૯. પઠમઇધલોકિકસુત્તં

૪૯. એકં સમયં ભગવા સાવત્થિયં વિહરતિ પુબ્બારામે મિગારમાતુપાસાદે. અથ ખો વિસાખા મિગારમાતા યેન ભગવા તેનુપસઙ્કમિ…પે…. એકમન્તં નિસિન્નં ખો વિસાખં મિગારમાતરં ભગવા એતદવોચ –

‘‘ચતૂહિ ખો, વિસાખે, ધમ્મેહિ સમન્નાગતો માતુગામો ઇધલોકવિજયાય પટિપન્નો હોતિ, અયંસ લોકો આરદ્ધો હોતિ. કતમેહિ ચતૂહિ? ઇધ, વિસાખે, માતુગામો સુસંવિહિતકમ્મન્તો હોતિ, સઙ્ગહિતપરિજનો, ભત્તુ મનાપં ચરતિ, સમ્ભતં અનુરક્ખતિ.

‘‘કથઞ્ચ, વિસાખે, માતુગામો સુસંવિહિતકમ્મન્તો હોતિ? ઇધ, વિસાખે, માતુગામો યે તે ભત્તુ અબ્ભન્તરા કમ્મન્તા – ઉણ્ણાતિ વા કપ્પાસાતિ વા – તત્થ દક્ખા હોતિ અનલસા તત્રુપાયાય વીમંસાય સમન્નાગતા અલં કાતું અલં સંવિધાતું. એવં ખો, વિસાખે, માતુગામો સુસંવિહિતકમ્મન્તો હોતિ.

‘‘કથઞ્ચ, વિસાખે, માતુગામો સઙ્ગહિતપરિજનો હોતિ? ઇધ, વિસાખે, માતુગામો યો સો ભત્તુ અબ્ભન્તરો અન્તોજનો – દાસાતિ વા પેસ્સાતિ વા કમ્મકરાતિ વા – તેસં કતઞ્ચ કતતો જાનાતિ અકતઞ્ચ અકતતો જાનાતિ, ગિલાનકાનઞ્ચ બલાબલં જાનાતિ ખાદનીયં ભોજનીયઞ્ચસ્સ પચ્ચંસેન સંવિભજતિ. એવં ખો, વિસાખે, માતુગામો સઙ્ગહિતપરિજનો હોતિ.

‘‘કથઞ્ચ, વિસાખે, માતુગામો ભત્તુ મનાપં ચરતિ? ઇધ, વિસાખે, માતુગામો યં ભત્તુ અમનાપસઙ્ખાતં તં જીવિતહેતુપિ ન અજ્ઝાચરતિ. એવં ખો, વિસાખે, માતુગામો ભત્તુ મનાપં ચરતિ.

‘‘કથઞ્ચ, વિસાખે, માતુગામો સમ્ભતં અનુરક્ખતિ? ઇધ, વિસાખે, માતુગામો યં ભત્તા આહરતિ ધનં વા ધઞ્ઞં વા રજતં વા જાતરૂપં વા તં આરક્ખેન ગુત્તિયા સમ્પાદેતિ, તત્થ ચ હોતિ અધુત્તી અથેની અસોણ્ડી અવિનાસિકા. એવં ખો, વિસાખે, માતુગામો સમ્ભતં અનુરક્ખતિ. ઇમેહિ ખો, વિસાખે, ચતૂહિ ધમ્મેહિ સમન્નાગતો માતુગામો ઇધલોકવિજયાય પટિપન્નો હોતિ, અયંસ લોકો આરદ્ધો હોતિ.

‘‘ચતૂહિ ખો, વિસાખે, ધમ્મેહિ સમન્નાગતો માતુગામો પરલોકવિજયાય પટિપન્નો હોતિ, પરલોકો આરદ્ધો હોતિ. કતમેહિ ચતૂહિ? ઇધ, વિસાખે, માતુગામો સદ્ધાસમ્પન્નો હોતિ, સીલસમ્પન્નો હોતિ, ચાગસમ્પન્નો હોતિ, પઞ્ઞાસમ્પન્નો હોતિ.

‘‘કથઞ્ચ, વિસાખે, માતુગામો સદ્ધાસમ્પન્નો હોતિ? ઇધ, વિસાખે, માતુગામો સદ્ધો હોતિ, સદ્દહતિ તથાગતસ્સ બોધિં – ‘ઇતિપિ સો ભગવા અરહં સમ્માસમ્બુદ્ધો વિજ્જાચરણસમ્પન્નો સુગતો લોકવિદૂ અનુત્તરો પુરિસદમ્મસારથિ સત્થા દેવમનુસ્સાનં બુદ્ધો ભગવા’તિ. એવં ખો, વિસાખે, માતુગામો સદ્ધાસમ્પન્નો હોતિ.

‘‘કથઞ્ચ, વિસાખે, માતુગામો સીલસમ્પન્નો હોતિ? ઇધ, વિસાખે, માતુગામો પાણાતિપાતા પટિવિરતો હોતિ…પે… સુરામેરયમજ્જપમાદટ્ઠાના પટિવિરતો હોતિ. એવં ખો, વિસાખે, માતુગામો સીલસમ્પન્નો હોતિ.

‘‘કથઞ્ચ, વિસાખે, માતુગામો ચાગસમ્પન્નો હોતિ? ઇધ, વિસાખે, માતુગામો વિગતમલમચ્છેરેન ચેતસા અગારં અજ્ઝાવસતિ મુત્તચાગા પયતપાણિની વોસ્સગ્ગરતા યાચયોગા દાનસંવિભાગરતા. એવં ખો, વિસાખે, માતુગામો ચાગસમ્પન્નો હોતિ.

‘‘કથઞ્ચ, વિસાખે, માતુગામો પઞ્ઞાસમ્પન્નો હોતિ? ઇધ, વિસાખે, માતુગામો પઞ્ઞવા હોતિ…પે… એવં ખો, વિસાખે, માતુગામો પઞ્ઞાસમ્પન્નો હોતિ. ઇમેહિ ખો, વિસાખે, ચતૂહિ ધમ્મેહિ સમન્નાગતો માતુગામો પરલોકવિજયાય પટિપન્નો હોતિ, પરલોકો આરદ્ધો હોતી’’તિ.

‘‘સુસંવિહિતકમ્મન્તા, સઙ્ગહિતપરિજ્જના;

ભત્તુ મનાપં ચરતિ, સમ્ભતં અનુરક્ખતિ.

‘‘સદ્ધા સીલેન સમ્પન્ના, વદઞ્ઞૂ વીતમચ્છરા;

નિચ્ચં મગ્ગં વિસોધેતિ, સોત્થાનં સમ્પરાયિકં.

‘‘ઇચ્ચેતે અટ્ઠ ધમ્મા ચ, યસ્સા વિજ્જન્તિ નારિયા;

તમ્પિ સીલવતિં આહુ, ધમ્મટ્ઠં સચ્ચવાદિનિં.

‘‘સોળસાકારસમ્પન્ના, અટ્ઠઙ્ગસુસમાગતા;

તાદિસી સીલવતી ઉપાસિકા;

ઉપપજ્જતિ દેવલોકં મનાપ’’ન્તિ. નવમં;