૨. દુતિયપણ્ણાસકં

(૬) ૧. ખેમવગ્ગો

૧. ખેમસુત્તં

૫૨. ‘‘‘ખેમં ખેમ’ન્તિ, આવુસો, વુચ્ચતિ. કિત્તાવતા નુ ખો, આવુસો, ખેમં વુત્તં ભગવતા’’તિ?

‘‘ઇધાવુસો, ભિક્ખુ વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ. એત્તાવતાપિ ખો, આવુસો, ખેમં વુત્તં ભગવતા પરિયાયેન…પે….

‘‘પુન ચપરં, આવુસો, ભિક્ખુ સબ્બસો નેવસઞ્ઞાનાસઞ્ઞાયતનં સમતિક્કમ્મ સઞ્ઞાવેદયિતનિરોધં ઉપસમ્પજ્જ વિહરતિ, પઞ્ઞાય ચસ્સ દિસ્વા આસવા પરિક્ખીણા હોન્તિ. એત્તાવતાપિ ખો, આવુસો, ખેમં વુત્તં ભગવતા નિપ્પરિયાયેના’’તિ. પઠમં.

૨. ખેમપ્પત્તસુત્તં

૫૩. ખેમપ્પત્તો ખેમપ્પત્તોતિ, આવુસો, વુચ્ચતિ…પે…. દુતિયં.

૩. અમતસુત્તં

૫૪. અમતં અમતન્તિ, આવુસો, વુચ્ચતિ…પે…. તતિયં.

૪. અમતપ્પત્તસુત્તં

૫૫. અમતપ્પત્તો અમતપ્પત્તોતિ, આવુસો, વુચ્ચતિ…પે…. ચતુત્થં.

૫. અભયસુત્તં

૫૬. અભયં અભયન્તિ, આવુસો, વુચ્ચતિ…પે…. પઞ્ચમં.

૬. અભયપ્પત્તસુત્તં

૫૭. અભયપ્પત્તો અભયપ્પત્તોતિ, આવુસો, વુચ્ચતિ…પે…. છટ્ઠં.

૭. પસ્સદ્ધિસુત્તં

૫૮. પસ્સદ્ધિ પસ્સદ્ધીતિ, આવુસો, વુચ્ચતિ…પે…. સત્તમં.

૮. અનુપુબ્બપસ્સદ્ધિસુત્તં

૫૯. અનુપુબ્બપસ્સદ્ધિ અનુપુબ્બપસ્સદ્ધીતિ, આવુસો, વુચ્ચતિ…પે…. અટ્ઠમં.

૯. નિરોધસુત્તં

૬૦. નિરોધો નિરોધોતિ, આવુસો, વુચ્ચતિ…પે…. નવમં.

૧૦. અનુપુબ્બનિરોધસુત્તં

૬૧. ‘‘‘અનુપુબ્બનિરોધો અનુપુબ્બનિરોધો’તિ, આવુસો, વુચ્ચતિ. કિત્તાવતા નુ ખો, આવુસો, અનુપુબ્બનિરોધો વુત્તો ભગવતા’’તિ?

‘‘ઇધાવુસો, ભિક્ખુ વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ. એત્તાવતાપિ ખો, આવુસો, અનુપુબ્બનિરોધો વુત્તો ભગવતા પરિયાયેન…પે….

‘‘પુન ચપરં, આવુસો, ભિક્ખુ સબ્બસો નેવસઞ્ઞાનાસઞ્ઞાયતનં સમતિક્કમ્મ સઞ્ઞાવેદયિતનિરોધં ઉપસમ્પજ્જ વિહરતિ, પઞ્ઞાય ચસ્સ દિસ્વા આસવા પરિક્ખીણા હોન્તિ. એત્તાવતાપિ ખો, આવુસો, અનુપુબ્બનિરોધો વુત્તો ભગવતા નિપ્પરિયાયેના’’તિ. દસમં.

