દ્વાદસમ પરિચ્છેદ

નાનાદેસપસાદો

૧. થેરો મોગ્ગલિપુત્તો સો, જિનસાસન જોતકો;

નિટ્ઠાપેત્વાન સંગીતિં, પેક્ખમાનો અનાગતં.

૨. સાસનસ્સ પતિટ્ઠાનં, પચ્ચન્તેસુ અવેક્ખિય;

પેસેસિ કત્તિકે માસે, તેતે થેરે તહિં તહિં.

૩. થેરં કસ્મીરગન્ધારં, મજ્ઝન્તિકમપેસયિ;

અપેસયી મહાદેવ-ત્થેરં મહિસમણ્ડલં.

૪. વનવાસિં અપેસયિ, થેરં રક્ખિતનામકં;

તથા’પરન્તકં યોન-ધમ્મરક્ખિતનામકં.

૫. મહારટ્ઠં મહાધમ્મ-રક્ખિતત્થેર નામકં;

મહારક્ખિત થેરં તં, યોન લોકમપેસયિ.

૬. પેસેસિ મજ્ઝિમં થેરં, હિમવન્તપદેસકં;

સુવણ્ણભૂમિં થેરે દ્વે, સોણમુત્તર મેવ ચ.

૭. મહામહિન્દત્થેરં તં, થેર ઇટ્ટિયમુત્તિયં;

સમ્બલં ભદ્દસાલઞ્ચ, સકે સદ્ધિવિહારિકે.

૮. લંકાદીપે મનુઞ્ઞમ્હિ, મનુઞ્ઞં જિનસાસનં;

પતિટ્ઠાપેથ તુમ્હે’તિ, પઞ્ચ થેરે અપેસયિ.

૯. તદા કસ્મીરગન્ધારે, પક્કં સસ્સં મહિદ્ધિકો;

અરવાલો નાગરાજા, વસ્સં કરકસઞ્ઞિતં.

૧૦. વસ્સા પેત્વા સમુદ્દસ્મિં, સબ્બં ખિપતિદારુણો;

તત્ર મજ્ઝન્તિકત્થેરો, ખિપ્પં ગન્ત્વા વિહાયસા.

૧૧. અરવાલદહેવારિ-પિટ્ઠે ચઙ્કમનાદિકે;

અકાસિ દિસ્વા તંનાગા, રુટ્ઠારઞ્ઞો નિવેદયું.

૧૨. નાગરાજા’થરુટ્ઠો સો, વિવિધા ભિસિકા’કરિ;

વાતા મહન્તા વાયન્તિ, મેઘો ગજ્જતિ વસ્સતિ.

૧૩. ફલન્ત્ય’સનિયો વિજ્જુ, નિચ્છરન્તિ તતો તતો;

મહિરુહા પબ્બતાનં, કૂટાનિ પપતન્તિ ચ.

૧૪. વિરૂપરૂપા નાગા ચ, ભિંસાપેન્તિ સમન્તતો;

સયં ધુપાયતિ જલતિ, અક્કોસન્તો અનેકધા.

૧૫. સબ્બં તં ઇદ્ધિયા થેરો, પટિબાહિય ભિંસનં;

અવોચ નાગરાજં તં, દસ્સેન્તો બલમુત્તમં.

૧૬. સદેવ કોપિ ચે લોકો, આગન્ત્વા તાસયેય્ય મં;

ન મે પટિબલો અસ્સ, જનેતું ભયભેરવં.

૧૭. સચે’પિ ત્વં મહિં સબ્બં, સસમુદ્દં સપબ્બતં;

ઉક્ખિપિત્વા મહાનાગ, ખિપેય્યાસિ મમો’પરિ.

૧૮. નેવ મે સક્કુણેય્યાસિ, જનેતું ભયભેરવં;

અઞ્ઞદત્થુ તવે‘વ’સ્સ, વિઘાતો ઉરગાધિપ.

૧૯. તંસુત્વા નિમ્મદસ્સ’સ્સ, થેરો ધમ્મમદેસયિ;

તતો સરણસીલેસુ, નાગરાજા પતિટ્ઠહિ.

