સત્તવીસતિમ પરિચ્છેદ

લોહપાસાદમહો

૧. તતો રાજા વિચિન્તેસિ, વિસ્સુતં સુસ્સુતં સુતં;

મહાપઞ્ઞો સદા પુઞ્ઞો, પઞ્ઞાય કતનિચ્છયો.

૨. ‘‘દીપપ્પસાદકો થેરો, રાજિનો અય્યકસ્સ મે;

એવં કિરાહનત્તા તે, દુટ્ઠગામણિભૂપતિ.

૩. મહાપુઞ્ઞો મહાથૂપં, સોણ્ણમાલિં મનોરમં;

વીસંહત્થસતં ઉચ્ચં, કારેસ્સતિ અનાગતે.

૪. પુનો ઉપોસથાગારં, નાનારતનમણ્ડિતં;

નવભૂમં કરિત્વાન, લોહપાસાદ મેવ ચ.

૫. ઇતિ ચિન્તિય ભૂમિન્દો, લિખિત્વેવં ઠપાપિતં;

પેક્ખાપેન્તો રાજગેહે, ઠિતં એવ કરણ્ડકે.

૬. સોવણ્ણપટ્ટં લદ્ધાન, લેખં તત્થ અવાચયિ;

‘‘ચત્તાલીસસતં વસ્સં, અતિક્કમ્મ અનાગતે.

૭. કાકવણ્ણસુતો દુટ્ઠ-ગામણિમનુજાધિપો;

ઇદઞ્ચિદઞ્ચ એવઞ્ચ, કારેસ્સતી’’તિ વાચિતં.

૮. સુત્વા હટ્ઠો ઉદાનેત્વા, અપ્પોટ્ઠેસિ મહીપતિ;

તતો પાતો’વ ગન્ત્વાન, મહામેઘવનં સુભં.

૯. સન્નિપાતં કારયિત્વા, ભિક્ખુસઙ્ઘસ્સ અબ્રવિ;

‘‘વિમાનતુલ્યં પાસાદં, કારયિસ્સામિ વો અહં.

૧૦. દિબ્બં વિમાનં પેસેત્વા, તદા લેખં અદાથ મે’’;

ભિક્ખુસઙ્ઘો વિસજ્જેસિ, અટ્ઠ ખીણાસવે તહિં.

૧૧. કસ્સપમુનિનો કાલે, અસોકો નામ બ્રાહ્મણો;

અટ્ઠ સલાકભત્તાનિ, સઙ્ઘસ્સ પરિણામિય.

૧૨. ભરણિં નામ દાસિં સો, ‘‘નિચ્ચં દેહી’’તિ અબ્રવિ;

દત્વા સા તાનિ સક્કચ્ચં, યાવજીવં તતો ચુતા.

૧૩. આકાસટ્ઠવિમાનમ્હિ, નિબ્બત્તિરુચિરે સુભે;

અચ્છરાનં સહસ્સેન, સદા’સિ પરિવારિતા.

૧૪. તસ્સા રતનપાસાદો, દ્વાદસયોજનુગ્ગતો;

યોજનાનં પરિક્ખેપો, ચત્તાલીસઞ્ચ અટ્ઠ ચ.

૧૫. કૂટાગારસહસ્સેન, મણ્ડિતો નવભૂમિકો;

સહસ્સગબ્ભસમ્પન્નો, રાજમાનો ચતુમ્મુખો.

૧૬. સહસ્સસઙ્ખસંવુત્તિ, સીહપઞ્જર નેત્તવા;

સકિઙ્કણિકજાલાય, સજ્જિતો વેદિકાય ચ.

૧૭. અમ્બલટ્ઠિકપાસાદો, તસ્સ મજ્ઝે ઠિતો અહુ;

સન્તમતો દિસ્સમાનો, પગ્ગહિતધજાકુલો.

૧૮. તાવતિંસઞ્ચ ગચ્છન્તા, દિસ્વા થેરં તમેવ તે;

હિઙ્ગુલેન તદા લેખં, લેખયિત્વા પટે તતો.

૧૯. નિવત્તિત્વાન આગન્ત્વા, પટં સઙ્ઘસ્સ દસ્સયું;

સઙ્ઘો પટં ગહેત્વા તં, પાહેસિ રાજસન્તિકં.

૨૦. તં દિસ્વા સુમનો રાજા, આગમ્મારામ મુત્તમં;

આલેખતુલ્યં કારેસિ, લોહપાસાદ મુત્તમં.

૨૧. કમ્મારમ્ભનકાલેવ, ચતુદ્વારમ્હિ ભોગવા;

અટ્ઠસતસહસ્સાનિ, હિરઞ્ઞાનિ ઠપાપયિ.

૨૨. પુટસહસ્સ વત્થાનિ, દ્વારે દ્વારે ઠપાપયિ;

ગુળ તેલસક્ખરમધુ-પુરા ચાનેક ચાટિયો.

૨૩. ‘‘અમૂલકકમ્મ મેત્થ, ન કાતબ્બ’’ન્તિ ભાસિય;

અગ્ઘાપેત્વા કતં કમ્મં, તેસં મૂલમદાપયિ.

૨૪. હત્થસતં હત્થસતં, આસિ એકેક પસ્સતો;

ઉચ્ચતો તત્તકોયેવ, પાસાદો હિ ચતુમ્મુખો.

