જિનવંસદીપં |ઓ૦.૦૦૦૧|

નમો તસ્સ ભગવતો અરહતો સમ્માસમ્બુદ્ધસ્સ

૧. મહાદયો યો હદયો’દયો’દયો

હિતાય દુક્ખાનુભવે ભવે ભવે,

અકાસિ સમ્બોધિપદં પદં પદં

તમાભિવન્દામિ જિનં જિનં જિનં; (યમકબન્ધનં)

૨. |ઓ૦.૦૦૦૨|

પહાય યત્થા’ભિરતિં રતિં રતિં

રમન્તિ ધમ્મેવ મુની મુની મુની,

વિમુત્તિદં સબ્બભવા ભવા’ભવા

તમાભિવન્દે મહિતં હિતં હિતં; (યમકબન્ધનં)

૩. |ઓ૦.૦૦૦૪|

નિપીતસદ્ધમ્મરસા રસા’રસા

સુપુઞ્ઞખેત્તો’રસતં સતં સતં,

ગતા વિધૂતા વિનયેન યેન યે

તમાભિવન્દે’સિગણઙ્ગણ’ઙ્ગણં; (યમકબન્ધનં)

૪. |ઓ૦.૦૦૦૫|

જિના’નતમ્ભોરુહ હંસરાજિની

જિનોરસાનં મુખપઞ્જરા’લિ ની,

સદત્થસારં સરસં વિસૂદ ની

ઉપેતુ મે માનસમેવ વાણિ ની;

૫. કમ્માવસેસા વિચિતો’પજાત્યા

ગન્થા’હિસઙ્ખારવિબન્ધકા મે,

પણામ પુઞ્ઞાતિસયેન’નેન

મા પાકદાના’વસરા ભવન્તુ;

૬. સુવણ્ણવણ્ણસ્સ જિનસ્સ વણ્ણં

વણ્ણેય્ય કપ્પમ્પિ કજિતો સુવણ્ણો,

કપ્પસ્સિ’વોસાન મનત્તતાય

ન પાપુણે બુદ્ધગુણાન મન્તં;

૭. |ઓ૦.૦૦૦૬|

નિદ્ધન્ત ચામીકર ચારુ રૂપં

સરસ્સતી ભૂસણ ભાસનંચ,

અનઞ્ઞ સાધારણ ઞાણમસ્સ

અવાવિયા’ચિન્તિય મપક્પમેય્યં;

૮. કુહિં અસાધારણ રૂપ લીલા

કુહિં અસાધારણ વાણિ લીલા,

કુહિં અસાધારણઞાણ લીલા

કુહિં નુ મે મન્દમતિસ્સ લીલા;

૯. |ઓ૦.૦૦૦૭|

વિભાવિમાની પરવમ્હિનો યે

ઇસ્સા’ભિમાનેન વિભઞ્ઞમાના,

ગવેસયન્તી’ધ પરસ્સ રન્ધં

તેસં પસંસાગરહાહિ કિમ્મે;

૧૦. પસત્થ સત્થાગમ પારદસ્સી

યે સાધવો સાધુ ગુણપ્પસન્તા,

ગન્થસ્સ નિમ્માણપરિસ્સમં નો

જાનન્તિ તેયેવ ઇધપ્પમાણા;

૧૧. આદિચ્ચવંસપ્પભવસ્સ તસ્સ

જિનસ્સ સત્થાગમકોવિદેહિ,

વુત્તોપિ પુબ્બાચરિયેહિ યેસુ

ગન્થેસુ સઙ્ખેપવસેન વંસો;

૧૨. ન તેહિ સક્કા સુગતસ્સ વંસં

કિઞ્ચાપિ વિઞ્ઞાતુ મસેસયિત્વા,

સમ્પુણ્ણવંસસ્સ વિભાવનાય

તસ્મા સમુસ્સાહિત માનસેન;

૧૩. |ઓ૦.૦૦૦૮|

અભિપ્પસન્નો રતનત્તયમ્હિ

પસત્થવંસપ્પભવો પભુનં,

વિભુસણો વિસ્સુતકિત્તિઘોસો

યો ભાતિ લઙ્કાય મુળારભાગ્યો;

૧૪. અમન્દચાગા’ભિરતસ્સ

પુનન્દુ નામસ્સ દયાધનસ્સ,

બુદ્ધે પસાદાતિસયસ્સ તસ્સ

અજ્ઝેસનઞ્ચાપિ પટિગ્ગહેત્વા;

૧૫. નસ્સાય પુબ્બાચરિયો’પદેસં

સોતૂન મત્થાય મયા હિતાય,

નિરુત્તિયા માગધિકાય સમ્મા

વિધીયતે’દં જિનવંસદીપં;

૧૬. |ઓ૦.૦૦૦૯|

સદ્ધાસિનેહાનુગતાય પઞ્ઞા-

દસાય સોતૂહિ મનોવિમાને,

પદીપિતો’યં જિનવંસદીપ-

દીપોહરેપાપતમપ્પબન્ધં;

૧૭. પુરઙ્ગપુણ્ણા સિરિજમ્બુદીપે

સમ્પત્તિભારેન દિવા’વતિણ્ણા,

યા દેવરાજસ્સ’મરાવતી’વા-

મરાવતીનામ પુરી પુરે’સી;

