ચતુત્તિંસતિમ પરિચ્છેદ

એકાદસરાજદીપનો

૧. તદચ્ચયે મહાચૂલી-મહાતિસ્સો અકારયિ;

રજ્જં ચુદ્દસવસ્સાનિ, ધમ્મેન ચ સમેન ચ.

૨. સહત્થેન કતં દાનં, સો સુત્વાન મહપ્ફલં;

પઠમેયેવ વસ્સમ્હિ, ગન્ત્વા અઞ્ઞાતવેસવા.

૩. કત્વાન સાલિલવનં, લદ્ધાય ભતિયા તતો;

પિણ્ડપાતં મહાસુમ્મ-થેરસ્સા’દા મહીપતિ.

૪. સોણ્ણગિરિમ્હિ પુન સો, તીણિવસ્સાનિ ખત્તિયો;

ગુળયન્તમ્હિ કત્વાન, ભતિંલદ્ધા ગુળે તતો.

૫. તે ગુળે આહરાપેત્વા, પુરં આગમ્મ ભૂપતિ;

ભિક્ખુસઙ્ઘસ્સ પાદાસિ, મહાદાનં મહીપતિ.

૬. તિંસભિક્ખુસહસ્સસ્સ, અદા અચ્છાદનાનિ ચ;

દ્વાદસન્નં સહસ્સાનં, ભિક્ખૂનીનં તથેવ ચ.

૭. કારયિત્વા મહીપાલો, વિહારં સુપ્પતિટ્ઠિતં;

સટ્ઠિભિક્ખુ સહસ્સસ્સ, તિચીવરમદાપયિ.

૮. તિંસ સહસ્સ સઙ્ખાનં, ભિક્ખુનીનઞ્ચ દાપયિ;

મણ્ડવાપિ વિહારં સો, તથા અભયગલ્લકં.

૯. વઙ્ગુપટ્ટઙ્ગગલ્લઞ્ચ, દીઘબાહુકગલ્લકં;

વાલગામ વિહારઞ્ચ, રાજા સોયેવ કારયિ.

૧૦. એવં સદ્ધાય સો રાજા, કત્વા પુઞ્ઞાનિનેકધા;

ચતુદ્દસન્નં વસ્સાનં, અચ્ચયેન દિવં અગા.

૧૧. વટ્ટગામણિનો પુત્તો, ચોરનાગોતિ વિસ્સુતો;

મહાચૂળિસ્સરજ્જમ્હિ, ચોરો હુત્વા ચરિતદા.

૧૨. મહાચૂળે ઉપરતે, રજ્જં કારયિ આગતો;

અત્તનો ચોરકાલે સો, નિવાસં યેસુનાલભિ.

૧૩. અટ્ઠરસવિહારે તે, વિદ્ધંસાપેસિ દુમ્મતિ;

રજ્જં દ્વાદસવસ્સાનિ, ચોરનાગો અકારયિ.

૧૪. લોકન્તરિક નિરયં, પાપોસોઉપપજ્જથ;

તદચ્ચયે મહાચૂળ્હિ-રઞ્ઞો પુત્તો અકારયિ.

૧૫. રજ્જં તીણેવ વસ્સાનિ, રાજાતિસ્સો’તિ વિસ્સુતો;

ચોરનાગસ્સ દેવીતુ, વીસમં વીસમાનુલા.

૧૬. વીસં દત્વાન મારેસિ, બલત્થેરત્તમાનસા;

તસ્મિંયેવબલત્થેસા, અનુલારત્તમાનસા.

૧૭. તિસ્સં વીસેનઘાતેત્વા, તસ્સ રજ્જમદાસિસા;

સીવો નામ બલત્થોસો, જેટ્ઠદોવારિકો તહિં.

૧૮. કત્વા મહેસિં અનુલં, વસ્સં માસદ્વયા’ચિકં;

રજ્જં કારેસિ નગરે, વટુકે દમિળે’નુલા.

