૭. પત્તનિકુજ્જનસુત્તં

૮૭. [ચૂળવ. ૨૬૫] ‘‘અટ્ઠહિ, ભિક્ખવે, અઙ્ગેહિ સમન્નાગતસ્સ ઉપાસકસ્સ આકઙ્ખમાનો સઙ્ઘો પત્તં નિક્કુજ્જેય્ય [નિકુજ્જેય્ય (ક.)]. કતમેહિ અટ્ઠહિ? ભિક્ખૂનં અલાભાય પરિસક્કતિ, ભિક્ખૂનં અનત્થાય પરિસક્કતિ, ભિક્ખૂનં અવાસાય [અનાવાસાય (સી. સ્યા.)] પરિસક્કતિ, ભિક્ખૂ અક્કોસતિ પરિભાસતિ, ભિક્ખૂ ભિક્ખૂહિ ભેદેતિ [વિભેદેતિ (બહૂસુ)], બુદ્ધસ્સ અવણ્ણં ભાસતિ, ધમ્મસ્સ અવણ્ણં ભાસતિ, સઙ્ઘસ્સ અવણ્ણં ભાસતિ. ઇમેહિ ખો, ભિક્ખવે, અટ્ઠહઙ્ગેહિ સમન્નાગતસ્સ ઉપાસકસ્સ આકઙ્ખમાનો સઙ્ઘો પત્તં નિક્કુજ્જેય્ય.

‘‘અટ્ઠહિ, ભિક્ખવે, અઙ્ગેહિ સમન્નાગતસ્સ ઉપાસકસ્સ આકઙ્ખમાનો સઙ્ઘો પત્તં ઉક્કુજ્જેય્ય. કતમેહિ અટ્ઠહિ? ન ભિક્ખૂનં અલાભાય પરિસક્કતિ, ન ભિક્ખૂનં અનત્થાય પરિસક્કતિ, ન ભિક્ખૂનં અવાસાય પરિસક્કતિ, ન ભિક્ખૂ અક્કોસતિ પરિભાસતિ, ન ભિક્ખૂ ભિક્ખૂહિ ભેદેતિ, બુદ્ધસ્સ વણ્ણં ભાસતિ, ધમ્મસ્સ વણ્ણં ભાસતિ, સઙ્ઘસ્સ વણ્ણં ભાસતિ. ઇમેહિ ખો, ભિક્ખવે, અટ્ઠહઙ્ગેહિ સમન્નાગતસ્સ ઉપાસકસ્સ આકઙ્ખમાનો સઙ્ઘો પત્તં ઉક્કુજ્જેય્યા’’તિ. સત્તમં.