૬. અરઞ્ઞાદિવગ્ગ

૬૦૫. પબ્બતો ગિરિ સેલો’દ્દિ, નગા’ચલ, સિલુચ્ચયા;

સિખરી ભૂધરોથ બ્ભ, પાસાણા’સ્મો’પલો સિલા.

૬૦૬. ગિજ્ઝકૂટો ચ વેભારો, વેપુલ્લો’સિગિલી નગા;

વિઞ્ઝો પણ્ડવ વઙ્કાદી, પુબ્બસેલો તુ ચો’દયો;

મન્દરો પરસેલો’ત્થો, હિમવા તુ હિમાચલો.

૬૦૭. ગન્ધમાદન કેલાસ, ચિત્તકૂટ સુદસ્સના;

કાલકૂટો તિકૂટા’સ્સ, પત્થો તુ સાનુ નિત્થિયં.

૬૦૮. કૂટો વા સિખરં સિઙ્ગં, પપાતો તુ તટો ભવે;

નિતમ્બો કટકો નિત્થી, નિજ્ઝરો પસવો’મ્બુનો.

૬૦૯. દરી’ત્થી કન્દરો દ્વીસુ, લેણં તુ ગબ્ભરં ગુહા;

સિલાપોક્ખરણી સોણ્ડી, કુઞ્જં નિકુઞ્જ મિત્થિ ન.

૬૧૦. ઉદ્ધ મધિચ્ચકા સેલ, સ્સાસન્ના ભૂમ્યુ પચ્ચકા;

પાદો તુ’પન્તસેલો થ,

ધાતુ’ત્તો ગેરિકાદિકો.

ઇતિ સેલવગ્ગો.

૬૧૧. મિગિન્દો કેસરી સીહો, તરચ્છો તુ મિગાદનો;

બ્યગ્ઘો તુ પુણ્ડરીકો થ, સદ્દૂલો દીપિની’રિતો.

૬૧૨. અચ્છો ઇક્કો ચ ઇસ્સો તુ,

કાળસીહો ઇસો પ્યથ;

રોહિસો રોહિતો ચાથ,

ગોકણ્ણો ગણિ કણ્ટકા.

૬૧૩. ખગ્ગ ખગ્ગવિસાણા તુ, પલાસાદો ચ ગણ્ડકો;

બ્યગ્ઘાદિકે વાળમિગો, સાપદો થ પ્લવઙ્ગમો.

૬૧૪. મક્કટો વાનરો સાખા, મિગો કપિ વલીમુખો;

પલવઙ્ગો, કણ્હતુણ્ડો,

ગોનઙ્ગુલો [ગોનઙ્ગલો (ટી.)] તિ સો મતો.

૬૧૫. સિઙ્ગાલો [સિગાલો (સી.)] જમ્બુકો કોત્થુ, ભેરવો ચ સિવા પ્યથ;

બિળારો બબ્બુ મઞ્જારો, કોકો તુ ચ વકો ભવે.

૬૧૬. મહિંસો [મહિસો (સી.)] ચ લુલાયો થ,

ગવજો ગવયો સમા;

સલ્લો તુ સલ્લકો થા’સ્સ,

લોમમ્હિ સલલં સલં.

૬૧૭. હરિણો મિગ સારઙ્ગા, મગો અજિનયોનિ ચ;

સૂકરો તુ વરોહો થ,

પેલકો ચ સસો ભવે.

૬૧૮. એણેય્યો એણીમિગો ચ, પમ્પટકો તુ પમ્પકો;

વાતમિગો તુ ચલની, મૂસિકો ત્વા’ખુ ઉન્દુરો.

૬૧૯. ચમરો પસદો ચેવ, કુરુઙ્ગો મિગમાતુકા;

રુરુ રઙ્કુ ચ નીકો ચ, સરભાદી મિગન્તરા.

૬૨૦. પિયકો ચમૂરુ કદલી, મિગાદી ચમ્મયોનયો;

મિગા તુ પસવો સીહા, દયો સબ્બચતુપ્પદા.

૬૨૧. લૂતા તુ લૂતિકા ઉણ્ણ, નાભિ મક્કટકો સિયા;

વિચ્છિકો ત્વા’ળિ કથિતો, સરબૂ ઘરગોળિકા.

૬૨૨. ગોધા કુણ્ડો પ્યથો કણ્ણ, જલૂકા સતપદ્યથ;

કલન્દકો કાળકા થ, નકુલો મઙ્ગુસો ભવે.

૬૨૩. કકણ્ટકો ચ સરટો, કીટો તુ પુળવો કિમિ;

પાણકો ચાપ્યથો ઉચ્ચા,

લિઙ્ગો લોમસપાણકો.

૬૨૪. વિહઙ્ગો વિહગો પક્ખી, વિહઙ્ગમ ખગ’ણ્ડજા;

સકુણો ચ સકુન્તો વિ, પતઙ્ગો સકુણી દ્વિજો.

૬૨૫. વક્કઙ્ગો પત્તયાનો ચ, પતન્તો નીળજો ભવે;

તબ્ભેદા વટ્ટકા જીવ, ઞ્જીવો ચકોર તિત્તિરા.

