૫. ઉપવાણસુત્તં

૧૭૫. અથ ખો આયસ્મા ઉપવાણો યેનાયસ્મા સારિપુત્તો તેનુપસઙ્કમિ; ઉપસઙ્કમિત્વા આયસ્મતા સારિપુત્તેન સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો આયસ્મા ઉપવાણો આયસ્મન્તં સારિપુત્તં એતદવોચ –

‘‘કિં નુ ખો, આવુસો સારિપુત્ત, વિજ્જાયન્તકરો હોતી’’તિ?

‘‘નો હિદં, આવુસો’’.

‘‘કિં પનાવુસો સારિપુત્ત, ચરણેનન્તકરો હોતી’’તિ?

‘‘નો હિદં, આવુસો’’.

‘‘કિં પનાવુસો સારિપુત્ત, વિજ્જાચરણેનન્તકરો હોતી’’તિ?

‘‘નો હિદં, આવુસો’’.

‘‘કિં પનાવુસો સારિપુત્ત, અઞ્ઞત્ર વિજ્જાચરણેનન્તકરો હોતી’’તિ?

‘‘નો હિદં, આવુસો’’.

‘‘‘કિં નુ ખો, આવુસો સારિપુત્ત, વિજ્જાયન્તકરો હોતી’તિ, ઇતિ પુટ્ઠો સમાનો – ‘નો હિદં, આવુસો’તિ વદેસિ. ‘કિં પનાવુસો સારિપુત્ત, ચરણેનન્તકરો હોતી’તિ, ઇતિ પુટ્ઠો સમાનો – ‘નો હિદં, આવુસો’તિ વદેસિ. ‘કિં પનાવુસો સારિપુત્ત, વિજ્જાચરણેનન્તકરો હોતી’તિ, ઇતિ પુટ્ઠો સમાનો – ‘નો હિદં, આવુસો’તિ વદેસિ. ‘કિં પનાવુસો સારિપુત્ત, અઞ્ઞત્ર વિજ્જાચરણેનન્તકરો હોતી’તિ, ઇતિ પુટ્ઠો સમાનો – ‘નો હિદં, આવુસો’તિ વદેસિ. યથા કથં પનાવુસો, અન્તકરો હોતી’’તિ?

‘‘વિજ્જાય ચે, આવુસો, અન્તકરો અભવિસ્સ, સઉપાદાનોવ સમાનો અન્તકરો અભવિસ્સ. ચરણેન ચે, આવુસો, અન્તકરો અભવિસ્સ, સઉપાદાનોવ સમાનો અન્તકરો અભવિસ્સ. વિજ્જાચરણેન ચે, આવુસો, અન્તકરો અભવિસ્સ, સઉપાદાનોવ સમાનો અન્તકરો અભવિસ્સ. અઞ્ઞત્ર વિજ્જાચરણેન ચે, આવુસો, અન્તકરો અભવિસ્સ, પુથુજ્જનો અન્તકરો અભવિસ્સ. પુથુજ્જનો હિ, આવુસો, અઞ્ઞત્ર વિજ્જાચરણેન. ચરણવિપન્નો ખો, આવુસો, યથાભૂતં ન જાનાતિ ન પસ્સતિ. ચરણસમ્પન્નો યથાભૂતં જાનાતિ પસ્સતિ. યથાભૂતં જાનં પસ્સં અન્તકરો હોતી’’તિ. પઞ્ચમં.