૧૧. અભબ્બસુત્તં

૬૨. ‘‘નવ, ભિક્ખવે, ધમ્મે અપ્પહાય અભબ્બો અરહત્તં સચ્છિકાતું. કતમે નવ? રાગં, દોસં, મોહં, કોધં, ઉપનાહં, મક્ખં, પળાસં, ઇસ્સં, મચ્છરિયં – ઇમે ખો, ભિક્ખવે, નવ ધમ્મે અપ્પહાય અભબ્બો અરહત્તં સચ્છિકાતું.

‘‘નવ, ભિક્ખવે, ધમ્મે પહાય ભબ્બો અરહત્તં સચ્છિકાતું. કતમે નવ? રાગં, દોસં, મોહં, કોધં, ઉપનાહં, મક્ખં, પળાસં, ઇસ્સં, મચ્છરિયં – ઇમે ખો, ભિક્ખવે, નવ ધમ્મે પહાય ભબ્બો અરહત્તં સચ્છિકાતુ’’ન્તિ. એકાદસમં.

ખેમવગ્ગો પઠમો.

તસ્સુદ્દાનં –

ખેમો ચ અમતઞ્ચેવ, અભયં પસ્સદ્ધિયેન ચ;

નિરોધો અનુપુબ્બો ચ, ધમ્મં પહાય ભબ્બેન ચાતિ.

(૭) ૨. સતિપટ્ઠાનવગ્ગો

૧. સિક્ખાદુબ્બલ્યસુત્તં

૬૩. ‘‘પઞ્ચિમાનિ, ભિક્ખવે, સિક્ખાદુબ્બલ્યાનિ. કતમાનિ પઞ્ચ? પાણાતિપાતો, અદિન્નાદાનં, કામેસુમિચ્છાચારો, મુસાવાદો, સુરામેરયમજ્જપમાદટ્ઠાનં – ઇમાનિ ખો, ભિક્ખવે, પઞ્ચ સિક્ખાદુબ્બલ્યાનિ.

‘‘ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ચત્તારો સતિપટ્ઠાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ કાયે કાયાનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં; વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં. ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ઇમે ચત્તારો સતિપટ્ઠાના ભાવેતબ્બા’’તિ. પઠમં.

૨. નીવરણસુત્તં

૬૪. ‘‘પઞ્ચિમાનિ, ભિક્ખવે, નીવરણાનિ. કતમાનિ પઞ્ચ? કામચ્છન્દનીવરણં, બ્યાપાદનીવરણં, થિનમિદ્ધનીવરણં, ઉદ્ધચ્ચકુક્કુચ્ચનીવરણં, વિચિકિચ્છાનીવરણં – ઇમાનિ ખો, ભિક્ખવે, પઞ્ચ નીવરણાનિ.

‘‘ઇમેસં ખો, ભિક્ખવે, પઞ્ચન્નં નીવરણાનં પહાનાય ચત્તારો સતિપટ્ઠાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ કાયે કાયાનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં; વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં. ઇમેસં ખો, ભિક્ખવે, પઞ્ચન્નં નીવરણાનં પહાનાય ઇમે ચત્તારો સતિપટ્ઠાના ભાવેતબ્બા’’તિ. દુતિયં.

૩. કામગુણસુત્તં

૬૫. ‘‘પઞ્ચિમે, ભિક્ખવે, કામગુણા. કતમે પઞ્ચ? ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, સોતવિઞ્ઞેય્યા સદ્દા…પે… ઘાનવિઞ્ઞેય્યા ગન્ધા… જિવ્હાવિઞ્ઞેય્યા રસા… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા. ઇમે ખો, ભિક્ખવે, પઞ્ચ કામગુણા.

‘‘ઇમેસં ખો, ભિક્ખવે, પઞ્ચન્નં કામગુણાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. તતિયં.

૪. ઉપાદાનક્ખન્ધસુત્તં

૬૬. ‘‘પઞ્ચિમે, ભિક્ખવે, ઉપાદાનક્ખન્ધા. કતમે પઞ્ચ? રૂપુપાદાનક્ખન્ધો, વેદનુપાદાનક્ખન્ધો, સઞ્ઞુપાદાનક્ખન્ધો, સઙ્ખારુપાદાનક્ખન્ધો, વિઞ્ઞાણુપાદાનક્ખન્ધો – ઇમે ખો, ભિક્ખવે, પઞ્ચુપાદાનક્ખન્ધા.

