૯. ભોજનસુત્તં

૩૭. ‘‘ભોજનં, ભિક્ખવે, દદમાનો દાયકો પટિગ્ગાહકાનં પઞ્ચ ઠાનાનિ દેતિ. કતમાનિ પઞ્ચ? આયું દેતિ, વણ્ણં દેતિ, સુખં દેતિ, બલં દેતિ, પટિભાનં [પટિભાણં (સી.)] દેતિ. આયું ખો પન દત્વા આયુસ્સ ભાગી હોતિ દિબ્બસ્સ વા માનુસસ્સ વા; વણ્ણં દત્વા વણ્ણસ્સ ભાગી હોતિ દિબ્બસ્સ વા માનુસસ્સ વા; સુખં દત્વા સુખસ્સ ભાગી હોતિ દિબ્બસ્સ વા માનુસસ્સ વા; બલં દત્વા બલસ્સ ભાગી હોતિ દિબ્બસ્સ વા માનુસસ્સ વા; પટિભાનં દત્વા પટિભાનસ્સ ભાગી હોતિ દિબ્બસ્સ વા માનુસસ્સ વા. ભોજનં, ભિક્ખવે, દદમાનો દાયકો પટિગ્ગાહકાનં ઇમાનિ પઞ્ચ ઠાનાનિ દેતી’’તિ.

‘‘આયુદો બલદો ધીરો, વણ્ણદો પટિભાનદો;

સુખસ્સ દાતા મેધાવી, સુખં સો અધિગચ્છતિ.

‘‘આયું દત્વા બલં વણ્ણં, સુખઞ્ચ પટિભાનકં [પટિભાણકં (સી.), પટિભાનદો (સ્યા. કં. પી. ક.)];

દીઘાયુ યસવા હોતિ, યત્થ યત્થૂપપજ્જતી’’તિ. સત્તમં;