૩. રાગપેય્યાલં

૩૦૩. ‘‘રાગસ્સ, ભિક્ખવે, અભિઞ્ઞાય પઞ્ચ ધમ્મા ભાવેતબ્બા. કતમે પઞ્ચ? અસુભસઞ્ઞા, મરણસઞ્ઞા, આદીનવસઞ્ઞા, આહારે પટિકૂલસઞ્ઞા, સબ્બલોકે અનભિરતસઞ્ઞા [સબ્બત્થપિ એવમેવ દિસ્સતિ] – રાગસ્સ, ભિક્ખવે, અભિઞ્ઞાય ઇમે પઞ્ચ ધમ્મા ભાવેતબ્બા’’તિ.

૩૦૪. ‘‘રાગસ્સ, ભિક્ખવે, અભિઞ્ઞાય પઞ્ચ ધમ્મા ભાવેતબ્બા. કતમે પઞ્ચ? અનિચ્ચસઞ્ઞા, અનત્તસઞ્ઞા, મરણસઞ્ઞા, આહારે પટિકૂલસઞ્ઞા, સબ્બલોકે અનભિરતસઞ્ઞા – રાગસ્સ, ભિક્ખવે, અભિઞ્ઞાય ઇમે પઞ્ચ ધમ્મા ભાવેતબ્બા’’તિ.

૩૦૫. ‘‘રાગસ્સ, ભિક્ખવે, અભિઞ્ઞાય પઞ્ચ ધમ્મા ભાવેતબ્બા. કતમે પઞ્ચ? અનિચ્ચસઞ્ઞા, અનિચ્ચે દુક્ખસઞ્ઞા, દુક્ખે અનત્તસઞ્ઞા, પહાનસઞ્ઞા, વિરાગસઞ્ઞા – રાગસ્સ, ભિક્ખવે, અભિઞ્ઞાય ઇમે પઞ્ચ ધમ્મા ભાવેતબ્બા’’તિ.

૩૦૬. ‘‘રાગસ્સ, ભિક્ખવે, અભિઞ્ઞાય પઞ્ચ ધમ્મા ભાવેતબ્બા. કતમે પઞ્ચ? સદ્ધિન્દ્રિયં, વીરિયિન્દ્રિયં, સતિન્દ્રિયં, સમાધિન્દ્રિયં, પઞ્ઞિન્દ્રિયં – રાગસ્સ, ભિક્ખવે, અભિઞ્ઞાય ઇમે પઞ્ચ ધમ્મા ભાવેતબ્બા’’તિ.

૩૦૭. ‘‘રાગસ્સ, ભિક્ખવે, અભિઞ્ઞાય પઞ્ચ ધમ્મા ભાવેતબ્બા. કતમે પઞ્ચ? સદ્ધાબલં, વીરિયબલં, સતિબલં, સમાધિબલં, પઞ્ઞાબલં – રાગસ્સ, ભિક્ખવે, અભિઞ્ઞાય ઇમે પઞ્ચ ધમ્મા ભાવેતબ્બા’’તિ.

૩૦૮-૧૧૫૧. ‘‘રાગસ્સ, ભિક્ખવે, પરિઞ્ઞાય… પરિક્ખયાય… પહાનાય… ખયાય… વયાય… વિરાગાય… નિરોધાય… ચાગાય… પટિનિસ્સગ્ગાય પઞ્ચ ધમ્મા ભાવેતબ્બા. દોસસ્સ… મોહસ્સ… કોધસ્સ… ઉપનાહસ્સ… મક્ખસ્સ… પળાસસ્સ… ઇસ્સાય… મચ્છરિયસ્સ… માયાય… સાઠેય્યસ્સ… થમ્ભસ્સ… સારમ્ભસ્સ… માનસ્સ… અતિમાનસ્સ … મદસ્સ… પમાદસ્સ અભિઞ્ઞાય… પરિઞ્ઞાય… પરિક્ખયાય… પહાનાય… ખયાય… વયાય… વિરાગાય… નિરોધાય… ચાગાય… પટિનિસ્સગ્ગાય પઞ્ચ ધમ્મા ભાવેતબ્બા.

‘‘કતમે પઞ્ચ? સદ્ધાબલં, વીરિયબલં, સતિબલં, સમાધિબલં, પઞ્ઞાબલં – પમાદસ્સ, ભિક્ખવે, પટિનિસ્સગ્ગાય ઇમે પઞ્ચ ધમ્મા ભાવેતબ્બા’’તિ.

રાગપેય્યાલં નિટ્ઠિતં.