૨૦. તથેવ ચતુરાસીતિ-સહસ્સાનિ ભુજઙ્ગમા;

હિમવન્તેવ ગન્ધબ્બા, યક્ખા કુમ્ભણ્ડકા બહૂ.

૨૧. પણ્ડકો નામ યક્ખો તુ, સદ્ધિંહારિત યક્ખિયા;

પઞ્ચસતેહિ પુત્તેહિ, ફલં પાપુણિ આદિકં.

૨૨. ‘‘મા’’દાનિ કોધં જનિયિત્થ, ઇતો ઉદ્ધં યથાપુરે;

સસઘાતઞ્ચ મા’કત્થ, સુખકામાહિ પાણિનો.

૨૩. કરોથ મેત્તં સત્તેસુ, વસન્તુ મનુજા સુખં;

ઇતિ તેના’નુસિટ્ઠા તે, તથેવ પટિપજ્જિસું.

૨૪. તતો રતનપલ્લઙ્કે, થેરં સો ઉરગાધિપો;

નિસીદાપિય અટ્ઠાસિ, બીજમાનો તદન્તિકે.

૨૫. તદા કસ્મીરગન્ધાર-વાસિનો મનુજા’ગતા;

નાગરાજસ્સ પૂજત્થં, મન્ત્વા થેરં મહિદ્ધિકં.

૨૬. થેરમેવા’ભિ વાદેત્વા, એકમન્તં નિસીદિસું;

તેસં ધમ્મમદેસેસિ, થેરો આસિવિસોપમં.

૨૭. અસીતિયા સહસ્સાનં, ધમ્માભિસમયો અહુ;

સતસહસ્સ પુરિસા, પબ્બજું થેરસન્તિકે.

૨૮. તતોપ્પભુપતિ કસ્મિર-ગન્ધારં તે ઇદાનિપિ;

આસું કાસાવ પજ્જોતા, વત્થુત્તયપરાયના.

૨૯. ગન્ત્વા મહાદેવત્થેરો, દેસં મહિસમણ્ડલં;

સુત્તન્તં દેવદૂતં સો, કથેસિ જનમજ્ઝગો.

૩૦. ચત્તાલીસ સહસ્સાનિ, ધમ્મચક્ખું વિસોધયું;

ચત્તાલીસ સહસ્સાનિ, પબ્બજિંસુ તદન્તિકે.

૩૧. ગન્ત્વા’થ રક્ખિતત્થેરો, વનવાસિં નભે ઠિતો;

સંયુત્તમનમતગ્ગં, કથેસિ જનમજ્ઝગો.

૩૨. સટ્ઠિ નરસહસ્સાનં, ધમ્માભિસમયો અહુ;

સત્તતિંસ સહસ્સાનિ, પબ્બજિંસુ તદન્તિકે.

૩૩. વિહારાનં પઞ્ચસતં, તસ્મિંદેસે પતિટ્ઠહિ;

પતિટ્ઠાપેસિ તત્થેવં, થેરો સો જિનસાસનં.

૩૪. ગન્ત્વા’પરન્તકં થેરો, યોનકો ધમ્મરક્ખિતો;

અગ્ગિક્ખન્ધોપમં સુત્તં, કથેત્વા જનમજ્ઝગો.

૩૫. સત્તતિંસ સહસ્સાનિ, પાણે તત્થ સમાગતે;

ધમ્મામતમપાયેસિ, ધમ્મા ધમ્મેસુ કોવિદો.

૩૬. પુરિસાનઞ્ચ સહસ્સઞ્ચ, ઇત્થિયો ચ તતો’ધિકા;

ખત્તિયાનં કુલાયેવ, નિક્ખમિત્વાન પબ્બજું.

૩૭. મહારટ્ઠમિસી ગન્ત્વા, સો મહાધમ્મરક્ખિતો;

મહાનારદકસ્સપવ્હં, જાતકં કથયી તહિં.