૨૫. તસ્મિં પાસાદ સેટ્ઠસ્મિં, અહેસું નવભૂમિયો;

એકેકિસ્સા ભૂમિયા ચ, કૂટાગારસતાનિ ચ.

૨૬. કૂટાગારાનિ સબ્બાનિ, સજ્ઝુના ખચિતા ન’યું;

પવાલવેદિકા તેસં, નાનારતન ભૂસિતા.

૨૭. નાનારતન ચિત્તાનિ, તાસં પદુમકાનિ ચ;

સજ્ઝકિંકિણિકાપન્તિ-પરિક્ખિત્તાવ તા અહુ.

૨૮. સહસ્સં તત્થ પાસાદો, ગબ્ભા આસું સુસઙ્ખતા;

નાનારતન ખચિતા, સીહપઞ્જરનેત્તવા.

૨૯. નારિવાહનયાનન્તુ, સુત્વા વેસ્સવણસ્સ સો;

તદા કારમકારેસિ, મજ્ઝે રતનમણ્ડપં.

૩૦. સીહબ્યગ્ઘાદિરૂપેહિ, દેવતા રૂપકેહિ ચ;

અહુ રતનમયોહે’સ, થમ્ભેહિ ચ વિભૂસિતો.

૩૧. મુત્તાજાલપરિક્ખેપો, મણ્ડપન્તે સમન્તતો;

પવાલવેદિકા ચેત્થ, પુબ્બે વુત્તવિધા અહુ.

૩૨. સત્તરતન ચિત્તસ્સ, વેમજ્ઝે મણ્ડપસ્સ તુ;

રુચિરો દન્તપલ્લઙ્કો, રમ્મો ફલિકસન્થરો.

૩૩. દન્તમયાપસ્સયે’ત્થ, સુવણ્ણમય સૂરિયો;

સજ્ઝુમયે ચન્દિમા ચ, તારા ચ મુત્તકા મયા.

૩૪. નાનારતન પદુમાનિ, તત્થ તત્થ યથારહં;

જાતકાનિ ચ તત્થેવ, આસું સોણ્ણલતન્તરે.

૩૫. મહગ્ઘપચ્ચત્થરણે, પલ્લઙ્કે’તિ મનોરમે;

મનોહરા’સિટ્ઠપિતા, રુચિરં દન્તબીજની.

૩૬. પવાલપાદુકા તત્થ, ફલિકમ્હિ પતિટ્ઠિતા;

સેતચ્છત્તં સજ્ઝુદણ્ડં, પલ્લઙ્કો’પરિસોભથ.

૩૭. સત્તરતન મયાનેત્થ, અટ્ઠમઙ્ગલિકાનિ ચ;

ચતુપ્પદાનં પન્તી ચ, મણિમુત્તન્તરા અહું.

૩૮. રજતાનઞ્ચ ઘણ્ટાનં, પન્તી ભત્તન્તલમ્બિતા;

પાસાદછત્તપલ્લઙ્ક-મણ્ડપા’સું અનગ્ઘિકા.

૩૯. મહગ્ઘ પઞ્ઞપાપેસિ, મઞ્ચપીઠં યથારહં;

તથેવ ભૂમત્થરણં, કમ્બલઞ્ચ મહારહં.

૪૦. આચામ કુમ્ભિસોવણ્ણા, ઉલુઙ્કો ચ અહુ તહિં;

પાસાદ પરિભોગેસુ, સેસેસુ ચ કથા’ વકા.

૪૧. ચારુપાકાર પરિવારો,

સો ચતુદ્વારકોટ્ઠકો;

પાસાદો’લઙ્કતો સોભિ,

તાવતિંસ સભા વિય.

૪૨. તમ્બ લોહિટ્ઠકાહે’સો,

પાસાદો છાદિતો અહુ;

લોહ પાસાદ વોહારો,

તેન તસ્સ અજાયથ.

૪૩. નટ્ઠિતે લોહપાસાદે, સો સઙ્ઘં સન્નિપાતયિ;

રાજા સઙ્ઘો સન્નિપતિ, મરિચવટ્ટિમહે વિય.

૪૪. પુથુજ્જના’વ અટ્ઠંસુ, ભિક્ખૂ પઠમભૂમિયં;

તેપિટકા દુતિયાય, સોતાપન્નાદયો પન.

૪૫. એકે કેયેવ અટ્ઠંસુ, તતિયાદીસુ ભૂમિસુ;

અરહન્તો ચ અટ્ઠંસુ, ઉદ્ધં ચતૂસુ ભૂમિસુ.

૪૬. સઙ્ઘસ્સ દત્વા પાસાદં, દક્ખિણમ્બુપુરસ્સરં;

રાજા’દત્થ મહાદાનં, સત્તાહં પુબ્બકં પિય.

૪૭. પાસાદ મહચત્તાનિ, મહાચાગેન રાજિના;

અનગ્ઘાનિ ઠપેત્વાન, અહેસું તિંસકોટિયો.

૪૮. નિસ્સારે ધનનિચયે વિસેસસારં,

યે દાનં પરિગણયન્તિ સાધુપઞ્ઞા;

તે દાનં વિપુલમપેત ચિત્તસઙ્ગા,

સત્તાનં હિતપરમા દદન્તિ એવંતિ.

સુજનપ્પસાદસંવેગત્થાય કતે મહાવંસે

લોકહપાસાદમહો નામ

સત્તવીસતિમો પરિચ્છેદો.