પીનવા. સૂ=પસવે, સૂનીતિ સૂનો. પસવીતિ સૂનવા. દી=ખયે, દીયીતિ દીનો દીનવા. ડી+લી=આકાસગમને, ડીયીતિ ડીનો ડીનવા. લીયિ લેયિ અલીયીતિ લીનો લીનવા. અલુયીતિ લૂનો લૂનવા.