૧૯. રત્તા વીસેન તં હન્ત્વા, વટુકે રજ્જમપ્પયિ;

વટુકો દમિળો સો હિ, પુરે નગરવડ્ઢકી.

૨૦. મહેસિં અનુલં કત્વા, વસ્સં માસદ્વયાધિકં;

રજ્જં કારેસિ નગરે, અનુલા તત્થ આગતં.

૨૧. પસ્સિત્વા દારુભતિકં, તસ્મિં સારત્તમાનસા;

હન્ત્વા વિસેન વટુકં, તસ્સ રજ્જં સમપ્પયિ.

૨૨. દારુભતિકતિસ્સો સો, મહેસિં કરિયાનુલં;

એકમાસાધિકં વસ્સં, પુરે રજ્જમકારયિ.

૨૩. કારેસિ સો પોક્ખરણિં, મહામેઘવને લહું;

નિલીયે નામ દમિળે, સા પુરોહિતબ્રાહ્મણે.

૨૪. રાગેન રત્તા અનુલા, તેન સંવાસકામિની;

દારુભતિકતિસ્સંતં, વીસં દત્વાન ઘાતિય.

૨૫. નિલીયસ્સ અદા રજ્જં, સોપિ નિલીયબ્રાહ્મણો;

તં મહેસિં કરિત્વાન, નિચ્ચં તાય ઉપટ્ઠિતો.

૨૬. રજ્જં કારેસિ છમ્માસં, અનુરાધપુરે ઇધ;

દ્વત્તિંસાય બલત્થેહિ, વત્થુકામા યથારુચિં.

૨૭. વીસેન તં ઘાતયિત્વા, નિલીયં ખત્તિયાનુલા;

રજ્જં સા અનુલાદેવી, ચતુમાસમકારયિ.

૨૮. મહાચૂળિકરાજસ્સ, પુત્તો દુતિયકો પન;

કૂટકણ્ણતિસ્સો નામ, ભીતો સો’નુલદેવિયા.

૨૯. પલાયિત્વા પબ્બજિત્વા, કાલે પત્તબલો ઇધ;

આગન્ત્વા ઘાતયિત્વા, તં અનુલં દુટ્ઠમાનસં.

૩૦. રજ્જં કારેસિ દ્વાવીસં, વસ્સાનિ મનુજાધિપો;

મહાઉપોસથાગારં, અકા ચેતિયપબ્બતે.

૩૧. ઘરસ્સ તસ્સ પુરતો, સિલાથૂપમકારયિ;

બોધિં રોપેસિ તત્થેવ, સોવ ચેતિયેપબ્બતે.

૩૨. પેલગામવિહારઞ્ચ, અન્તરગઙ્ગાય કારયિ;

તત્થેવ વણ્ણકં નામ, મહામાતિકમેવ ચ.

૩૩. અમ્બદુગ્ગમહાવાપિં, ભયોલુપ્પલમેવ ચ;

સત્તહત્થુચ્ચપાકારં, પુરસ્સ પરિખં તથા.

૩૪. મહાવત્થુમ્હિ અનુલં, ઝાપયિત્વા અસઞ્ઞતં;

અપનીય તતો થોકં, મહાવત્થુમકારયિ.

૩૫. પદુમસ્સરવનુય્યાનં, નગરેયેવ કારયિ;

મતા’સ્સ દન્તે ધોવિત્વા, પબ્બજિ જિનસાસને.

૩૬. કુલસન્તકે ઘરટ્ઠાને, માતુભિક્ખુનુપસ્સયં;

કારેસિ દન્તગેહન્તિ, વિસ્સતો આસિ તેન સો.

૩૭. તદચ્ચયે તસ્સ પુત્તો, નામકો ભાતિકાભયો;

અટ્ઠવીસતિવસ્સાનિ, રજ્જં કારેસિ ખત્તિયો.

૩૮. મહાદાટ્ઠિકરાજસ્સ, ભાતિકત્તામહીપતિ;

દીપે ‘‘ભાતિકરાજા’’તિ, પાકટો આસિ ધમ્મિકો.

