રાજકણ્ડ

૨૫૧. મહાજનં યો રઞ્જેતિ, ચતૂહિપિ વત્થૂહિ વા;

રાજાતિ વુચ્ચતે લોકે, ઇતિ સલ્લક્ખયે વિદ્વા.

૨૫૨. દાનઞ્ચ અત્થચરિયા, પિયવાચા અત્તસમં;

સઙ્ગહા ચતુરો ઇમે, મુનિન્દેન પકાસિતા.

દાનમ્પિ અત્થચરિયતઞ્ચ, પિયવાદિતઞ્ચ સમાનત્તતઞ્ચ;

કરિયચરિયસુસઙ્ગહં બહૂનં, અનવમતેન ગુણેન યાતિ સગ્ગં;

દાનઞ્ચ પેય્યવજ્જઞ્ચ, અત્થચરિયા ચ યા ઇધ;

સમાનત્તતા ચ ધમ્મેસુ, તત્થ તત્થ યથારહં;

એતે ખો સઙ્ગહા લોકે, રથસ્સાણીવ યાયતો.

૨૫૩. દાનં સીલં પરિચ્ચાગં, અજ્જવં મદ્દવં તપં;

અક્કોધં અવિહિંસઞ્ચ, ખન્તી ચ અવિરોધનં;

દસેતે ધમ્મે રાજાનો, અપ્પમત્તેન ધારય્યું.

૨૫૪. એકયામં સયે રાજા, દ્વિયા મઞ્ઞેવ પણ્ડિતો;

ઘરાવાસો તિયામોવ, ચતુયામો તુ યાચકો.

૨૫૫. અપુત્તકં ઘરં સુઞ્ઞં, રટ્ઠં સુઞ્ઞં અરાજકં;

અસિપ્પસ્સ મુખં સુઞ્ઞં, સબ્બસુઞ્ઞં દલિદ્દત્તં.

૨૫૬. ધનમિચ્છે વાણિજેય્ય, વિજ્જમિચ્છે ભજે સુતં;

પુત્તમિચ્છે તરુણિત્થિં, રાજામચ્ચં ઇચ્છાગતે.

૨૫૭. પક્ખીનં બલમાકાસો, મચ્છાનમુદકં બલં;

દુબ્બલસ્સ બલં રાજા, કુમારાનં રુદં બલં.

૨૫૮. ખમા જાગરિયુટ્ઠાનં, સંવિભાગો દયિક્ખણા;

નાયકસ્સ ગુણા એતે, ઇચ્છિતબ્બા સતં સદા.

૨૫૯. સકિં વદન્તિ રાજાનો, સકિં સમણબ્રાહ્મણા;

સકિં સપ્પુરિસા લોકે, એસ ધમ્મો સનન્તનો.

૨૬૦. અલસો ગીહિ કામભોગી ન સાધુ,

અસઞ્ઞતો પબ્બજિતો ન સાધુ;

રાજા ન સાધુ અનિસમ્મકારી,

યો પણ્ડિતો કોધનો તં ન સાધુ.

૨૬૧. આયં ખયં સયં જઞ્ઞા, કતાકતં સયં જઞ્ઞા;

નિગ્ગહે નિગ્ગહારહં, પગ્ગહે પગ્ગહારહં.

૨૬૨. માતા પુત્તકતં પાપં, સિસ્સકતં ગુરુ તથા;

રાજા રટ્ઠકતં પાપં, રાજકતં પુરોહિતો.

૨૬૩. અક્કોધેન જિને કોધં, અસાધું સાધુના જિને;

જિને કદરિયં દાનેન, સચ્ચેનાલિકવાદિનં.

૨૬૪. અદન્તદમનં દાનં, દાનં સબ્બત્થસાધકં;

દાનેન પિયવાચાય, ઉન્નમન્તિ નમન્તિ ચ.

અદન્તદમનં દાનં, અદાનં દન્તદૂસકં;

દાનેન પિયવાચાય, ઉન્નમન્તિ નમન્તિ ચ.

૨૬૫. દાનં સિનેહભેસજ્જં, મચ્છેરં દોસનોસધં;

દાનં યસસ્સીભેસજ્જં, મચ્છેરં કપણોસધં.

૨૬૬. ન રઞ્ઞા સમકં ભુઞ્જે, કામભોગં કુદાચનં;

આકપ્પં રસભુત્તં વા, માલાગન્ધવિલેપનં;

વત્થસબ્બમલઙ્કારં, ન રઞ્ઞા સદિસં કરે.

૨૬૭. ન મે રાજા સખા હોતિ, ન રાજા હોતિ સમકો;

એસો સામિકો મય્હન્તિ, ચિત્તે નિટ્ઠં સણ્ઠાપયે.

૨૬૮. નાતિદૂરે ભજે રઞ્ઞો, નચ્ચાસન્ને પવાતકે;

ઉજુકે નાતિનિન્ને ચ, ન ભજે ઉચ્ચમાસને;

છ દોસે વજ્જે સેવકો, અગ્ગીવ સંયતો તિટ્ઠે.

ન પચ્છતો ન પુરતો, નાપિ આસન્નદૂરતો;

ન કચ્છે નોપિ પટિવાતે, ન ચાપિ ઓણતુણ્ણતે;

ઇમે દોસે વિવજ્જેત્વા, એકમન્તં ઠિતા અહુ –

૨૬૯. જપ્પેન મન્તેન સુભાસિતેન,

અનુપ્પદાનેન પવેણિયા વા;

યથા યથા યત્થ લભેથ અત્થં,

તથા તથા તત્થ પરક્કમેય્ય.

૨૭૦. કસ્સકો વાણિજો મચ્ચો, સમણો સુતસીલ વા;

તેસુ વિપુલજાતેસુ, રટ્ઠમ્પિ વિપુલં સિયા.

૨૭૧. તેસુ દુબ્બલજાતેસુ, રટ્ઠમ્પિ દુબ્બલં સિયા;

તસ્મા સરટ્ઠં વિપુલં, ધારયે રટ્ઠભારવા.

૨૭૨. મહારુક્ખસ્સ ફલિનો, આમં છિન્દતિ યો ફલં;

રસઞ્ચસ્સ ન જાનાતિ, બીજઞ્ચસ્સ વિનસ્સતિ.

૨૭૩. મહારુક્ખૂપમં રટ્ઠં, અધમ્મેન પસાસતિ;

રસઞ્ચસ્સ ન જાનાતિ, રટ્ઠઞ્ચસ્સ વિનસ્સતિ.

૨૭૪. મહારુક્ખસ્સ ફલિનો, પક્કં છિન્દતિ યો ફલં;

રસઞ્ચસ્સ વિજાનાતિ, બીજઞ્જસ્સ ન નસ્સતિ.

૨૭૫. મહારુક્ખૂપમં રટ્ઠં, ધમ્મેન યો પસાસતિ;

રસઞ્ચસ્સ વિજાનાતિ, રટ્ઠઞ્ચસ્સ ન નસ્સતિ.