‘‘ઇમેસં ખો, ભિક્ખવે, પઞ્ચન્નં ઉપાદાનક્ખન્ધાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. ચતુત્થં.

૫. ઓરમ્ભાગિયસુત્તં

૬૭. ‘‘પઞ્ચિમાનિ, ભિક્ખવે, ઓરમ્ભાગિયાનિ સંયોજનાનિ. કતમાનિ પઞ્ચ? સક્કાયદિટ્ઠિ, વિચિકિચ્છા, સીલબ્બતપરામાસો, કામચ્છન્દો, બ્યાપાદો – ઇમાનિ ખો, ભિક્ખવે, પઞ્ચોરમ્ભાગિયાનિ સંયોજનાનિ.

‘‘ઇમેસં ખો, ભિક્ખવે, પઞ્ચન્નં ઓરમ્ભાગિયાનં સંયોજનાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. પઞ્ચમં.

૬. ગતિસુત્તં

૬૮. ‘‘પઞ્ચિમા, ભિક્ખવે, ગતિયો. કતમા પઞ્ચ? નિરયો, તિરચ્છાનયોનિ, પેત્તિવિસયો, મનુસ્સા, દેવા – ઇમા ખો, ભિક્ખવે, પઞ્ચ ગતિયો.

‘‘ઇમાસં ખો, ભિક્ખવે, પઞ્ચન્નં ગતીનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. છટ્ઠં.

૭. મચ્છરિયસુત્તં

૬૯. ‘‘પઞ્ચિમાનિ, ભિક્ખવે, મચ્છરિયાનિ. કતમાનિ પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમાનિ ખો, ભિક્ખવે, પઞ્ચ મચ્છરિયાનિ.

‘‘ઇમેસં ખો, ભિક્ખવે, પઞ્ચન્નં મચ્છરિયાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. સત્તમં.

૮. ઉદ્ધમ્ભાગિયસુત્તં

૭૦. ‘‘પઞ્ચિમાનિ, ભિક્ખવે, ઉદ્ધમ્ભાગિયાનિ સંયોજનાનિ. કતમાનિ પઞ્ચ? રૂપરાગો, અરૂપરાગો, માનો, ઉદ્ધચ્ચં, અવિજ્જા – ઇમાનિ ખો, ભિક્ખવે, પઞ્ચુદ્ધમ્ભાગિયાનિ સંયોજનાનિ.

‘‘ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. અટ્ઠમં.

૯. ચેતોખિલસુત્તં

૭૧. [અ. નિ. ૫.૨૦૫; દી. નિ. ૩.૩૧૯; મ. નિ. ૧.૧૮૫] ‘‘પઞ્ચિમે, ભિક્ખવે, ચેતોખિલા [ચેતોખીલા (ક.)]. કતમે પઞ્ચ? ઇધ ભિક્ખવે, ભિક્ખુ સત્થરિ કઙ્ખતિ વિચિકિચ્છતિ નાધિમુચ્ચતિ ન સમ્પસીદતિ. યો સો, ભિક્ખવે, ભિક્ખુ સત્થરિ કઙ્ખતિ વિચિકિચ્છતિ નાધિમુચ્ચતિ ન સમ્પસીદતિ, તસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય. યસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય, અયં પઠમો ચેતોખિલો.

‘‘પુન ચપરં, ભિક્ખવે, ભિક્ખુ ધમ્મે કઙ્ખતિ…પે… સઙ્ઘે કઙ્ખતિ… સિક્ખાય કઙ્ખતિ… સબ્રહ્મચારીસુ કુપિતો હોતિ અનત્તમનો આહતચિત્તો ખિલજાતો. યો સો, ભિક્ખવે, ભિક્ખુ સબ્રહ્મચારીસુ કુપિતો હોતિ અનત્તમનો આહતચિત્તો ખિલજાતો, તસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય. યસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય, અયં પઞ્ચમો ચેતોખિલો.

