૮. જમ્બાલીસુત્તં

૧૭૮. ‘‘ચત્તારોમે, ભિક્ખવે, પુગ્ગલા સન્તો સંવિજ્જમાના લોકસ્મિં. કતમે ચત્તારો? ઇધ, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો સક્કાયનિરોધં મનસિ કરોતિ. તસ્સ સક્કાયનિરોધં મનસિ કરોતો સક્કાયનિરોધે ચિત્તં ન પક્ખન્દતિ નપ્પસીદતિ ન સન્તિટ્ઠતિ નાધિમુચ્ચતિ. તસ્સ ખો એવં [તસ્સ કો એતં (સી. સ્યા. કં. પી.), એવં ખો તસ્સ (?) ‘‘એવં હિ તસ્સા ભિક્ખવે જમ્બાલિયા’’તિ પાઠો વિય], ભિક્ખવે, ભિક્ખુનો ન સક્કાયનિરોધો પાટિકઙ્ખો. સેય્યથાપિ, ભિક્ખવે, પુરિસો લેપગતેન [લસગતેન (સી. પી.)] હત્થેન સાખં ગણ્હેય્ય, તસ્સ સો હત્થો સજ્જેય્યપિ ગણ્હેય્યપિ [ગય્હેય્યપિ (?)] બજ્ઝેય્યપિ [ખજ્જેય્યપિ (સી.)]; એવમેવં ખો, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો સક્કાયનિરોધં મનસિ કરોતિ. તસ્સ સક્કાયનિરોધં મનસિ કરોતો સક્કાયનિરોધે ચિત્તં ન પક્ખન્દતિ નપ્પસીદતિ ન સન્તિટ્ઠતિ નાધિમુચ્ચતિ. તસ્સ ખો એવં, ભિક્ખવે, ભિક્ખુનો ન સક્કાયનિરોધો પાટિકઙ્ખો.

‘‘ઇધ પન, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો સક્કાયનિરોધં મનસિ કરોતિ. તસ્સ સક્કાયનિરોધં મનસિ કરોતો સક્કાયનિરોધે ચિત્તં પક્ખન્દતિ પસીદતિ સન્તિટ્ઠતિ અધિમુચ્ચતિ. તસ્સ ખો એવં, ભિક્ખવે, ભિક્ખુનો સક્કાયનિરોધો પાટિકઙ્ખો. સેય્યથાપિ, ભિક્ખવે, પુરિસો સુદ્ધેન હત્થેન સાખં ગણ્હેય્ય, તસ્સ સો હત્થો નેવ સજ્જેય્ય ન ગણ્હેય્ય ન બજ્ઝેય્ય; એવમેવં ખો, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો સક્કાયનિરોધં મનસિ કરોતિ. તસ્સ સક્કાયનિરોધં મનસિ કરોતો સક્કાયનિરોધે ચિત્તં પક્ખન્દતિ પસીદતિ સન્તિટ્ઠતિ અધિમુચ્ચતિ. તસ્સ ખો એવં, ભિક્ખવે, ભિક્ખુનો સક્કાયનિરોધો પાટિકઙ્ખો.

‘‘ઇધ પન, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો અવિજ્જાપ્પભેદં મનસિ કરોતિ. તસ્સ અવિજ્જાપ્પભેદં મનસિ કરોતો અવિજ્જાપ્પભેદે ચિત્તં ન પક્ખન્દતિ નપ્પસીદતિ ન સન્તિટ્ઠતિ નાધિમુચ્ચતિ. તસ્સ ખો એવં, ભિક્ખવે, ભિક્ખુનો ન અવિજ્જાપ્પભેદો પાટિકઙ્ખો. સેય્યથાપિ, ભિક્ખવે, જમ્બાલી અનેકવસ્સગણિકા. તસ્સા પુરિસો યાનિ ચેવ આયમુખાનિ તાનિ પિદહેય્ય, યાનિ ચ અપાયમુખાનિ તાનિ વિવરેય્ય, દેવો ચ ન સમ્મા ધારં અનુપ્પવેચ્છેય્ય. એવઞ્હિ તસ્સા, ભિક્ખવે, જમ્બાલિયા ન આળિપ્પભેદો પાટિકઙ્ખો. એવમેવં ખો, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો અવિજ્જાપ્પભેદં મનસિ કરોતિ. તસ્સ અવિજ્જાપ્પભેદં મનસિ કરોતો અવિજ્જાપ્પભેદે ચિત્તં ન પક્ખન્દતિ નપ્પસીદતિ ન સન્તિટ્ઠતિ નાધિમુચ્ચતિ. તસ્સ ખો એવં, ભિક્ખવે, ભિક્ખુનો ન અવિજ્જાપ્પભેદો પાટિકઙ્ખો.

‘‘ઇધ પન, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો અવિજ્જાપ્પભેદં મનસિ કરોતિ. તસ્સ અવિજ્જાપ્પભેદં મનસિ કરોતો અવિજ્જાપ્પભેદે ચિત્તં પક્ખન્દતિ પસીદતિ સન્તિટ્ઠતિ અધિમુચ્ચતિ. તસ્સ ખો એવં, ભિક્ખવે, ભિક્ખુનો અવિજ્જાપ્પભેદો પાટિકઙ્ખો. સેય્યથાપિ, ભિક્ખવે, જમ્બાલી અનેકવસ્સગણિકા. તસ્સા પુરિસો યાનિ ચેવ આયમુખાનિ તાનિ વિવરેય્ય, યાનિ ચ અપાયમુખાનિ તાનિ પિદહેય્ય, દેવો ચ સમ્મા ધારં અનુપ્પવેચ્છેય્ય. એવઞ્હિ તસ્સા, ભિક્ખવે, જમ્બાલિયા આળિપ્પભેદો પાટિકઙ્ખો. એવમેવં ખો, ભિક્ખવે, ભિક્ખુ અઞ્ઞતરં સન્તં ચેતોવિમુત્તિં ઉપસમ્પજ્જ વિહરતિ. સો અવિજ્જાપ્પભેદં મનસિ કરોતિ. તસ્સ અવિજ્જાપ્પભેદં મનસિ કરોતો અવિજ્જાપ્પભેદે ચિત્તં પક્ખન્દતિ પસીદતિ સન્તિટ્ઠતિ અધિમુચ્ચતિ. તસ્સ ખો એવં, ભિક્ખવે, ભિક્ખુનો અવિજ્જાપ્પભેદો પાટિકઙ્ખો. ઇમે ખો, ભિક્ખવે, ચત્તારો પુગ્ગલા સન્તો સંવિજ્જમાના લોકસ્મિ’’ન્તિ. અટ્ઠમં.