પયોગસિદ્ધિ નિગમનં

૧. યે નન્તતન્તરતનાકરમન્થનેન,

મન્થાચલોલ્લસિતઞાણવરેન લદ્ધા;

સારામતા+તિસુખિતા સુખયન્તિ ચ+ઞ્ઞે,

તે મે જયન્તિ ગુરવો ગુરવો ગુણેહિ.

૨. યસ્સ સાધુગુણુબ્ભૂત-કિત્તિ સબ્બત્ત પત્થટા;

મોગ્ગલ્લાનો મહાપઞ્ઞો, જયતી સો હ સબ્બદા.

૩. પરમપ્પિચ્છતા+નેક-સન્તોસૂપસમેસિનં;

સુચિસલેખવુત્તીનં, સદા+રઞ્ઞનિવાસિનં.

૪. સાસનુજોતકારીન+માચેરત્ત+મુપાગતં;

ઉદુમ્બરગિરીખ્યાતા+યતનં યતિપુઙ્ગવં.

૫. મેધઙ્કરોતિ આખ્યાત-નામધેય્યં તપોધનં;

થેરં થિરદયા મેધા-નિધાનં સાધુ પૂજિતં.

૬. સિસ્સં સહાય+માગમ્મ, કલ્યાણમિત્ત+મત્તનો;

સોધેતું સાસનં સત્થુ, પરક્કમ+મકાસિ યો.

૭. સઙ્ઘરક્ખિતનામેન, મહાથેરેન ધીમતા;

નિવાસભૂતેના+નેક-ગુણાન+પ્પિચ્છતાદિનં.

૮. મોગ્ગલ્લાનબ્યાકરણ-પયોગક્કમસાધકા;

એત્તાવતા કતા એસા, પયોગસિદ્ધિ નિટ્ઠિતા.

૯. તેનેવ રચિતા સાધુ, સાસનોદયકારિના;

ખુદ્દસિક્ખાય ટીકા ચ, તથા સમ્બન્ધચિન્તના.

૧૦. સુસદ્દસિદ્ધિં યો યોગ-નિચ્છયં સબ્ભિ વણ્ણિતં;

અકા સુબોધાલઙ્કારં, તથા સમ્બન્ધચિન્તનં.

૧૧. સત્થસઞ્ચિતપુઞ્ઞેન, નિબ્બાનસાધકં હિતં;

સાધેન્તો લોકનાથસ્સ, સદ્ધમ્મો તિટ્ઠતં ચિરન્તિ.

ઇતિ સઙ્ઘરક્ખિતમહાસામિથેરપાદવિરચિતા

પયોગસિદ્ધિ નિટ્ઠિતા.

(વિસેસલક્ખણં). યથાવુત્તાનં પન પયોગસિદ્ધિનિગમન ગાથાનં એકાદસન્નં પુબ્બેયેવ વક્ખમાના ઇમા ગાથાયો દિસ્સન્તિ પોરાણે સીહળમૂલપયોગસિદ્ધિપાઠે. તા ચ ગાથાયો પચ્છા સીહળમૂલપયોગસિદ્ધિસંસોધકેન મેધઙ્કરોતિ ગરૂહિ ગહિતનામધેય્યેન થેરેન પક્ખિત્તાતિ વેદિતબ્બા, તસ્મા મયં તા ગાથાયો સબ્બપચ્છાયેવ ઇમસ્મિં-ઠાને ઠપેમ. તા પન ગાથાયો કતમાતિ ચે –

૧. ચાગવિક્કમસદ્ધાનુ-સમ્પન્નગુણસામિનો;

પરક્કમનરિન્દસ્સ, સીહળિન્દસ્સ ધીમતો.

૨. અત્રજેના+નુજાતેન, ભૂપાલકુલકેતુના;

દિસન્તપત્થટોદાર-વિક્કમેન યસસ્સિના.

૩. ભુવનેકભુજવ્હેન, મહારાજેન ધીમતા;

ચતુપચ્ચયદાનેન, સતતં સમુપટ્ઠિતો.

૪. ‘‘જમ્બુદોણી’’તિ વિખ્યાતા –

વાસે નિવસતો સતો;

સુમઙ્ગલમહત્થેર –

સામિનો સુચિવુત્તિનો.

૫. વંસે વિસુદ્ધે સંજાતો,

પન્થસેનાસને રતો;

પરિયત્તિમહાસિન્ધુ –

નિય્યામકધુરન્ધરો.

૫. અપ્પિચ્છાદિગુણૂપેતો, જિનસાસનમામકો;

વનેરતમહત્થેરો, મેધઙ્કરસમવ્હયો.

૬. પાટવત્થાય ભિક્ખૂનં, વિનયે સુવિસારદો;

પયોગસિદ્ધિં સોધયિ, સદા સપ્પઞ્ઞગોચરં.

૭. ઇમં લિખિતપુઞ્ઞેન, મેત્તેક્યં ઉપસંકમિ;

પતિટ્ઠહિત્વા સરણે, સુપ્પતિટ્ઠામિ સાસનેતિ.

પયોગસિદ્ધિસિદ્ધં.