૨. પુણ્ણિયસુત્તં

૮૨. અથ ખો આયસ્મા પુણ્ણિયો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા પુણ્ણિયો ભગવન્તં એતદવોચ – ‘‘કો નુ ખો, ભન્તે, હેતુ કો પચ્ચયો યેન અપ્પેકદા તથાગતં ધમ્મદેસના પટિભાતિ, અપ્પેકદા ન પટિભાતી’’તિ? ‘‘સદ્ધો ચ, પુણ્ણિય, ભિક્ખુ હોતિ, નો ચુપસઙ્કમિતા; નેવ તથાગતં ધમ્મદેસના પટિભાતિ. યતો ચ ખો, પુણ્ણિય, ભિક્ખુ સદ્ધો ચ હોતિ, ઉપસઙ્કમિતા ચ; એવં તથાગતં ધમ્મદેસના પટિભાતિ. સદ્ધો ચ, પુણ્ણિય, ભિક્ખુ હોતિ, ઉપસઙ્કમિતા ચ, નો ચ પયિરુપાસિતા…પે… પયિરુપાસિતા ચ, નો ચ પરિપુચ્છિતા… પરિપુચ્છિતા ચ, નો ચ ઓહિતસોતો ધમ્મં સુણાતિ… ઓહિતસોતો ચ ધમ્મં સુણાતિ, નો ચ સુત્વા ધમ્મં ધારેતિ… સુત્વા ચ ધમ્મં ધારેતિ, નો ચ ધાતાનં ધમ્માનં અત્થં ઉપપરિક્ખતિ… ધાતાનઞ્ચ ધમ્માનં અત્થં ઉપપરિક્ખતિ, નો ચ અત્થમઞ્ઞાય ધમ્મમઞ્ઞાય ધમ્માનુધમ્મપ્પટિપન્નો હોતિ. નેવ તાવ તથાગતં ધમ્મદેસના પટિભાતિ.

‘‘યતો ચ ખો, પુણ્ણિય, ભિક્ખુ સદ્ધો ચ હોતિ, ઉપસઙ્કમિતા ચ, પયિરુપાસિતા ચ, પરિપુચ્છિતા ચ, ઓહિતસોતો ચ ધમ્મં સુણાતિ, સુત્વા ચ ધમ્મં ધારેતિ, ધાતાનઞ્ચ ધમ્માનં અત્થં ઉપપરિક્ખતિ, અત્થમઞ્ઞાય ધમ્મમઞ્ઞાય ધમ્માનુધમ્મપ્પટિપન્નો ચ હોતિ; એવં તથાગતં ધમ્મદેસના પટિભાતિ. ઇમેહિ ખો, પુણ્ણિય, અટ્ઠહિ ધમ્મેહિ સમન્નાગતા [સમન્નાગતો (સી. પી.), સમન્નાગતં (સ્યા. ક.)] એકન્તપટિભાના [એકન્તપટિભાનં (સબ્બત્થ) અ. નિ. ૧૦.૮૩ પન પસ્સિતબ્બં] તથાગતં ધમ્મદેસના હોતી’’તિ. દુતિયં.