૪. બહૂપકારસુત્તં

૨૩૪. ‘‘પઞ્ચહિ, ભિક્ખવે, ધમ્મેહિ સમન્નાગતો આવાસિકો ભિક્ખુ આવાસસ્સ બહૂપકારો હોતિ. કતમેહિ પઞ્ચહિ? સીલવા હોતિ…પે… સમાદાય સિક્ખતિ સિક્ખાપદેસુ; બહુસ્સુતો હોતિ…પે… દિટ્ઠિયા સુપ્પટિવિદ્ધા; ખણ્ડફુલ્લં પટિસઙ્ખરોતિ; મહા ખો પન ભિક્ખુસઙ્ઘો અભિક્કન્તો નાનાવેરજ્જકા ભિક્ખૂ ગિહીનં ઉપસઙ્કમિત્વા આરોચેતિ – ‘મહા ખો, આવુસો, ભિક્ખુસઙ્ઘો અભિક્કન્તો નાનાવેરજ્જકા ભિક્ખૂ, કરોથ પુઞ્ઞાનિ, સમયો પુઞ્ઞાનિ કાતુ’ન્તિ; ચતુન્નં ઝાનાનં આભિચેતસિકાનં દિટ્ઠધમ્મસુખવિહારાનં નિકામલાભી હોતિ અકિચ્છલાભી અકસિરલાભી. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો આવાસિકો ભિક્ખુ આવાસસ્સ બહૂપકારો હોતી’’તિ. ચતુત્થં.