પકિણ્ણકકણ્ડ

૩૧૬. કુલસીલગુણોપેતો, સબ્બધમ્મપરાયણો;

પવીણો પેસનાજ્ઝક્ખો, ધમ્મજ્ઝક્ખો વિધીયતે.

૩૧૭. વેદવેદઙ્ગતત્વઞ્ઞો, જપ્પહોમપરાયણો;

આસીવાદવચોયુત્તો, એસ રાજપુરોહિતો.

કપ્પો બ્યાકરણં જોતિ – સત્થં સિક્ખા નિરુત્તિ ચ;

છન્દોવિચિતિ ચેતાનિ, વેદઙ્ગાનિ વદન્તિ છ.

૩૧૮. સકિં વુત્તગહિતત્તો, લહુહત્થો જિતક્ખરો;

સબ્બસત્થસમાલોકી, પકટ્ઠો નામ લેખકો.

૩૧૯. સમત્તનીતિસત્થઞ્ઞો, વાહને પૂરિતસ્સમો;

સૂરવીરગુણોપેતો, સેનાઝક્ખો વિધીયતે.

૩૨૦. સુધી વાક્યપટુ, પઞ્ઞો, પરચિત્તોપલક્ખણો;

ધીરો યથાત્થવાદી ચ, એસ દૂતો વિધીયતે.

૩૨૧. પુત્તનત્તગુણોપેતો, સત્થઞ્ઞો રસપાચકો;

સૂરો ચ કથિનો ચેવ, સૂપકારો સ વુચ્ચતે.

૩૨૨. ઇઙ્ગિતાકારતત્તઞ્ઞો, બલવાપિયદસ્સનો;

અપ્પમાદી સદા દક્ખો, પતીહારો સ ઉચ્ચતે.

૩૨૩. ઇત્થિમિસ્સે કુતો સીલં, મંસભક્ખે કુતો દયા;

સુરાપાને કુતો સચ્ચં, મહાલોભે કુતો લજ્જા;

મહાતન્દે કુતો સિપ્પં, મહાકોધે કુતો ધનં.

૩૨૪. સુરાયોગો વેલાલો ચ, સમજ્જચરણઙ્ગતો;

ખિડ્ડા ધુત્તો પાપમિત્તો, અલસો ભોગનાસકા.

૩૨૫. જીવન્તાપિ મતા પઞ્ચ, બ્યાસેન પરિકિત્તિતા;

દુક્ખિતો બ્યાધિતિ મૂળ્હો, ઇણવા નિચ્ચસેવકો.

૩૨૬. નિદ્દાલુકો પમાદો ચ, સુખિતો રોગવાલસો;

કામુકો કમ્મારામો ચ, સત્તેતે સત્થવજ્જિતા.

૩૨૭. ગોણાહિ સબ્બગિહીનં, પોસકા ભોગદાયકો;

તસ્મા હિ માતાપિતૂવ, માનયે સક્કરેય્ય ચ.

૩૨૮. યથા માતા પિતા ભાતા, અઞ્ઞેવાપિ ચ ઞાતકા;

ગાવો નો પરમા મિત્તા, યાસુ જાયન્તિ ઓસધા.

૩૨૯. અન્નદા બલદા ચેતા, વણ્ણદા સુખદા તથા;

એતમત્થવસં ઞત્વા, નાસુ ગાવો હનિંસુ તે.

૩૩૦. યે ચ ખાદન્તિ ગોમંસં, માતુમંસંવ ખાદરે;

મતેસુ તેસુ ગિજ્ઝાનં, દદે સોતે ચ વાહયે.

૩૩૧. દ્વિગુણો થીનમાહારો, બુદ્ધિચાપિ ચતુગ્ગુણો;

છગ્ગુણો હોતિ વાયામો, કામોત્વટ્ઠગુણો ભવે.

૩૩૨. ન લોકે સોભતે મૂળ્હો, કેવલત્તપસંસકો;

અપિ સમ્પિહિતે કૂપે, કતવિજ્જો પકાસતે.

૩૩૩. કોસજ્જં ભયતો દિસ્વા, વીરિયારમ્ભઞ્ચ ખેમતો;

આરદ્ધવીરિયા હોથ, એસા બુદ્ધાનુસાસની.

૩૩૪. વિવાદં ભયતો દિસ્વા, અવિવાદઞ્ચ ખેમતો;

સમગ્ગા સખિલા હોથ, એસા બુદ્ધાનુસાસની.

૩૩૫. પમાદં ભયતો દિસ્વા, અપ્પમાદઞ્ચ ખેમતો;

ભાવેથટ્ઠઙ્ગિકં મગ્ગં, એસા બુદ્ધાનુસાસની.

૩૩૬. ગરહા ચ પસંસા ચ, અનિચ્ચા તાવકાલિકા;

અપ્પકાચેકદેસાવ, ન તા ઇક્ખેય્ય પણ્ડિતો;

ધમ્માધમ્મંવ ઇક્ખેય્ય, અત્થાનત્થં હિતાહિતં.