૬. સહજાતપચ્ચયો

પચ્ચયધમ્મવિભાગો ચ પચ્ચયુપ્પન્નધમ્મવિભાગોચ વુચ્ચતિ. એકતો ઉપ્પન્ના સબ્બેપિ ચિત્તચેતસિકા ધમ્મા અઞ્ઞમઞ્ઞં સહજાત પચ્ચયા ચ હોન્તિ સહજાતપચ્ચયુપ્પન્ના ચ. પટિસન્ધિનામક્ખન્ધા ચ પટિસન્ધિસહજાતં હદયવત્થુ ચ અઞ્ઞમઞ્ઞં સહજાતપચ્ચયા ચ હોન્તિ સહજાતપચ્ચયુપ્પન્ના ચ. સબ્બાનિ મહાભૂતાનિપિ અઞ્ઞમઞ્ઞં સહજાતપચ્ચયા ચ હોન્તિ પચ્ચયુપ્પન્નધમ્મા ચ. પટિસન્ધિચિત્તસ્સ ઉપ્પાદક્ખણે સબ્બાનિ કમ્મજરૂપાનિ ચ પવત્તિકાલે તસ્સ તસ્સ ચિત્તસ્સ ઉપ્પાદક્ખણે તેન તેન ચિત્તેન જાતાનિ સબ્બાનિ ચિત્તજરૂપાનિ ચ સહજાતચિત્તસ્સ પચ્ચયુપ્પન્નાનિ નામ. સબ્બાનિ ઉપાદારૂપાનિ સહજાતમહાભૂતાનં પચ્ચયુપ્પન્નાનિ નામ.

કેનટ્ઠેન સહજાતો, કેનટ્ઠેન પચ્ચયો. સહ જાનનટ્ઠેન સહજાતો, ઉપકારકટ્ઠેન પચ્ચયો. તત્થ સહજાનનટ્ઠેનાતિ યો ધમ્મો જાયમાનો અત્તનો પચ્ચયુપ્પન્નેહિ ધમ્મેહિ સહેવ સયઞ્ચ જાયતિ ઉપ્પજ્જતિ, અત્તનો પચ્ચયુપ્પન્ને ચ ધમ્મે અત્તના સહેવ જનેતિ ઉપ્પાદેતિ, તસ્સ સો અત્થો સહજાનનટ્ઠો નામ.

યથા સૂરિયો નામ ઉદયન્તો સૂરિયાતપે ચ સૂરિયા લોકે ચ અત્તના સહેવ જનયન્તો ઉદેતિ. યથા ચ પદીપો નામ જલન્તો પદીપાતપે ચ પદીપાલોકે ચ અત્તના સહેવ જનયન્તો જલતિ. એવમેવં અયં પચ્ચયધમ્મો ઉપ્પજ્જમાનો અત્તનો પચ્ચયુપ્પન્નધમ્મે અત્તના સહેવ ઉપ્પાદેતિ. તત્થ સૂરિયો વિય એકમેકો નામ ધમ્મો, સૂરિયાતપા વિય તંસમ્પયુત્તધમ્મા, સૂરિયાલોકા વિય સહજાતરૂપધમ્મા. તથા સૂરિયો વિય એકમેકો મહાભૂતરૂપધમ્મો, સૂરિયાતપા વિય સહજાતમહાભૂતધમ્મા, સૂરિયાલોકા વિય સહજાતઉપાદારૂપધમ્મા, એસ નયો પદીપુપમાયપીતિ. સહજાતપચ્ચયદીપના નિટ્ઠિતા.