‘‘ઇમેસં, ખો, ભિક્ખવે, પઞ્ચન્નં ચેતોખિલાનં પહાનાય…પે… ઇમે ચત્તારો સતિપટ્ઠાના ભાવેતબ્બા’’તિ. નવમં.

૧૦. ચેતસોવિનિબન્ધસુત્તં

૭૨. ‘‘પઞ્ચિમે, ભિક્ખવે, ચેતસોવિનિબન્ધા [ચેતોવિનિબદ્ધા (સારત્થદીપનીટીકા) અ. નિ. ૫.૨૦૬; દી. નિ. ૩.૩૨૦]. કતમે પઞ્ચ? ઇધ, ભિક્ખવે, ભિક્ખુ કામેસુ અવીતરાગો હોતિ અવિગતચ્છન્દો અવિગતપેમો અવિગતપિપાસો અવિગતપરિળાહો અવિગતતણ્હો. યો સો, ભિક્ખવે, ભિક્ખુ કામેસુ અવીતરાગો હોતિ અવિગતચ્છન્દો અવિગતપેમો અવિગતપિપાસો અવિગતપરિળાહો અવિગતતણ્હો, તસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય. યસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય, અયં પઠમો ચેતસોવિનિબન્ધો.

‘‘પુન ચપરં, ભિક્ખવે, ભિક્ખુ કાયે અવીતરાગો હોતિ…પે… રૂપે અવીતરાગો હોતિ… યાવદત્થં ઉદરાવદેહકં ભુઞ્જિત્વા સેય્યસુખં પસ્સસુખં મિદ્ધસુખં અનુયુત્તો વિહરતિ … અઞ્ઞતરં દેવનિકાયં પણિધાય બ્રહ્મચરિયં ચરતિ – ‘ઇમિનાહં સીલેન વા વતેન વા તપેન વા બ્રહ્મચરિયેન વા દેવો વા ભવિસ્સામિ દેવઞ્ઞતરો વા’તિ. યો સો, ભિક્ખવે, ભિક્ખુ અઞ્ઞતરં દેવનિકાયં પણિધાય બ્રહ્મચરિયં ચરતિ – ‘ઇમિનાહં સીલેન વા વતેન વા તપેન વા બ્રહ્મચરિયેન વા દેવો વા ભવિસ્સામિ દેવઞ્ઞતરો વા’તિ, તસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય. યસ્સ ચિત્તં ન નમતિ આતપ્પાય અનુયોગાય સાતચ્ચાય પધાનાય, અયં પઞ્ચમો ચેતસોવિનિબન્ધો. ઇમે ખો, ભિક્ખવે, પઞ્ચ ચેતસોવિનિબન્ધા.

‘‘ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ચત્તારો સતિપટ્ઠાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ કાયે કાયાનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં; વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરતિ આતાપી સમ્પજાનો સતિમા વિનેય્ય લોકે અભિજ્ઝાદોમનસ્સં. ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ઇમે ચત્તારો સતિપટ્ઠાના ભાવેતબ્બા’’તિ. દસમં.

સતિપટ્ઠાનવગ્ગો દુતિયો.

તસ્સુદ્દાનં –

સિક્ખા નીવરણાકામા, ખન્ધા ચ ઓરમ્ભાગિયા ગતિ;

મચ્છેરં ઉદ્ધમ્ભાગિયા અટ્ઠમં, ચેતોખિલા વિનિબન્ધાતિ.

(૮) ૩. સમ્મપ્પધાનવગ્ગો

૧. સિક્ખસુત્તં

૭૩. ‘‘પઞ્ચિમાનિ, ભિક્ખવે, સિક્ખાદુબ્બલ્યાનિ. કતમાનિ પઞ્ચ? પાણાતિપાતો …પે… સુરામેરયમજ્જપમાદટ્ઠાનં – ઇમાનિ ખો, ભિક્ખવે, પઞ્ચ સિક્ખાદુબ્બલ્યાનિ.