૩૮. મગ્ગફલં પાપુણિંસુ, ચતુરાસીતિ સહસ્સકા;

તેરસન્તુ સહસ્સાનિ, પબ્બજિંસુ તદન્તિકે.

૩૯. ગન્ત્વાન યોનવિસયં, સો મહાધમ્મરક્ખિતો ઇસિ;

કાળકારામ સુત્તન્તં, કથેસિ જનમજ્ઝગો.

૪૦. પાણસત સહસ્સાનિ, સહસ્સાનિ ચ સત્તતિ;

મગ્ગફલં પાપુણિંસુ, દસ સહસ્સાનિ પબ્બજું.

૪૧. ગન્ત્વા ચતૂહિ થેરેહિ, દેસેસિ મજ્ઝિમો ઇસિ;

હિમવન્તપદેસસ્મિં, ધમ્મચક્કપવત્તનં.

૪૨. મગ્ગફલપાપુણિંસુ, અસીતિપાણ કોટિયો;

વિસું તે પઞ્ચરટ્ઠાનિ, પઞ્ચથેરા પસાદયું.

૪૩. પુરિસસતસહસ્સાનિ, એકેકસ્સેવ સન્તિકે;

પબ્બજિંસુ પસાદેન, સમ્માસમ્બુદ્ધ સાસને.

૪૪. સદ્ધિં ઉત્તરથેરેન, સોણત્થેરો મહિદ્ધિકો;

સુવણ્ણભૂમિં અગમા, તસ્મિં તુ સમયે પન.

૪૫. જાતે જાતે રાજગેહે, દારકે રુદ્દરક્ખસી;

સમુદ્દતો નિક્ખમિત્વા, ભક્ખિત્વા પન ગચ્છતિ.

૪૬. તસ્મિં ખણે રાજગેહે,

જાતો હોતિ કુમારકો;

થેરે મનુસ્સા પસ્સિત્વા,

રક્ખસાનં સહાયકા.

૪૭. ઇતિ ચિન્તિય મારેતું, સા યુવા ઉપસઙ્કમું;

‘‘કિમેતન્તિ’’ચ પુચ્છિત્વા, થેરં તે એવ માહુતે.

૪૮. સમણા મયં હિમવન્તા, ન રક્ખસિ સહાયકા;

રક્ખસી સા સપરિસા, નિક્ખન્તા હોતિ સાગરા.

૪૯. તં દિસ્વાન મહારાવં, વિરવિંસુ મહાજના;

દિગુણે રક્ખસે થેરો, માપયિત્વા ભયાનકે.

૫૦. તં રક્ખસિં સપરિસં, પરિક્ખિપિ સમન્તતો;

ઇદં ઇમેહિ ઉદ્ધન્તિ, મન્ત્વા ભીતા પલાયિસા.

૫૧. તસ્સ દેસસ્સ આરક્ખં, ઠપેત્વાન સમન્તતો;

તસ્મિં સમાગમે થેરો, બ્રહ્મજાલમદેસયિ.

૫૨. સરણેસુ ચ સીલેસુ, અટ્ઠંસુ બહવો જના;

સટ્ઠિયા તુ સહસ્સાનં, ધમ્માભિસમયો અહુ.

૫૩. અડ્ઢુડ્ઢાનિ સહસ્સાનિ, પબ્બજું કુલદારકા;

પબ્બજિંસુ દિયડ્ઢન્તુ, સહસ્સં કુલધીતરો.

૫૪. તતોપ્પભુતિ સઞ્જાતે, રાજગેહે કુમારકે;

નામં કરિંસુ રાજાનો, સોણુત્તર સનામકે.

૫૫. મહાજનસ્સાપિ જિનસ્સ કડ્ઢનં;

વિહાય પત્તં અમતં સુખમ્પિતે;

કરિંસુ લોકસ્સ હિતં તહિં તહિં;

ભવેય્ય યો લોકહિતે પમાદવાતિ.

સુજનપ્પસાદ સંવેગત્થાય કતે મહાવંસે

નાનાદેસપસાદો નામ દ્વાદસમો પરિચ્છેદો.