૬૨૬. સાળિકા કરવીકો ચ, રવિહંસો કુકુત્થકો;

કારણ્ડવો ચ પિલવો [બિલવો (ટી.)], પોક્ખરસાતકા’દયો.

૬૨૭. પતત્તં પેખુણં પત્તં, પક્ખો પિઞ્છં છદો ગરુ;

અણ્ડં તુ પક્ખિબીજે થ, નીળો નિત્થી કુલાવકં.

૬૨૮. સુપણ્ણમાતા વિનતા, મિથુનં થીપુમદ્વયં;

યુગં તુ યુગલં દ્વન્દં, યમકં યમલં યમં.

૬૨૯. સમૂહો ગણ સઙ્ઘાતા, સમુદાયો ચ સઞ્ચયો;

સન્દોહો નિવહો ઓઘો, વિસરો નિકરો ચયો.

૬૩૦. કાયો ખન્ધો સમુદયો, ઘટા સમિતિ સંહતિ;

રાસિ પુઞ્જો સમવાયો, પૂગો જાતં કદમ્બકં.

૬૩૧. બ્યૂહો વિતાન ગુમ્બા ચ, કલાપો જાલ મણ્ડલં;

સમાનાનં ગણો વગ્ગો,

સઙ્ઘો સત્થો તુ જન્તુનં.

૬૩૨. સજાતિકાનં તુ કુલં, નિકાયો તુ સધમ્મિનં;

યૂથો નિત્થી સજાતિય, તિરચ્છાનાનમુચ્ચતે.

૬૩૩. સુપણ્ણો વેનતેય્યો ચ, ગરુળો વિહગાધિપો;

પરપુટ્ઠો પરભતો, કુણાલો કોકિલો પિકો.

૬૩૪. મોરો મયૂરો વરહી, નીલગીવ સિખણ્ડિનો;

કલાપી ચ સિખી કેકી, ચૂળા તુ ચ સિખા ભવે.

૬૩૫. સિખણ્ડો વરહઞ્ચેવ, કલાપો પિઞ્છ મપ્યથ;

ચન્દકો મેચકો ચાથ, છપ્પદો ચ મધુબ્બતો.

૬૩૬. મધુલીહો મધુકરો, મધુપો ભમરો અલિ;

પારાવતો કપોતો ચ, કકુટો ચ પારેવતો.

૬૩૭. ગિજ્ઝો ગદ્ધોથ કુલલો, સેનો બ્યગ્ઘીનસો પ્યથ;

તબ્ભેદા સકુણગ્ઘિ’ત્થી, આટો દબ્બિમુખદ્વિજો.

૬૩૮. ઉહુઙ્કારો ઉલૂકો ચ, કોસિયો વાયસારિ ચ;

કાકો ત્વ’રિટ્ઠો ધઙ્કો ચ, બલિપુટ્ઠો ચ વાયસો.

૬૩૯. કાકોલો વનકાકો થ,

લાપો લટુકિકા પ્યથ;

વારણો હત્થિલિઙ્ગો ચ, હત્થિસોણ્ડવિહઙ્ગમો.

૬૪૦. ઉક્કુસો કુરરો કોલ,ટ્ઠિપક્ખિમ્હિ ચ કુક્કુહો;

સુવો તુ કીરો ચ સુકો, તમ્બચૂળો તુ કુક્કુટો.

૬૪૧. વનકુક્કુટો ચ નિજ્જિવ્હો, અથ કોઞ્ચા ચ કુન્તની;

ચક્કવાકો તુ ચક્કવ્હો, સારઙ્ગોતુ ચ ચાતકો.

૬૪૨. તુલિયો પક્ખિબિળાલો,

સતપત્તો તુ સારસો;

બકો તુ સુક્કકાકોથ,

બલાકા વિસકણ્ઠિકા.

૬૪૩. લોહપિટ્ઠો તથા કઙ્કો, ખઞ્જરીટો તુ ખઞ્જનો;

કલવિઙ્કો તુ ચાટકો, દિન્દિભો તુ કિકી ભવે.

૬૪૪. કાદમ્બો કાળહંસોથ, સકુન્તો ભાસપક્ખિનિ;

ધૂમ્યાટો તુ કલિઙ્ગોથ,

દાત્યૂહો કાળકણ્ઠકો.

૬૪૫. ખુદ્દાદી મક્ખિકાભેદા, ડંસો પિઙ્ગલમક્ખિકા;

આસાટિકા મક્ખિકાણ્ડં, પતઙ્ગો સલભો ભવે.

૬૪૬. સૂચિમુખો ચ મકસો, ચીરી તુ ઝલ્લિકા [ઝિલ્લિકા (ક.)] થ ચ;

જતુકા જિનપત્તા થ, હંસો સેતચ્છદો ભવે.

૬૪૭. તે રાજહંસા રત્તેહિ, પાદતુણ્ડેહિ ભાસિતા;

મલ્લિકા’ખ્યા ધતરટ્ઠા, મલીનેહ્ય’સિતેહિ ચ.

૬૪૮. તિરચ્છો તુ તિરચ્છાનો, તિરચ્છાનગતો સિયાતિ.

ઇતિ અરઞ્ઞાદિવગ્ગો.