૧૨૭. કોસજ્જા+જ્જવ+પારિસજ્જ+સોહજ્જ+મદ્દવા+રિસ્સા+સભા+જઞ્ઞ+થેય્ય+ બાહુસચ્ચા

એતે સદ્દા નિપચ્ચન્તે ણાનુબન્ધે. કુસીતસ્સ ભાવોતિ ભાવે ણ્યો હોતિ, ઇમિના ઈસ્સ અકારે ચ તસ્સ જે ચ કતે યસ્સ પુબ્બરૂપં, કોસજ્જં. ઉજુનો ભાવે અજ્જવંતિ ણો, ઇમિના ઉસ્સ અત્તં, ‘‘ઉવણ્ણસ્સા+વઙ સરે’’તિ અવઙઆદેસે જસ્સ દ્વિત્તં. પરિસાસુ સાધૂતિ વાક્યે ‘‘ણ્યો તત્થ સાધૂ’’તિ ણ્યો, ઇમિના જાગમો ચ, ‘‘બ્યઞ્જને દીઘરસ્સા’’તિ આસ્સ રસ્સે ચ કતે જસ્સ પુબ્બરૂપં, પારિસજ્જો. ઇમિના કમેન વાક્યેનેવ સદ્દસિદ્ધિ વેદિતબ્બા. સુહદયોવ સુહજ્જો, તસ્સ ભાવો સોહજ્જં, ઇમિના અયલોપો. મુદુનો ભાવો મદ્દવં, ઇમિના ઉસ્સ અત્તં. ઇસિનો ઇદં ભાવો વા આરિસ્સં, ણ્યપચ્ચયે ઇમિના આરઞાગમે ‘‘લોપો+વણ્ણિ+વણ્ણાનં’’તિ અન્તઇકારલોપો ચ. ઉસભસ્સ ઇદં ભાવો વા આસભં, ઇમિના ઉસ્સ આ. આજાનીયસ્સ ભાવો આજઞ્ઞં, ઇમિના યલોપે ‘‘લોપો+વણ્ણિ+વણ્ણાનં’’તિ ઈકારલોપો. થેનસ્સ ભાવો થેય્યં, ઇમિના નસ્સ યકારો. બહુસ્સુતસ્સ ભાવો બાહુસચ્ચં, ઇમિના ઉસ્સ અકારો સંયોગાદિલોપો. (ભાવતદ્ધિતં).