૫. સમણસુત્તં

૮૫. ‘‘‘સમણો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘બ્રાહ્મણો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘વેદગૂ’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘ભિસક્કો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘નિમ્મલો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘વિમલો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘ઞાણી’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સ. ‘વિમુત્તો’તિ, ભિક્ખવે, તથાગતસ્સેતં અધિવચનં અરહતો સમ્માસમ્બુદ્ધસ્સા’’તિ.

‘‘યં સમણેન પત્તબ્બં, બ્રાહ્મણેન વુસીમતા;

યં વેદગુના પત્તબ્બં, ભિસક્કેન અનુત્તરં.

‘‘યં નિમ્મલેન પત્તબ્બં, વિમલેન સુચીમતા;

યં ઞાણિના ચ પત્તબ્બં, વિમુત્તેન અનુત્તરં.

‘‘સોહં વિજિતસઙ્ગામો, મુત્તો મોચેમિ બન્ધના;

નાગોમ્હિ પરમદન્તો, અસેખો પરિનિબ્બુતો’’તિ. પઞ્ચમં;