દુતિયપરિચ્છેદ

મહાસમ્મતવંસ

૧. મહાસમ્મત રાજસ્સ, વંસજો હિ મહામુનિ;

કપ્પસ્સાદિમ્હિ રાજા’સિ, મહાસમ્મતનામકો.

૨. રોજો ચ વરરોજો ચ, તથા કલ્યાણકા દુવે;

ઉપોસથો ચ મન્ધાતા, ચરકો’પચરા દુવે.

૩. ચેતીયો મુચલો ચેવ, મહામૂચલનામકો;

મુચલિન્દો સાગરો ચેવ, સાગરો દેવ વનામકો.

૪. ભરતો ભગીરથો ચેવ, રુચિ ચ સુરુચિ પિચ;

પતાપો મહાપતાપો, પનાદા ચ તથા દુવે.

૫. સુદસ્સનો ચ નેરુ ચ, તથા એવ દુવે દુવે;

પચ્છિમા ચા’તિ રાજાનો, તસ્સ પુત્તપપુત્તકા.

૬. અસંખિયાયુકા એતે, અટ્ઠવીસતિ ભૂમિપા;

કુસાવતિં રાજગહં, મિથિલઞ્ચાપિ આવસું.

૭. તતો સતઞ્ચ રાજનો, છપ્પઞ્ઞાસ ચ સટ્ઠિ ચ;

ચતુરાસીતિ સહસ્સાનિ, છત્તિંસા ચ તતો પરે.

૮. દ્વત્તિંસ અટ્ઠવીસા ચ, દ્વાવીસતિ તતો પરે;

અટ્ઠારસ સત્તરસ, પઞ્ચદસ ચતુદ્દસ.

૯. નવ સત્ત દ્વાદસ ચ, પઞ્ચવીસ તતોપરે;

પઞ્ચવીસં દ્વાદસ ચ, દ્વાદસઞ્ચ નવા પિચ.

૧૦. ચતુરાસીતિસહસ્સાનિ, મખાદેવાદિકાપિ ચ;

ચતુરાસીતિસહસ્સાનિ, કળારાજનકાદયો.

૧૧. સોળસ યાવ ઓક્કાતં, પપુત્તા રાસિતો ઇમે;

વિસું વિસું પુરે રજ્જં, કમતો અનુસાસિસું.

૧૨. ઓક્કામુખો જેટ્ઠપુત્તો, ઓક્કાકસા’સિ ભૂપતિ;

નિપુરો ચન્દીમા ચન્દં-મુખો ચ સિવિ સઞ્જયો.

૧૩. વેસ્સન્તર મહારાજા, જાલી ચ સીહવાહનો;

સીહસ્સરો ચ ઇચ્ચેતે, તસ્સ પુત્ત પ પુત્તકા.

૧૪. દ્વેઅસીતિ સહસ્સાનિ, સીહસ્સરસ્સ રાજિનો;

પુત્ત પ પુત્ત રાજાનો, જયસેનો તદન્તિમો.

૧૫. એતે કપિલવત્થુસ્મિં, સક્યરાજાતિ વિસ્સુતા;

સીહહનુ મહારાજા, જયસેનસ્સ અત્રજો.

૧૬. જયસેનસ્સ ધીતા ચ, નામેના’સિ યસોધરા;

દેવદયે દેવદહ-સક્કો નામા’સિ ભૂપતિ.

૧૭. અઞ્જનો ચા’થ કચ્ચાના, આસું તસ્સ સુતા દુવે;

મહેસીચા’સિ કચ્ચાના, રઞ્ઞો સીહહનુસ્સ સા.

૧૮. આસી અઞ્જનસક્કસ્સ, મહેસી સા યસોધરા;

અઞ્જનસ્સ દુવે ધીતા, માયા ચાથ પજાપતિ.

૧૯. પુત્તા દુવે દણ્ડપાણી, સુપ્પબુદ્ધો ચ સાકિયો;

પઞ્ચ પુત્તા દુવે ધીતા, આસું સીહહનુસ્સરે.

૨૦. સુદ્ધોદનો ધોતોદનો, સક્કસુક્કમિતોદનો;

અમિતા પમિતાચા’તિ, ઇમે પઞ્ચ ઇમા દુવે.

૨૧. સુપ્પબુદ્ધસ્સ સક્કસ્સ, મહેસી અમિતા અહુ;

તસ્સા’સું ભદ્દકચ્ચાના, દેવદત્તો દુવે સુતા.

૨૨. માયા મહાપજાપતિ ચેવ, સુદ્ધોદન મહેસીયો;

સુદ્ધોદન મહારઞ્ઞો, પુત્તો માયાય સો જિનો.

૨૩. મહા સમ્મતવંસમ્હિ, અસમ્ભિન્ને મહામુનિ;

એવં પવત્તે સઞ્જાતો, સબ્બ ખત્થિય મુદ્ધનિ.

૨૪. સિદ્ધત્થસ્સ કુમારસ્સ, બોધિસત્તસ્સ સા અહુ;

મહેસી ભદ્દકચ્ચાના, પુત્તો તસ્સા’સિ રાહુલો.

૨૫. બિમ્બિસારો ચ સિદ્ધત્થ-કુમારો ચ સહાયકા;

ઉભિન્નં પિતરો ચાપિ, સહાયાએવ તે અહું.

૨૬. બોધિસત્તો બિમ્બિસારા, પઞ્ચવસ્સાધિકો અહુ;

એકૂનતિંસો વયસા, બોધિસત્તો’ભિનિક્ખમિ.

૨૭. પદહિત્વાન છબ્બસ્સં, બોધિં પત્વા કમેન ચ;

પઞ્ચતિંસો થ વયસા, બિમ્બિસારમુપાગમિ.

૨૮. બિમ્બિસારો પન્નરસ-વસ્સો’થ પીતરં સયં;

અભિસિત્તો મહાપઞ્ઞો, પત્તો રજ્જસ્સ તસ્સ તુ.

૨૯. પત્તે સોળસમે વસ્સે, સત્થા ધમ્મમદેસયિ;

દ્વાપઞ્ઞાસેવ વસ્સાનિ, રજ્જં કારેસિ સો પન.

૩૦. રજ્જે સમા પન્નરસ, પુબ્બે જિનસમાગમા;

સત્તતિંસ સમા તસ્સ, ધરમાને તથાગતે.

૩૧. બિમ્બિસારસુતો’જાત-સત્તુતં ઘાતીયા’મતિ;

રજ્જં દ્વત્તિંસવસ્સાનિ, મહામિત્તદ્દુકારયી.

૩૨. અજાતસત્તુનો વસ્સે, અટ્ઠમે મુનિ નિબ્બુતો;

પચ્છા સો કારયી રજ્જં, વસ્સાનિ ચતુવીસતિ.

૩૩. તથાગતો સકલલોકગ્ગતં ગતો;

અનિચ્ચતાવ સમવસો ઉપાગતો;

ઇતિ’ધ યો ભયજનનિં અનિચ્ચતં,

અવેક્ખતે સ ભવતિ દુક્ખપારગૂતિ.

સુજનપ્પસાદસંવેગત્થાય કતે મહાવંસે

મહાસમ્મતવંસો નામ

દુતિયો પરિચ્છેદો.