૨. અપરિહાનિયસુત્તં

૨૨. ‘‘છયિમે, ભિક્ખવે, અપરિહાનિયે ધમ્મે દેસેસ્સામિ, તં સુણાથ…પે… કતમે ચ, ભિક્ખવે, છ અપરિહાનિયા ધમ્મા? ન કમ્મારામતા, ન ભસ્સારામતા, ન નિદ્દારામતા, ન સઙ્ગણિકારામતા, સોવચસ્સતા, કલ્યાણમિત્તતા – ઇમે ખો, ભિક્ખવે, છ અપરિહાનિયા ધમ્મા.

‘‘યે હિ કેચિ, ભિક્ખવે, અતીતમદ્ધાનં ન પરિહાયિંસુ કુસલેહિ ધમ્મેહિ, સબ્બેતે ઇમેહેવ છહિ ધમ્મેહિ ન પરિહાયિંસુ કુસલેહિ ધમ્મેહિ. યેપિ હિ કેચિ, ભિક્ખવે, અનાગતમદ્ધાનં ન પરિહાયિસ્સન્તિ કુસલેહિ ધમ્મેહિ, સબ્બેતે ઇમેહેવ છહિ ધમ્મેહિ ન પરિહાયિસ્સન્તિ કુસલેહિ ધમ્મેહિ. યેપિ હિ કેચિ, ભિક્ખવે, એતરહિ ન પરિહાયન્તિ કુસલેહિ ધમ્મેહિ, સબ્બેતે ઇમેહેવ છહિ ધમ્મેહિ ન પરિહાયન્તિ કુસલેહિ ધમ્મેહી’’તિ. દુતિયં.