૧. સિક્ખસુત્તં

૭૩. ‘‘પઞ્ચિમાનિ, ભિક્ખવે, સિક્ખાદુબ્બલ્યાનિ. કતમાનિ પઞ્ચ? પાણાતિપાતો …પે… સુરામેરયમજ્જપમાદટ્ઠાનં – ઇમાનિ ખો, ભિક્ખવે, પઞ્ચ સિક્ખાદુબ્બલ્યાનિ.

‘‘ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ચત્તારો સમ્મપ્પધાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ અનુપ્પન્નાનં પાપકાનં અકુસલાનં ધમ્માનં અનુપ્પાદાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; ઉપ્પન્નાનં પાપકાનં અકુસલાનં ધમ્માનં પહાનાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; અનુપ્પન્નાનં કુસલાનં ધમ્માનં ઉપ્પાદાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; ઉપ્પન્નાનં કુસલાનં ધમ્માનં ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ. ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ઇમે ચત્તારો સમ્મપ્પધાના ભાવેતબ્બા’’તિ. પઠમં.

૭૪-૮૧. (યથા સતિપટ્ઠાનવગ્ગે તથા સમ્મપ્પધાનવસેન વિત્થારેતબ્બા.)