૩૯. કારેસિ લોહપાસાદે, પટિસઙ્ખારમેત્થસો;

મહાથૂપે વેદિકા દ્વે, થૂપવ્હે’પોસથવ્હયં.

૪૦. અત્તનો બલિમુજ્ઝિત્વા, નગરસ્સ સમન્તતો;

રોપાપેત્વા યોજનમ્હિ, સુમનાન’જ્જુકાનિ ચ.

૪૧. પાદવેચિકતો યાવ, ધુરચ્છત્તાનરાધિપો;

ચતુરઙ્ગલબહલેન, ગન્ધેન ઉરુચેતિયં.

૪૨. લિમ્પાપેત્વાન પુપ્ફાનિ, વણ્ટેહિ તત્થ સાધુકં;

નિવેસિત્વાન કોરેસિ, થૂપં માલાગુલોપમં.

૪૩. પુનદ્વઙ્ગુલબહલાય, મનોસિલાય ચેતિયં;

લિમ્પાપેત્વાન કારેસિ, તથેવ કુસુમાચિતં.

૪૪. પુન સોપાનતો યાવ, ધુરચ્છત્તાવ ચેતિયં;

પુપ્ફેહિ ઓકિરાપેત્વા, છાદેસિ પુપ્ફરાસિનો.

૪૫. ઉટ્ઠાપેત્વાન યન્તેહિ, જલં અભયવાપિતો;

જલેહિ થૂપં સેવન્તો, બલપૂજમકારયિ.

૪૬. સકટસતેન મુત્તાનં, સદ્ધિં તેલેન સાધુકં;

મદ્દાપેત્વા સુધાપિણ્ડં, સુધાકમ્મમકારયિ.

૪૭. પવાલજાલં કારેત્વા, તં ખિપાપિય ચેતિયે;

સોવણ્ણાનિ પદુમાનિ, ચક્કમત્તાનિ સન્ધિસુ.

૪૮. લગ્ગાપેત્વા તતો મુત્તા-કલાપે યાવ હેટ્ઠિમા;

પદુમા’લમ્બયિત્વાન, મહાથૂપમપૂજયિ.

૪૯. ગણસજ્ઝાયસદ્દં સો, ધાતુગબ્ભમ્હિતાદિનિ;

સુત્વા ‘‘અદિસ્વા તંના’હં, વુટ્ઠહિસ્સન્તિ નિચ્છિતો.

૫૦. પાચિનાદિકમૂલમ્હિ, અનાહારો નિપજ્જથ;

થેરા દ્વારં માપયિત્વા, ધાતુગબ્ભં નયિંસુ તં.

૫૧. ધાતુગબ્ભવિભૂતિંસો, સબ્બં દિસ્વા મહીપતિ;

નિક્ખન્તો તાદિસેહેવ, પોત્થરૂપેહિ પૂજયિ.

૫૨. મધુગન્ધેહિ ગન્ધેહિ, ઘટેહિ સરસેહિ ચ;

અઞ્જનહરિતાલેહિ, તથામનોસિલાહિ ચ.

૫૩. મનોસિલાસુ વસ્સેન, ભસ્સિત્વા ચેતિયઙ્ગણે;

ઠિતાસુ ગોપ્ફમત્તાસુ, રચિતે પુ’પ્પલેહિ ચ.

૫૪. થૂપઙ્ગણમ્હિ સકલે, પુરિતે ગન્ધકદ્દમે;

ચિત્તકિલઞ્જછિદ્દેસુ, રચિતે પુ’પ્પલેહિ ચ.

૫૫. વારયિત્વા વારિમગ્ગં, તથેવ પુરિતે ઘટે;

દીપવટ્ટિહિ નેકાનિ, કતવટ્ટિસિખાહિ ચ.

૫૬. મધુકતેલમ્હિ તથા, તિલતેલે તથેવ ચ;

તથેવ પટ્ટવટ્ટીનં, સુ બહૂહિ સિખાહિ ચ.

