૪. હિમવન્તસુત્તં

૨૪. ‘‘છહિ, ભિક્ખવે, ધમ્મેહિ સમન્નાગતો ભિક્ખુ હિમવન્તં પબ્બતરાજં પદાલેય્ય, કો પન વાદો છવાય અવિજ્જાય! કતમેહિ છહિ? ઇધ, ભિક્ખવે, ભિક્ખુ સમાધિસ્સ સમાપત્તિકુસલો હોતિ, સમાધિસ્સ ઠિતિકુસલો હોતિ, સમાધિસ્સ વુટ્ઠાનકુસલો હોતિ, સમાધિસ્સ કલ્લિતકુસલો [કલ્લતાકુસલો (સ્યા. કં. ક.) સં. નિ. ૩.૬૬૫ પસ્સિતબ્બં] હોતિ, સમાધિસ્સ ગોચરકુસલો હોતિ, સમાધિસ્સ અભિનીહારકુસલો હોતિ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ હિમવન્તં પબ્બતરાજં પદાલેય્ય, કો પન વાદો છવાય અવિજ્જાયા’’તિ! ચતુત્થં.