૪. દુતિયધમ્મવિહારીસુત્તં

૭૪. અથ ખો અઞ્ઞતરો ભિક્ખુ યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો સો ભિક્ખુ ભગવન્તં એતદવોચ – ‘‘‘ધમ્મવિહારી ધમ્મવિહારી’તિ, ભન્તે, વુચ્ચતિ. કિત્તાવતા નુ ખો, ભન્તે, ભિક્ખુ ધમ્મવિહારી હોતી’’તિ?

‘‘ઇધ, ભિક્ખુ, ભિક્ખુ ધમ્મં પરિયાપુણાતિ – સુત્તં, ગેય્યં, વેય્યાકરણં, ગાથં, ઉદાનં, ઇતિવુત્તકં, જાતકં, અબ્ભુતધમ્મં, વેદલ્લં; ઉત્તરિ [ઉત્તરિં (સી. સ્યા. કં. પી.)] ચસ્સ પઞ્ઞાય અત્થં નપ્પજાનાતિ. અયં વુચ્ચતિ, ભિક્ખુ – ‘ભિક્ખુ પરિયત્તિબહુલો, નો ધમ્મવિહારી’’’.

‘‘પુન ચપરં, ભિક્ખુ, ભિક્ખુ યથાસુતં યથાપરિયત્તં ધમ્મં વિત્થારેન પરેસં દેસેતિ, ઉત્તરિ ચસ્સ પઞ્ઞાય અત્થં નપ્પજાનાતિ. અયં વુચ્ચતિ, ભિક્ખુ – ‘ભિક્ખુ પઞ્ઞત્તિબહુલો, નો ધમ્મવિહારી’’’.

‘‘પુન ચપરં, ભિક્ખુ, ભિક્ખુ યથાસુતં યથાપરિયત્તં ધમ્મં વિત્થારેન સજ્ઝાયં કરોતિ, ઉત્તરિ ચસ્સ પઞ્ઞાય અત્થં નપ્પજાનાતિ. અયં વુચ્ચતિ, ભિક્ખુ – ‘ભિક્ખુ સજ્ઝાયબહુલો, નો ધમ્મવિહારી’’’.

‘‘પુન ચપરં, ભિક્ખુ, ભિક્ખુ યથાસુતં યથાપરિયત્તં ધમ્મં ચેતસા અનુવિતક્કેતિ અનુવિચારેતિ મનસાનુપેક્ખતિ, ઉત્તરિ ચસ્સ પઞ્ઞાય અત્થં નપ્પજાનાતિ. અયં વુચ્ચતિ, ભિક્ખુ – ‘ભિક્ખુ વિતક્કબહુલો, નો ધમ્મવિહારી’’’.

‘‘ઇધ, ભિક્ખુ, ભિક્ખુ ધમ્મં પરિયાપુણાતિ – સુત્તં, ગેય્યં, વેય્યાકરણં, ગાથં, ઉદાનં, ઇતિવુત્તકં, જાતકં, અબ્ભુતધમ્મં, વેદલ્લં; ઉત્તરિ ચસ્સ પઞ્ઞાય અત્થં પજાનાતિ. એવં ખો, ભિક્ખુ, ભિક્ખુ ધમ્મવિહારી હોતિ.

‘‘ઇતિ ખો, ભિક્ખુ, દેસિતો મયા પરિયત્તિબહુલો, દેસિતો પઞ્ઞત્તિબહુલો, દેસિતો સજ્ઝાયબહુલો, દેસિતો વિતક્કબહુલો, દેસિતો ધમ્મવિહારી. યં ખો, ભિક્ખુ, સત્થારા કરણીયં સાવકાનં હિતેસિના અનુકમ્પકેન અનુકમ્પં ઉપાદાય, કતં વો તં મયા. એતાનિ, ભિક્ખુ, રુક્ખમૂલાનિ, એતાનિ સુઞ્ઞાગારાનિ. ઝાયથ ભિક્ખુ, મા પમાદત્થ, મા પચ્છા વિપ્પટિસારિનો અહુવત્થ. અયં વો અમ્હાકં અનુસાસની’’તિ. ચતુત્થં.