૫૭. યથાવુત્તેહિ એતેહિ, મહાથૂપસ્સ ખત્તિયો;

સત્તક્ખત્તું સત્તક્ખત્તું, પૂજા’કાસિ વિસું વિસું.

૫૮. અનુવસ્સઞ્ચ નિયતં, સુધામઙ્ગલમુત્તમં;

બોધિસિનાનપૂજા ચ, તથેવ ઉરુબોધિયા.

૫૯. મહાવેસાખ પૂજા ચ, ઉળારા અટ્ઠવીસતિ;

ચતુરાસીતિ સહસ્સાનિ, પૂજા ચ અનુળારિકા.

૬૦. વિવિધં નટનચ્ચઞ્ચ, નાનાતૂરિયવાદિતં;

મહાથૂપે મહાપૂજં, સદ્ધાનુન્નો અકારયિ.

૬૧. દિવસસ્સ ચ તિક્ખત્તું, બુદ્ધુપ્પટ્ઠાનમાગમા;

દ્વિક્ખત્તું, પુપ્ફભેરિઞ્ચ, નિયતં સો અકારયિ.

૬૨. નિયતઞ્ચનદાનઞ્ચ, પવારણાદાનમેવ ચ;

તેલફાણિતવત્થાદિ-પરિક્ખારં સમણારહં.

૬૩. બહું પાદાસિ સઙ્ઘસ્સ, ચેતિયખેત્તમેવ ચ;

ચેતિયે પરિકમ્મત્થં, અદાસિ તત્થ ખત્તિયો.

૬૪. સદા ભિક્ખુસહસ્સસ્સ, વિહારે ચેતિયપબ્બતે;

સલાકવત્તભત્તઞ્ચ, સો દાપેસિ ચ ભૂપતિ.

૬૫. ચિન્તામણિમુચેલવ્હે, ઉપટ્ઠાનત્તયે ચ સો;

તથા પદુમઘરે છત્ત-પાસાદે ચ મનોરમે.

૬૬. ભોજેન્તો પઞ્ચઠાનમ્હિ, ભિક્ખૂગન્થધુરે યુતે;

પચ્ચયેહિ ઉપટ્ઠાસિ, સદા ધમ્મે સગારવો.

૬૭. પોરાણરાજનિયાતં, યંકિઞ્ચિ સાસનસ્સિતં;

અકાસિ પુઞ્ઞકમ્મંસો, સબ્બં ભાતિકભૂપતિ.

૬૮. તસ્સ ભાભકરાજસ્સ, અચ્ચયે તં કનિટ્ઠકો;

મહાદાઠિમહાનાગ-નામો રજ્જમકારયિ.

૬૯. દ્વાદસંયેવ વસ્સાનિ, નાનાપુઞ્ઞપરાયનો;

મહાથૂપમ્હિ કિઞ્જક્ખ- પાસાણે અત્થરાપયિ.

૭૦. વાલિકામરિયાદઞ્ચ, કારેસિ વિત્થતઙ્ગણં;

દીપે સબ્બવિહારેસુ, ધમ્માસનમદાપયિ.

૭૧. અમ્બત્થલ મહાથૂપં, કારાપેસિ મહીપતિ;

ચ યેઅનિટ્ઠમાનમ્હિ, સરિત્વા મુનિનો ગુણં.

૭૨. ચજિત્વાન સકં પાણં, નિપજ્જિત્વા સયં તહિં;

ઠપયિત્વા ચયં તસ્સ, નિટ્ઠાપેત્વાન ચેતિયં.

૭૩. ચતુદ્વારે ઠપાપેસિ, ચતુરો રતનગ્ઘિકે;

સુસિપ્પિકેહિ સુવિભત્તે, નાનારતનજોતિતે.

૭૪. ચેતિયે પટિમોચેત્વા, નાનારતનકઞ્ચુકં;

કઞ્ચન બુબ્બુલઞ્ચેત્થ, મુત્તોલમ્બઞ્ચ દાપયિ.