વીસતિમ પરિચ્છેદ

થેરપરિનિબ્બાનં

૧. અટ્ઠારસમ્હિ વસ્સમ્હિ, ધમ્માસોકસ્સ રાજિનો;

મહામેઘવનારામે, મહાબોધિ પતિટ્ઠતિ.

૨. તતો દ્વાદસમે વસ્સે, મહેસી તસ્સ રાજિનો;

પિયા અસન્ધીમિત્તા સા, મતા સમ્બુદ્ધમામકા.

૩. તતો ચતુત્થે વસ્સમ્હિ, ધમ્માસોકો મહીપતિ;

તિસ્સરક્ખ મહેસિત્તે, ઠપેસિ વિસમાસયં.

૪. તતો તુ તતિયે વસ્સે, સાબાલા રૂપમાનિની;

‘‘મયાપિ ચ અયં રાજા, મહાબોધિં મ માયતિ’’.

૫. ઇતિ કોધવસં ગન્ત્વા, અત્તનો’નત્થ કારિકા;

મણ્ડુકણ્ટકયોગેન, મહાબોધિ મઘા તયિ.

૬. તતો ચ તુત્થેવસ્સમ્હિ, ધમ્મા સોકો મહાયસો;

અનિચ્ચ તાવ સંપત્તો, સત્તતિંસસમા ઇમે.

૭. દેવાનં પિયતિસ્સો તુ, રાજા ધમ્મગુણે રતો;

મહાવિહારે નવકમ્મં, તથા ચેતિયપબ્બતે.

૮. થૂપારામે નવકમ્મં, નિટ્ઠાપેત્વા યથારહં;

દીપપ્પસાદકં થેરં, પુચ્છિ પુચ્છિતકોવિદં.

૯. કારાપેસ્સમહં ભન્તે, વિહારેસુ બહૂ ઇધ;

પતિટ્ઠાપેતું થૂપેસુ, કથં લચ્છામ ધાતુયો.

૧૦. સમ્બુદ્ધપત્તં પૂરેત્વા, સુમનેના’હટા ઇધ;

ચેતિયપબ્બતે રાજ, ઠપિતા અત્થિ ધાતુયો.

૧૧. હત્થિક્ખન્ધે ઠપેત્વા તા, ધાતુયો ઇધ આહર;

ઇતિ વુત્તો સથેરેન, તથા આહરિ ધાતુયો.

૧૨. વિહારે કારયિત્વાન, ઠાને યોજનયોજને;

ધાતુયો તત્થ થૂપેસુ, નિધાપેસિ યથારહં.

૧૩. સમ્બુદ્ધભુત્તપત્તં તુ, રાજવત્થુઘરે સુભે;

ઠપયિત્વાન પૂજેસિ, નાનાપૂજાહિ સબ્બદા.

૧૪. પઞ્ચસતેહિ’સ્સરેતિ, મહાથેરસ્સ સન્તિકે;

પબ્બજ્જવસિતઠાને, ઇસ્સરસમણકો અહુ.

૧૫. પઞ્ચસતેહિ વસ્સેહિ, મહાથેરસ્સ સન્તિકે;

પબ્બજ્જવસિતઠાને, તથા વસ્સગિરિ અહુ.

૧૬. યા યા મહામહિન્દેન, થેરેન વસિતા ગુહા;

સપબ્બતવિહારેસુ, સા મહિન્દગુહા અહુ.

૧૭. મહાવિહારં પઠમં, દુતિયં ચેતિયવ્હયં;

થૂપારામં તુ તતિયં, થૂપપુબ્બઙ્ગમં સુભં.

૧૮. ચતુત્થં તુ મહાબોધિ-પતિટ્ઠાપનમેવ ચ;

થૂપઠાનીયભૂતસ્સ, પઞ્ચમં પન સાધુકં.

૧૯. મહાચેતિયઠાનમ્હિ, સિલાથૂપસ્સ ચારુનો;

સમ્બુદ્ધગીવાધાતુસ્સ, પતિટ્ઠાપનમેવ ચ.

૨૦. ઇસ્સરસમણં છટ્ઠં, તિસ્સવાપિન્તુસત્તમં;

અટ્ઠમં પઠમં થૂપં, નવમં વસ્સગિરિવ્હયં.