‘‘ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ચત્તારો સમ્મપ્પધાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ અનુપ્પન્નાનં પાપકાનં અકુસલાનં ધમ્માનં અનુપ્પાદાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; ઉપ્પન્નાનં પાપકાનં અકુસલાનં ધમ્માનં પહાનાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; અનુપ્પન્નાનં કુસલાનં ધમ્માનં ઉપ્પાદાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; ઉપ્પન્નાનં કુસલાનં ધમ્માનં ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ. ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ઇમે ચત્તારો સમ્મપ્પધાના ભાવેતબ્બા’’તિ. પઠમં.

૭૪-૮૧. (યથા સતિપટ્ઠાનવગ્ગે તથા સમ્મપ્પધાનવસેન વિત્થારેતબ્બા.)

૧૦. ચેતસોવિનિબન્ધસુત્તં

૮૨. ‘‘પઞ્ચિમે, ભિક્ખવે, ચેતસોવિનિબન્ધા. કતમે પઞ્ચ? ઇધ, ભિક્ખવે, ભિક્ખુ કામેસુ અવીતરાગો હોતિ…પે… ઇમે ખો, ભિક્ખવે, પઞ્ચ ચેતસોવિનિબન્ધા.

‘‘ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ચત્તારો સમ્મપ્પધાના ભાવેતબ્બા. કતમે ચત્તારો? ઇધ, ભિક્ખવે, ભિક્ખુ અનુપ્પન્નાનં પાપકાનં અકુસલાનં ધમ્માનં અનુપ્પાદાય છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ; ઉપ્પન્નાનં પાપકાનં અકુસલાનં ધમ્માનં પહાનાય… અનુપ્પન્નાનં કુસલાનં ધમ્માનં ઉપ્પાદાય… ઉપ્પન્નાનં કુસલાનં ધમ્માનં ઠિતિયા અસમ્મોસાય ભિય્યોભાવાય વેપુલ્લાય ભાવનાય પારિપૂરિયા છન્દં જનેતિ વાયમતિ વીરિયં આરભતિ ચિત્તં પગ્ગણ્હાતિ પદહતિ. ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ઇમે ચત્તારો સમ્મપ્પધાના ભાવેતબ્બા’’તિ. દસમં.

સમ્મપ્પધાનવગ્ગો તતિયો.

(૯) ૪. ઇદ્ધિપાદવગ્ગો

૧. સિક્ખસુત્તં

૮૩. ‘‘પઞ્ચિમાનિ, ભિક્ખવે, સિક્ખાદુબ્બલ્યાનિ. કતમાનિ પઞ્ચ? પાણાતિપાતો…પે… સુરામેરયમજ્જપમાદટ્ઠાનં – ઇમાનિ ખો, ભિક્ખવે, પઞ્ચ સિક્ખાદુબ્બલ્યાનિ.

‘‘ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ચત્તારો ઇદ્ધિપાદા ભાવેતબ્બા. કતમે ચત્તારો? ઇધ, ભિક્ખવે, ભિક્ખુ છન્દસમાધિપધાનસઙ્ખારસમન્નાગતં ઇદ્ધિપાદં ભાવેતિ, વીરિયસમાધિ… ચિત્તસમાધિ… વીમંસાસમાધિપધાનસઙ્ખારસમન્નાગતં ઇદ્ધિપાદં ભાવેતિ. ઇમેસં ખો, ભિક્ખવે, પઞ્ચન્નં સિક્ખાદુબ્બલ્યાનં પહાનાય ઇમે ચત્તારો ઇદ્ધિપાદા ભાવેતબ્બા’’તિ. પઠમં.

૮૪-૯૧. (યથા સતિપટ્ઠાનવગ્ગે તથા ઇદ્ધિપાદવસેન વિત્થારેતબ્બા.)

૧૦. ચેતસોવિનિબન્ધસુત્તં

૯૨. ‘‘પઞ્ચિમે, ભિક્ખવે, ચેતસોવિનિબન્ધા. કતમે પઞ્ચ? ઇધ, ભિક્ખવે, ભિક્ખુ કામેસુ અવીતરાગો હોતિ…પે… ઇમે ખો, ભિક્ખવે, પઞ્ચ ચેતસોવિનિબન્ધા.

