૧૧. અનુપુબ્બનિરોધસુત્તં

૩૧. ‘‘નવયિમે, ભિક્ખવે, અનુપુબ્બનિરોધા. કતમે નવ? પઠમં ઝાનં સમાપન્નસ્સ કામસઞ્ઞા [આમિસ્સસઞ્ઞા (સ્યા.)] નિરુદ્ધા હોતિ; દુતિયં ઝાનં સમાપન્નસ્સ વિતક્કવિચારા નિરુદ્ધા હોન્તિ; તતિયં ઝાનં સમાપન્નસ્સ પીતિ નિરુદ્ધા હોતિ; ચતુત્થં ઝાનં સમાપન્નસ્સ અસ્સાસપસ્સાસા નિરુદ્ધા હોન્તિ; આકાસાનઞ્ચાયતનં સમાપન્નસ્સ રૂપસઞ્ઞા નિરુદ્ધા હોતિ; વિઞ્ઞાણઞ્ચાયતનં સમાપન્નસ્સ આકાસાનઞ્ચાયતનસઞ્ઞા નિરુદ્ધા હોતિ; આકિઞ્ચઞ્ઞાયતનં સમાપન્નસ્સ વિઞ્ઞાણઞ્ચાયતનસઞ્ઞા નિરુદ્ધા હોતિ; નેવસઞ્ઞાનાસઞ્ઞાયતનં સમાપન્નસ્સ આકિઞ્ચઞ્ઞાયતનસઞ્ઞા નિરુદ્ધા હોતિ; સઞ્ઞાવેદયિતનિરોધં સમાપન્નસ્સ સઞ્ઞા ચ વેદના ચ નિરુદ્ધા હોન્તિ. ઇમે ખો, ભિક્ખવે, નવ અનુપુબ્બનિરોધા’’તિ [દી. નિ. ૩.૩૪૪, ૩૪૯]. એકાદસમં.

સત્તાવાસવગ્ગો તતિયો.