૨. સિક્ખાપદપેય્યાલં

૧. ભિક્ખુસુત્તં

૨૮૬. ‘‘પઞ્ચહિ, ભિક્ખવે, ધમ્મેહિ સમન્નાગતો ભિક્ખુ યથાભતં નિક્ખિત્તો એવં નિરયે. કતમેહિ પઞ્ચહિ? પાણાતિપાતી હોતિ, અદિન્નાદાયી હોતિ, અબ્રહ્મચારી હોતિ, મુસાવાદી હોતિ, સુરામેરયમજ્જપમાદટ્ઠાયી હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો ભિક્ખુ યથાભતં નિક્ખિત્તો એવં નિરયે.

‘‘પઞ્ચહિ, ભિક્ખવે, ધમ્મેહિ સમન્નાગતો ભિક્ખુ યથાભતં નિક્ખિત્તો એવં સગ્ગે. કતમેહિ પઞ્ચહિ? પાણાતિપાતા પટિવિરતો હોતિ, અદિન્નાદાના પટિવિરતો હોતિ, અબ્રહ્મચરિયા પટિવિરતો હોતિ, મુસાવાદા પટિવિરતો હોતિ, સુરામેરયમજ્જપમાદટ્ઠાના પટિવિરતો હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો ભિક્ખુ યથાભતં નિક્ખિત્તો એવં સગ્ગે’’તિ. પઠમં.

૨-૭. ભિક્ખુનીસુત્તાદિછક્કં

૨૮૭-૨૯૨. ‘‘પઞ્ચહિ, ભિક્ખવે, ધમ્મેહિ સમન્નાગતા ભિક્ખુની…પે… સિક્ખમાના… સામણેરો… સામણેરી… ઉપાસકો… ઉપાસિકા યથાભતં નિક્ખિત્તા એવં નિરયે. કતમેહિ પઞ્ચહિ? પાણાતિપાતિની હોતિ, અદિન્નાદાયિની હોતિ, કામેસુમિચ્છાચારિની હોતિ, મુસાવાદિની હોતિ, સુરામેરયમજ્જપમાદટ્ઠાયિની હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતા ઉપાસિકા યથાભતં નિક્ખિત્તા એવં નિરયે.

‘‘પઞ્ચહિ, ભિક્ખવે, ધમ્મેહિ સમન્નાગતા ઉપાસિકા યથાભતં નિક્ખિત્તા એવં સગ્ગે. કતમેહિ પઞ્ચહિ? પાણાતિપાતા પટિવિરતા હોતિ, અદિન્નાદાના પટિવિરતા હોતિ, કામેસુમિચ્છાચારા પટિવિરતા હોતિ, મુસાવાદા પટિવિરતા હોતિ, સુરામેરયમજ્જપમાદટ્ઠાના પટિવિરતા હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતા ઉપાસિકા યથાભતં નિક્ખિત્તા એવં સગ્ગે’’તિ. સત્તમં.

૮. આજીવકસુત્તં

૨૯૩. ‘‘પઞ્ચહિ, ભિક્ખવે, ધમ્મેહિ સમન્નાગતો આજીવકો યથાભતં નિક્ખિત્તો એવં નિરયે. કતમેહિ પઞ્ચહિ? પાણાતિપાતી હોતિ, અદિન્નાદાયી હોતિ, અબ્રહ્મચારી હોતિ, મુસાવાદી હોતિ, સુરામેરયમજ્જપમાદટ્ઠાયી હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો આજીવકો યથાભતં નિક્ખિત્તો એવં નિરયે’’તિ. અટ્ઠમં.

૯-૧૭. નિગણ્ઠસુત્તાદિનવકં

૨૯૪-૩૦૨. ‘‘પઞ્ચહિ, ભિક્ખવે, ધમ્મેહિ સમન્નાગતો નિગણ્ઠો…પે… મુણ્ડસાવકો… જટિલકો… પરિબ્બાજકો… માગણ્ડિકો… તેદણ્ડિકો… આરુદ્ધકો… ગોતમકો… દેવધમ્મિકો યથાભતં નિક્ખિત્તો એવં નિરયે. કતમેહિ પઞ્ચહિ? પાણાતિપાતી હોતિ, અદિન્નાદાયી હોતિ…પે… સુરામેરયમજ્જપમાદટ્ઠાયી હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો દેવધમ્મિકો યથાભતં નિક્ખિત્તો એવં નિરયે’’તિ. સત્તરસમં.

સિક્ખાપદપેય્યાલં નિટ્ઠિતં.