૧. તિઠાનસુત્તં

૨૧. ‘‘તીહિ, ભિક્ખવે, ઠાનેહિ ઉત્તરકુરુકા મનુસ્સા દેવે ચ તાવતિંસે અધિગ્ગણ્હન્તિ જમ્બુદીપકે ચ મનુસ્સે. કતમેહિ તીહિ? અમમા, અપરિગ્ગહા, નિયતાયુકા, વિસેસગુણા [વિસેસભુનો (સી. સ્યા. પી.)] – ઇમેહિ ખો, ભિક્ખવે, તીહિ ઠાનેહિ ઉત્તરકુરુકા મનુસ્સા દેવે ચ તાવતિંસે અધિગ્ગણ્હન્તિ જમ્બુદીપકે ચ મનુસ્સે.

‘‘તીહિ, ભિક્ખવે, ઠાનેહિ દેવા તાવતિંસા ઉત્તરકુરુકે ચ મનુસ્સે અધિગ્ગણ્હન્તિ જમ્બુદીપકે ચ મનુસ્સે. કતમેહિ તીહિ? દિબ્બેન આયુના, દિબ્બેન વણ્ણેન, દિબ્બેન સુખેન – ઇમેહિ ખો, ભિક્ખવે, તીહિ ઠાનેહિ દેવા તાવતિંસા ઉત્તરકુરુકે ચ મનુસ્સે અધિગ્ગણ્હન્તિ જમ્બુદીપકે ચ મનુસ્સે.

[કથા. ૨૭૧] ‘‘તીહિ, ભિક્ખવે, ઠાનેહિ જમ્બુદીપકા મનુસ્સા ઉત્તરકુરુકે ચ મનુસ્સે અધિગ્ગણ્હન્તિ દેવે ચ તાવતિંસે. કતમેહિ તીહિ? સૂરા, સતિમન્તો, ઇધ બ્રહ્મચરિયવાસો – ઇમેહિ ખો, ભિક્ખવે, તીહિ ઠાનેહિ જમ્બુદીપકા મનુસ્સા ઉત્તરકુરુકે ચ મનુસ્સે અધિગ્ગણ્હન્તિ દેવે ચ તાવતિંસે’’તિ. પઠમં.