૧૮. વિજ્જાધરાનઞ્ચ વિહઙ્ગમાનં

વિબન્ધ વેહાસગતિં બહાસ,

યસ્મિં પુરસ્મિં જિતવેરિ ચક્કં

પાકારચક્કં વિય ચક્કવાળં;

૧૯. |ઓ૦.૦૦૧૦|

સઞ્ચુમ્બિતમ્હોજ રજો પબન્ધ-

સુપિઞ્જરાપા પરિખાહિરામા,

પુરિત્થિ પાકાર નિતમ્બભાગે

સમુબ્બહી કઞ્ચન મેખલા’ભં;

૨૦. રત્તિન્દિવા રત્તમણિ’ન્દનીલ-

મણિપ્પભારઞ્જિત રાજધાનિ,

બબન્ધ યા’મન્દસુરિન્દચાપ-

સમુજ્જલાકાસતલબ્બિલાસં;

૨૧. યહિંવધૂનં વદનમ્બુજેહિ

કતાવમાનં હરિણઙ્કબિમ્બં,

પભાહિ નીલોપલતોરણાતં

સોકાભીભૂતંચ વિવણ્ણમાપ;

૨૨. |ઓ૦.૦૦૧૧|

સરોરુહ’ન્તી મણિમન્દિરાભા-

સઞ્ચુમ્બિતં પુણ્ણસસઙ્કબિમ્બં;

સઙ્કાય રામાજનતા’ભિરામા

કરે પસારેસિ પુરમ્હિ યસ્મિં;

૨૩. યત્થ’ઙ્ગનાનં પટિબિમ્બિતાનિ

આદાસભિત્તીસુ મુખમ્બુજાનિ,

આસું વિઘાતાય મધુબ્બતાનં

વિલોચનાલીન મનુગ્ગહાય;

૨૪. સમ્મત્ત માતઙ્ગ ધરાધરેહિ

યસ્મિં અભિસ્સન્દ મદસ્સવન્તિ,

તુરઙ્ગ રઙ્ગેહી તરઙ્ગ માલા

સમાકુલેવા’સિ વિધૂત ધૂલી;

૨૫. |ઓ૦.૦૦૧૨|

નિક્ખિત્તવીણા મણિનુપુરાનં

વિલાસિનીનં મુદુપાણિ પાદે,

મત્તાલિમાલા કલનાદિની કિં

નાલઙ્કરું યત્થ કતાવકાસા;

૨૬. ધવત્થિનીનં કુચસારસેહિ

નેત્તાલિભારા’નનનીરજેહિ,

યા હાસવીચીહિ પુરી રજન્યા

રરાજ સમફુલ્લસરોજિની’વ;

૨૭. ચન્દપ્પભા ચુમ્બિત ચન્દકન્ત

પાસાણધારા મણિચન્દિકાસૂ,

ચન્દાનનાનં યહિ મઙ્ગનાહં

પરિસ્સમસ્સો’પસમાય’હેસું;

૨૮. |ઓ૦.૦૦૧૩|

યસ્મિં પૂરે ઉદ્ધમધો વિનદ્ધ-

જુતિપ્પબન્ધો મણિમન્દિરાનં,

સમુબ્બહી ગેરુક પઙ્ક દિદ્ધ-

વિતાન પચ્ચત્થરણબ્બિલાસં

૨૯. સુવણ્ણ મુત્તા મણિ વંસવણ્ણા-

પવાળ રૂપી વજિરેહિઞ્ચા’પિ,

યા સત્તધઞ્ઞેહિ ધનેહિ ફીતા

અહૂ પુરિ ધઞ્ઞવતી’વ નારી; (સિલેસબન્ધનં)

૩૦. પસારિતા’નેકદિસામુખેસુ

વિચિત્તવત્થા’ભરણાદિપૂરા,

યત્થા’પણા નિજ્જિતકપ્પરુક્ખા

કરિંસુ લોકાભિમતત્થસિદ્ધિં;

૩૧. |ઓ૦.૦૦૧૪|

પરાગરત્તા મધુપાતિમત્તા

સમ્હિન્નવેલા ઘનનીલવાલા,

હંસાસયા પઞ્ચસરાભિરામા

યસ્મિં તળાકા વિય કામભોગી; (સિલેસબન્ધનં)

૩૨. પુરન્તરસ્મિં રતનગ્ઘિકાનં

રંસિપ્પબન્ધેહિ હતન્ધકારે,

કુન્દારવિન્દબ્ભુદયેનયસ્મિં

રત્તિન્દિવાભેદ મવેદિ લોકો;

૩૩. |ઓ૦.૦૦૧૫|

માતઙ્ગજીમૂતઘટાય ઘણ્ટા-

ટઙ્કારગમ્ભીરરવાય યસ્મિં,

પલમ્ભીતા મત્તસિખણ્ડિમાલા

અકા વિકાલેપિ અખણ્ડકીળં;

૩૪. પુરમ્હિ યસ્મિં ચરણમ્બુજેહિ

વધૂજતો બન્ધિતનૂપુરેહિ,

વિકાસ કોકાસન સીસ બદ્ધ