૭. વસ્સસુત્તં

૧૯૭. ‘‘પઞ્ચિમે, ભિક્ખવે, વસ્સસ્સ અન્તરાયા, યં નેમિત્તા [નેમિત્તકા (કત્થચિ)] ન જાનન્તિ, યત્થ નેમિત્તાનં ચક્ખુ ન કમતિ. કતમે પઞ્ચ? ઉપરિ, ભિક્ખવે, આકાસે તેજોધાતુ પકુપ્પતિ. તેન ઉપ્પન્ના મેઘા પટિવિગચ્છન્તિ. અયં, ભિક્ખવે, પઠમો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.

‘‘પુન ચપરં, ભિક્ખવે, ઉપરિ આકાસે વાયોધાતુ પકુપ્પતિ. તેન ઉપ્પન્ના મેઘા પટિવિગચ્છન્તિ. અયં, ભિક્ખવે, દુતિયો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.

‘‘પુન ચપરં, ભિક્ખવે, રાહુ અસુરિન્દો પાણિના ઉદકં સમ્પટિચ્છિત્વા મહાસમુદ્દે છડ્ડેતિ. અયં, ભિક્ખવે, તતિયો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.

‘‘પુન ચપરં, ભિક્ખવે, વસ્સવલાહકા દેવા પમત્તા હોન્તિ. અયં, ભિક્ખવે, ચતુત્થો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ.

‘‘પુન ચપરં, ભિક્ખવે, મનુસ્સા અધમ્મિકા હોન્તિ. અયં, ભિક્ખવે, પઞ્ચમો વસ્સસ્સ અન્તરાયો, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતિ. ઇમે ખો, ભિક્ખવે, પઞ્ચ વસ્સસ્સ અન્તરાયા, યં નેમિત્તા ન જાનન્તિ, યત્થ નેમિત્તાનં ચક્ખુ ન કમતી’’તિ. સત્તમં.