૨૧. ઉપાસિકાવ્હયં રમ્મં, તથા હત્થાળ્હકવ્હયં;

ભિક્ખુનુપસ્સકે દ્વે’મે, ભિક્ખુની ફાસુકારણા.

૨૨. હત્થાળ્હકે ઓસરિત્વા, ભિક્ખુનીનં ઉપસ્સયે;

ગન્ત્વાન ભિક્ખુસઙ્ઘેન, ભત્તગ્ગહણકારણા.

૨૩. હત્તસાલં સૂપહારં, મહાપાળિકનામકં;

સબ્બુપકરણૂપેતં, સમ્પત્તપરિચારિકં.

૨૪. તથા ભિક્ખુસહસ્સસ્સ, સપરિક્ખારમુત્તમં;

પવારણાય દાનઞ્ચ, અનુવસ્સકમેવ ચ.

૨૫. નાગદીપે જમ્બુકોલ-વિહારં ત મ્હિપટ્ટને;

તિસ્સમહાવિહારઞ્ચ, પાચીનારામ મેવ ચ.

૨૬. ઇતિ એતાનિ કમ્માનિ, લંકાજનહિતત્થિકો;

દેવાનંપિયતિસ્સો સો, લંકિન્દો પુઞ્ઞપઞ્ઞવા.

૨૭. પઠમેયેવ વસ્સમ્હિ, કારાપેસિ ગુણપ્પિયો;

યાવ જીવન્તુનેકાનિ, પુઞ્ઞકમ્માનિ આચિનિ.

૨૮. અયં દીપો અહુ ઠિતો, વિજિતે તસ્સ રાજિનો;

વસ્સાનિ ચત્તાલીસં સો, રાજા રજ્જમકારયિ.

૨૯. તસ્સ’ચ્ચ યે તં કનિટ્ઠો, ઉત્તિયો ઇતિ વિસ્સુતો;

રાજપુત્તો અપુત્તં તં, રજ્જં કારેસિ સાધુકં.

૩૦. મહામહિન્દત્થેરો તુ, જિનસાસનમુત્તમં;

પરિયત્તિં પટિપત્તિં, પટિવેધઞ્ચ સાધુકં.

૩૧. લંકાદીપમ્હિ દીપેત્વા, લંકાદીપો મહાગણિ;

લંકાયસો સત્થુ કપ્પો, કત્વા લંકાહિતં બહું.

૩૨. તસ્સ ઉત્તિયરાજસ્સ, જયવસ્સમ્હિ અટ્ઠમે;

અન્તોવસ્સં સટ્ઠિવસ્સો, ચેતિયપબ્બતે વસં.

૩૩. અસ્સયુજસ્સ માસસ્સ, સુક્કપક્ખઠમે દિને;

પરિનિબ્બાયિતે નેતં, દિનં તન્નામકં અહુ.

૩૪. [નિબ્બુતસ્સ મહિન્દસ્સ, અટ્ઠમિયં દિને પન,

તેન તં દિવસં નામ, અટ્ઠમિયાતિ સમ્મતં.]

૩૫. તં સુત્વા ઉત્તિયો રાજા, સોકસલ્લસમપ્પિતો;

ગન્ત્વાન થેરં વન્દિત્વા કન્દિત્વા બહુધા બહું.

૩૬. આસિત્તગન્ધતેલાય, બહું સોવણ્ણદોણિયા;

થેરદેભં ખિપાપેત્વા, તં દોણિં સાધુફુસ્સિતં.

૩૭. સોવણ્ણકૂટાગારમ્હિ, ઠપાપેત્વા અલઙ્કતે;

કૂટાગારં ગાહયિત્વા, કારેન્તો સાધુકીળિતં.

૩૮. મહતા ચ જનોઘેન, આગતેનતતો તતો;

મહતા ચ બલોઘેન, કારેન્તો પૂજનાવિધિં.

૩૯. અલઙ્કતેન મગ્ગેન, બહુધા’લઙ્કતં પુરં;

આનયિત્વાન નગરે, ચારેત્વા રાજવીથિયો.

૪૦. મહાવિહારં આનેત્વા, એત્થ પઞ્હમ્બમાળકે;

કુટાગારં ઠપાપેત્વા, સત્તાહં સો મહીપતિ.

૪૧. તોરણદ્ધજપુપ્ફેહિ, ગન્ધપુણ્ણઘટેહિ ચ;

વિહારઞ્ચ સમન્તા ચ, મણ્ડિહં યોજનત્તયં.