‘‘ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ઇમે ચત્તારો ઇદ્ધિપાદા ભાવેતબ્બા. કતમે ચત્તારો? ઇધ, ભિક્ખવે, ભિક્ખુ છન્દસમાધિપધાનસઙ્ખારસમન્નાગતં ઇદ્ધિપાદં ભાવેતિ, વીરિયસમાધિ… ચિત્તસમાધિ… વીમંસાસમાધિપધાનસઙ્ખારસમન્નાગતં ઇદ્ધિપાદં ભાવેતિ. ઇમેસં ખો, ભિક્ખવે, પઞ્ચન્નં ચેતસોવિનિબન્ધાનં પહાનાય ઇમે ચત્તારો ઇદ્ધિપાદા ભાવેતબ્બા’’તિ. દસમં.

ઇદ્ધિપાદવગ્ગો ચતુત્થો.

યથેવ સતિપટ્ઠાના, પધાના ચતુરોપિ ચ;

ચત્તારો ઇદ્ધિપાદા ચ, તથેવ સમ્પયોજયેતિ.

(૧૦) ૫. રાગપેય્યાલં

૯૩. ‘‘રાગસ્સ, ભિક્ખવે, અભિઞ્ઞાય નવ ધમ્મા ભાવેતબ્બા. કતમે નવ? અસુભસઞ્ઞા, મરણસઞ્ઞા, આહારે પટિકૂલસઞ્ઞા, સબ્બલોકે અનભિરતસઞ્ઞા, અનિચ્ચસઞ્ઞા, અનિચ્ચે દુક્ખસઞ્ઞા, દુક્ખે અનત્તસઞ્ઞા, પહાનસઞ્ઞા, વિરાગસઞ્ઞા – રાગસ્સ, ભિક્ખવે અભિઞ્ઞાય ઇમે નવ ધમ્મા ભાવેતબ્બા’’તિ.

૯૪. ‘‘રાગસ્સ, ભિક્ખવે, અભિઞ્ઞાય નવ ધમ્મા ભાવેતબ્બા. કતમે નવ? પઠમં ઝાનં, દુતિયં ઝાનં, તતિયં ઝાનં, ચતુત્થં ઝાનં, આકાસાનઞ્ચાયતનં, વિઞ્ઞાણઞ્ચાયતનં, આકિઞ્ચઞ્ઞાયતનં, નેવસઞ્ઞાનાસઞ્ઞાયતનં, સઞ્ઞાવેદયિતનિરોધો – રાગસ્સ, ભિક્ખવે, અભિઞ્ઞાય ઇમે નવ ધમ્મા ભાવેતબ્બા’’તિ.

૯૫-૧૧૨. ‘‘રાગસ્સ, ભિક્ખવે, પરિઞ્ઞાય…પે… પરિક્ખયાય…પે… પહાનાય…પે… ખયાય…પે… વયાય…પે… વિરાગાય…પે… નિરોધાય…પે… ચાગાય…પે… પટિનિસ્સગ્ગાય…પે… ઇમે નવ ધમ્મા ભાવેતબ્બા’’.

૧૧૩-૪૩૨. ‘‘દોસસ્સ…પે… મોહસ્સ… કોધસ્સ… ઉપનાહસ્સ… મક્ખસ્સ… પળાસસ્સ… ઇસ્સાય… મચ્છરિયસ્સ… માયાય… સાઠેય્યસ્સ… થમ્ભસ્સ… સારમ્ભસ્સ… માનસ્સ… અતિમાનસ્સ… મદસ્સ… પમાદસ્સ અભિઞ્ઞાય…પે… પરિઞ્ઞાય… પરિક્ખયાય… પહાનાય… ખયાય… વયાય… વિરાગાય… નિરોધાય … ચાગાય… પટિનિસ્સગ્ગાય…પે… ઇમે નવ ધમ્મા ભાવેતબ્બા’’તિ.

રાગપેય્યાલં નિટ્ઠિતં.