૪૨. અહુ રાજાનુભાવેન, દીપન્તુ સકલં પન;

આનુભાવેન દેવાનં, તથેવા’લઙ્કતં અહુ.

૪૩. નાનાપૂજં કારયિત્વા, સત્તાહં સો મહીપતિ;

પુરત્થિમદિસાભાગે, થેરાનં બદ્ધમાળકે.

૪૪. કારેત્વા ગન્ધચિતકં, મહાથૂપં પદક્ખિણં;

કરોન્તો તત્થ નેત્વા તં, કૂટાગારં મનોરમં.

૪૫. ચિતકમ્હિ ઠપાપેત્વા, સક્કારં અન્તિમં અકા;

ચેતિયઞ્ચેત્થ કારેસિ, ગાહા પેત્વાન ધાતુયો.

૪૬. ઉપડ્ઢધાતું ગાહેત્વા, ચેતિયે પબ્બતેપિ ચ;

સબ્બેસુ ચ વિહારેસુ, થૂપે કારેસિ ખત્તિયો.

૪૭. ઇસિનો દેહનિક્ખેપ-કતઠાનઞ્હિ તસ્સ તં;

વુચ્ચતે બહુમાનેન, ઇસિભૂમઙ્ગનં ઇતિ.

૪૮. તતો પભુત્ય’રિયાનં, સમન્તા યોજનત્તયે;

સરીરં આહરિત્વાન, તમ્હિ દેસમ્હિ ડય્હતિ.

૪૯. સઙ્ઘમિત્તા મહાથેરી, મહા’ભિઞ્ઞા મહામતી;

કત્વા સાસનકિચ્ચાનિ, તથા લોકહિતં બહું.

૫૦. એકૂનસટ્ઠિવસ્સા સા, ઉત્તિયસ્સે’વ રાજિનો;

વસ્સમ્હિ નવમે ખેમે, હત્થાળ્હકઉપસ્સયે.

૫૧. વસન્તી પરિનિબ્બાયી, રાજા તસ્સાપિ કારયિ;

થેરસ્સ વિય સત્તાહં, પૂજાસક્કાર મુત્તમં.

૫૨. સબ્બા અલઙ્કતા લંકા, થેરસ્સ વિય આસિ ચ;

કૂટાગારગતં થેરિ-દેહં સત્તદિનચ્ચયે.

૫૩. નિક્ખામેત્વાન નગરં, થૂપરામ પુરત્થતો;

ચિત્તસાલા સમીપમ્હિ, મહાબોધિપ દસ્સયે.

૫૪. થેરિયા વુટ્ઠઠાનમ્હિ, અગ્ગિકિચ્ચ મકારયિ;

થૂપઞ્ચ તત્થ કારેસિ, ઉત્તિયો સો મહીપતિ.

૫૫. પઞ્ચાપિ તે મહાથેરા, થેરારિટ્ઠાદયોપિ ચ;

તથા’નેક સહસ્સાનિ, ભિક્ખુ ખીણાસવાપિ ચ.

૫૬. સઙ્ઘમિત્તા પભુતિયો, તા ચ દ્વાદસથેરિયો;

ખીણાસવા ભિક્ખુનિયો, સહસ્સાનિ બહૂનિ ચ.

૫૭. બહુસ્સુતા મહાપઞ્ઞા, વિનયાદિજાનાગમં;

જોતયિત્વાન કાલેન, પયાતા’નિચ્ચતાવસં.

૫૮. દસવસ્સાનિ સો રાજા, રજ્જં કારેસિ ઉત્તિયો;

એવં અનિચ્ચતા એસા, સબ્બલોકવિનાસિની.

૫૯. તં એતં અતિસાહસં અતિબલં ન વારિયં નરો;

જાનન્તોપિ અનિચ્ચતં ભવગતે નિબ્બિન્દતેનેવ ચ;

નિબ્બિન્દો વિરતિં રતિં ન કુરુતે પાપેહિ પુઞ્ઞેહિ ચ;

તસ્સે’સાઅતિમોહજાલબલતાજાનમ્પિ સમ્મુય્હતીતિ.

સુજનપ્પસાદસંવેગત્થાય કતે મહાવંસે

થેરપરિનિબ્બાનં નામ

વીસતિમો પરિચ્છેદો.